8th Pay Commission : ક્યારથી મળી શકે છે કર્મચારીઓને એરિયર સાથે પગાર ? આ રહ્યું અપડેટ

8મા પગાર પંચને લઈને કેન્દ્ર સરકારના કર્મચારીઓ અને પેન્શનરોમાં લાંબા સમયથી ઉત્સુકતા જોવા મળી રહી છે. હાલ પંચ દ્વારા કર્મચારી સંગઠનો, પેન્શનર એસોસિએશનો અને અન્ય હિતધારકો સાથે પગાર, પેન્શન, ભથ્થાં અને કાર્ય પરિસ્થિતિઓ અંગે ચર્ચા ચાલી રહી છે. આ ચર્ચાઓ પૂર્ણ થયા બાદ જ પંચ પોતાનો અંતિમ અહેવાલ તૈયાર કરશે.

અહેવાલ તૈયાર થયા પછી તેને મંત્રીઓના જૂથ સમક્ષ રજૂ કરવામાં આવશે. સરકાર તરફથી મંજૂરી મળ્યા બાદ 8મા પગાર પંચની ભલામણો અમલમાં મૂકાશે. માનવામાં આવી રહ્યું છે કે આ પ્રક્રિયા પૂર્ણ થતાં 2027ના અંત સુધીમાં નવા પગાર ધોરણો લાગુ થઈ શકે છે. સાથે જ કર્મચારીઓને 1 જાન્યુઆરી, 2026થી લાગુ થતી બાકી રકમ પણ ચૂકવવામાં આવી શકે છે.

હાલમાં સૌથી મોટો સવાલ એ છે કે કર્મચારીઓને વધારેલા પગાર સાથે બાકી રકમ ક્યારે મળશે. ખાસ કરીને લેવલ 1થી 5 સુધીના કર્મચારીઓ માટે, જો લગભગ 20 મહિનાની બાકી રકમ એકસાથે ચૂકવવામાં આવે તો તેમને નોંધપાત્ર લાભ મળી શકે છે.

8મા પગાર પંચે તાજેતરમાં લખનૌ, ઉત્તર પ્રદેશમાં હિતધારકો સાથે બેઠક યોજવા માટે સમયપત્રક જાહેર કર્યું છે. આ બેઠકોમાં કેન્દ્ર સરકારની વિવિધ સંસ્થાઓ, યુનિયનો અને કર્મચારી સંગઠનોને આમંત્રિત કરવામાં આવ્યા છે. ઉપરાંત જૂન 2026 દરમિયાન જમ્મુ-કાશ્મીર અને લદ્દાખમાં પણ બેઠકો યોજાનાર છે.

કર્મચારી સંગઠનો દ્વારા અલગ અલગ ફિટમેન્ટ ફેક્ટરની માંગ કરવામાં આવી રહી છે. કેન્દ્ર સરકારના કર્મચારીઓનું પ્રતિનિધિત્વ કરતી NC-JCM સંસ્થાએ 3.83ના ફિટમેન્ટ ફેક્ટર સાથે લઘુત્તમ મૂળ પગાર ₹69,000 કરવાની માંગ કરી છે. ઓલ ઈન્ડિયા ડિફેન્સ એમ્પ્લોયીઝ ફેડરેશન (AIDEF) એ પણ સમાન ફિટમેન્ટ ફેક્ટરની માંગ રજૂ કરી છે.

બીજી તરફ, ઈન્ડિયન રેલ્વે ટેકનિકલ સુપરવાઈઝર્સ એસોસિએશન (IRTSA) એ વિવિધ લેવલના કર્મચારીઓ માટે અલગ અલગ ફિટમેન્ટ ફેક્ટરની માંગ કરી છે. તેમના પ્રસ્તાવ મુજબ લેવલ 2થી 5 સુધીના કર્મચારીઓ માટે 2.92 અને લેવલ 17-18 સુધીના અધિકારીઓ માટે 4.38 સુધીનો ફિટમેન્ટ ફેક્ટર નક્કી કરવાની ભલામણ કરવામાં આવી છે.

જોકે, આ તમામ આંકડા હાલમાં માત્ર કર્મચારી સંગઠનો દ્વારા રજૂ કરાયેલા સૂચનો અને માંગણીઓ પર આધારિત છે. અંતિમ નિર્ણય 8મું પગાર પંચ પોતાના મૂલ્યાંકન બાદ કરશે. નોંધનીય છે કે 7મા પગાર પંચ દરમિયાન પણ NC-JCM એ 3.71ના ફિટમેન્ટ ફેક્ટરની માંગ કરી હતી, પરંતુ પંચે અંતે 2.57નો ફિટમેન્ટ ફેક્ટર ભલામણ કર્યો હતો, જેને બાદમાં સરકારે મંજૂરી આપી હતી.