મુંબઈના મલાડ ઈસ્ટ વિસ્તારના સેન્ટ્રલ પ્લાઝા કોમ્પ્લેક્સમાં ભીષણ આગ, વીડિયો આવ્યો સામે

મુંબઈમાં મલાડ ઈસ્ટના રોડ પર આવેલી વર્ધમાન ગારમેન્ટની દુકાનમાં ભીષણ આગ લાગી હોવાની માહિતી સામે આવી છે. સ્થાનિક લોકોએ આગ જોતાની સાથે જ સંબંધિત અધિકારીઓને જાણ કરી હતી અને માહિતી મળતાની સાથે જ 8 ફાયર ટેન્ડર ઘટના સ્થળે પહોંચી ગયા હતા. આગ લાગવાનું ચોક્કસ કારણ હજુ જાણી શકાયું નથી. હજુ સુધી કોઈ જાનહાનિ કે ઈજાના અહેવાલ નથી. સ્થાનિક અહેવાલો અનુસાર મલાડમાં ગુરુવારે, 28 માર્ચે આઠ માળની કોમર્શિયલ બિલ્ડિંગના પાંચમા માળે આગ ફાટી નીકળી હતી.  આગ પર કાબૂ મેળવવા માટે તાત્કાલિક પ્રયાસો શરૂ કરવામાં આવ્યા હતા.

ટીમ આગ ઓલવવામાં લાગી હતી

અધિકારીઓએ જણાવ્યું કે ઈમારતનો પાંચમો અને છઠ્ઠો માળ ધુમાડાથી ભરાઈ ગયો હતો. તેમણે કહ્યું કે ઓછામાં ઓછા છ ફાયર એન્જિન અને અન્ય વાહનોને આગ બુઝાવવાની કામગીરી માટે સ્થળ પર મોકલવામાં આવ્યા છે. આ ઉપરાંત મુંબઈ પોલીસ, મુંબઈ મ્યુનિસિપલ કોર્પોરેશન (BMC) અને અન્ય એજન્સીઓના કર્મચારીઓને તૈનાત કરવામાં આવ્યા છે.

એક નાગરિક અધિકારીએ જણાવ્યું હતું કે આગ સવારે 11.30 વાગ્યાની આસપાસની જાણ કરવામાં આવી હતી અને તે મલાડ પૂર્વમાં દફતારી રોડ પર સેન્ટ્રલ પ્લાઝા કોમ્પ્લેક્સના પાંચમા અને છઠ્ઠા માળ પરની કેટલીક દુકાનો સુધી મર્યાદિત હતી. તેમણે કહ્યું કે હાલમાં કોઈના ઘાયલ થયાના સમાચાર નથી.