સુરત મહાનગરપાલિકાનો આસિસ્ટન્ટ ઇજનેર લાંચ લેતા રંગે હાથે ઝડપાયો, જુઓ Video

સુરત મહાનગરપાલિકાના ઉધના ઝોનમાં ફરજ બજાવતા આસિસ્ટન્ટ ઇજનેર જીગ્નેશ મોદીને લાંચ લેતા રંગે હાથે ઝડપી લેવામાં આવ્યા છે. એસીબી (એન્ટિ કરપ્શન બ્યુરો) દ્વારા કરવામાં આવેલી આ કાર્યવાહીમાં જીગ્નેશ મોદી ₹45,000 ની લાંચ સ્વીકારતા ઉધના સાઉથ ઝોન ઓફિસના ગેટ બહારથી પકડાયા હતા. પ્રાપ્ત માહિતી અનુસાર, પાણીની લાઇન નાખવાના બિલ મંજૂર કરવા માટે તેમણે ₹50,000 ની લાંચની માંગણી કરી હતી.

લાંચની રકમ સ્વીકારતી વખતે એસીબીની ટીમે છટકું ગોઠવીને તેમને રંગે હાથે પકડી પાડ્યા હતા. આ ઘટના સુરત મહાનગરપાલિકામાં ભ્રષ્ટાચારના કિસ્સાઓ ફરી એકવાર સામે લાવી છે. નોંધનીય છે કે, આ જ આરોપી જીગ્નેશ મોદી અગાઉ 2021 માં પણ રાંદેર ઝોનમાંથી ₹15,000 ની લાંચ લેતા ઝડપાયા હતા. બે વખત લાંચ લેતા ઝડપાવાની ઘટના તેમના પર શંકાના વાદળો ઉભા કરે છે અને તેમની કાર્યપ્રણાલી પર પ્રશ્નાર્થ સર્જે છે. એસીબીની આ કાર્યવાહી ભ્રષ્ટ અધિકારીઓમાં ફફડાટ મચાવશે તેવી આશા છે. આ કેસમાં વધુ તપાસ ચાલી રહી છે અને કાયદેસરની કાર્યવાહી હાથ ધરવામાં આવશે.

ગુજરાતમાં ગેરકાયદેસર બાંગ્લાદેશી ઘૂસણખોરી પર કાર્યવાહી, જુઓ Video