જામનગરમાં જાહેરમાં બાયોમેડિકલ વેસ્ટ ફેંકનાર મહિલા તબીબને તંત્રે ફટકાર્યો ₹20 હજારનો દંડ, અત્યાર સુધીમાં ત્રણ ડૉક્ટર સામે કાર્યવાહી

જામનગરમાં બાયોમેડિકલ વેસ્ટના અયોગ્ય નિકાલ સામે મહાનગરપાલિકાએ સઘન કાર્યવાહી શરૂ કરી છે. તાજેતરમાં, અંબર ચોકડી નજીક જાહેરમાં બાયોમેડિકલ વેસ્ટ ફેંકવા બદલ એક ડૉક્ટરને ₹20,000નો દંડ ફટકારવામાં આવ્યો છે. આ કાર્યવાહીમાં ડૉક્ટર ઈલાબેન પુનાતરને ₹20,000નો દંડ કરાયો હતો, જેમનો બાયોમેડિકલ વેસ્ટ અંબર રોડ પરના કચરાના પોઈન્ટ પરથી મળી આવ્યો હતો.

આ પહેલાં પણ મહાનગરપાલિકાએ આવા જ ગુના બદલ બે અન્ય ડોક્ટરો સામે કાર્યવાહી કરી હતી. જેમાં ડોક્ટર સુરેશ ઠાકર અને ડોક્ટર ગાયત્રીબેન ઠાકરનો સમાવેશ થાય છે, જેમણે પણ જાહેરમાં બાયોમેડિકલ કચરો ફેંક્યો હતો અને તેમને પણ ₹20,000નો દંડ ફટકારવામાં આવ્યો હતો. આમ, છેલ્લા બે દિવસમાં જામનગર મહાનગરપાલિકા દ્વારા જાહેરમાં બાયોમેડિકલ વેસ્ટ ફેંકનારા ત્રણ ડૉકટરો પાસેથી કુલ ₹80,000નો દંડ વસૂલવામાં આવ્યો છે.

મહાનગરપાલિકાએ તમામ ડૉકટરોને બાયોમેડિકલ વેસ્ટનો નિયમ મુજબ અને યોગ્ય જગ્યાએ જ નિકાલ કરવા સખત સૂચના આપી છે. જાહેર સ્થળોએ આ પ્રકારના કચરાનો બેદરકારીપૂર્વક નિકાલ કરવાથી જાહેર આરોગ્ય અને પર્યાવરણને ગંભીર જોખમ થઈ શકે છે. આ કાર્યવાહી દ્વારા તંત્ર બાયોમેડિકલ વેસ્ટના જવાબદાર વ્યવસ્થાપન પ્રત્યે પોતાની પ્રતિબદ્ધતા દર્શાવી રહ્યું છે.

ચોમાસું ગયું, ઠંડીના બદલે ગરમીનો કહેર! આખરે ઓક્ટોબરમાં કેમ પડી રહી છે આટલી ગરમી? – વાંચો