ડાંગ : ગુજરાતના ચેરાપુંજી તરીકે ઓળખાતા સાપુતારામાં ચોમાસા દરમિયાન કુદરત નયનરમ્ય દ્રશ્યોનું સર્જન કરે છે. આ સમયગાળા દરમિયાન મોટી સંખ્યામાં પ્રવાસીઓ પણ ડાંગ પહોંચતા હોય છે. ચોમાસા દરમિયાન અહીં કોઈ અનિચ્છનીય ઘટના ન બને તે માટે તંત્ર દ્વારા અહીં “નો સેલ્ફી ઝોન” જાહેર કરાયા છે.
ચોમાસાની શરૂઆત પહેલા ડાંગ જિલ્લા કલેકટરનું જાહેરનામું બહાર પાડ્યું છે. ચોમાસામાં નદી નાળા, ચેકડેમ, ધોધ જેવા સ્થળોએ કોઈ પ્રવૃતિ ન કરવા સૂચના આપવામાં આવી છે. સહેલાણીઓને નદી, નાળા, ધોધ જેવા સ્થળે જોખમી રીતે વાહનો પાર્ક કરવા અને સેલ્ફિ લેવા પર પ્રતિબંધ ફરમાવાયો છે.
જાહેરનામાના ઉલ્લંઘન કરનાર ભારતીય દંડ સંહિતાની કલમ 188 મુજબ કાર્યવાહી કરવા પણ તંત્ર તરફથી ચીમકી આપવામાં આવી છે. નોંધનીય છે કે જાહેરનામું 5 ઓગસ્ટ 2023 સુધી અમલમાં છે. નદી સરોવર અને ડેમ ઉપર થતા અકસ્માતને ટાળવા આગોતરું આયોજન હાથ ધરવામાં આવ્યું છે.