Rain News : અડધી રાત્રે અમદાવાદમાં વરસાદની તોફાની બેટિંગ, અનેક વિસ્તારોમાં ઘૂંટણસમા પાણી ભરાયા, જુઓ Video

અમદાવાદમાં અડધી રાત્રે શહેરમાં વરસાદે તોફાની બેટિંગ કરી છે. અમદાવાદમાં ગાજવીજ અને પવના સાથે ધોધમાર વરસાદ તૂટી પડ્યો હતો. જેમાં સૌથી વધારે વિરાટનગરમાં 4 ઈંચ વરસાદ ખાબક્યો છે. જ્યારે ઓઢવ અને રામોલમાં 3.8 ઈંચ વરસાદ નોંધાયો છે. નિકોલમાં 3.7 ઈંચ વરસાદ વરસ્યો છે. તેમજ કઠવાડામાં 3.5 ઈંચ વરસાદ વરસ્યો છે. ધોધમાર વરસાદથી નીચાણવાળા વિસ્તારોમાં જળબંબાકારની સ્થિતિ સર્જાઈ છે. મીઠાખળી અને અખબારનગર અંડર પાસ બંધ કરાયા હતા.

અનેક વિસ્તારોમાં બે ફૂટ સુધી પાણી ભરાયા

ગઈકાલે સમગ્ર દિવસ શાંત રહ્યા બાદ મોડી રાત્રે અમદાવાદમાં વરસાદે ધબધબાટી બોલાવી હતી. શહેરમાં સરેરાશ 2.5 ઈંચ વરસાદ ખાબક્યો હતો. વીજળીના જોરદાર કડાકા-ભડાકા સાથે વરસાદ તૂટી પડ્યો હતો. વીજળીના અવાજોથી ભયનો માહોલ સર્જાયો હતો. અનેક વિસ્તારોમાં બે ફૂટ સુધી પાણી ભરાતા લોકોએ હાલાકીનો સામનો કરવો પડ્યો હતો.

અમદાવાદમાં વરસ્યો ધોધમાર વરસાદ

ધોધમાર વરસાદથી અનેક વિસ્તારો પાણી-પાણી થયા છે. બોપલના સ્ટર્લિંગ સિટીમાં એકથી બે ફૂટ સુધી પાણી ભરાયા.ભારે વરસાદથી રેલવેના પરીક્ષાર્થીઓ હેરાન થયા. સ્ટર્લિંગ સિટીમાં આવેલી શાળામાં પરીક્ષા કેન્દ્ર છે. પરીક્ષા કેન્દ્ર પહોંચવામાં ઉમેદવારને હાલાકી થઇ રહી છે.