રાજકોટ વીડિયો: આશા ફૂડ નામના એકમમાં આરોગ્ય વિભાગના દરોડા, 5,200 કિલો અખાદ્ય જથ્થો જપ્ત કર્યો
રાજકોટમાં આશા ફૂડ નામના એકમમાંથી આરોગ્ય વિભાગે 5,200 કિલો જેટલા દાબેલા ચણા, સાદા ચણા અને મગનો જથ્થો જપ્ત કર્યો છે. તો દાઝેલુ તેલ,ટેસ્ટિ મસાલા સહિત અન્ય ચીજવસ્તુઓના સેમ્પલ ટેસ્ટિંગ માટે પણ મોકલવામાં આવ્યા છે.
રાજકોટ આરોગ્ય વિભાગની કાર્યવાહીમાં સૌથી મોટો ખુલાસો થયો છે. બાતમીના આધારે શહેરની દિનદયાળ ઈન્ડસ્ટ્રીઝ વિસ્તારમાં પાડવામાં આવેલા દરોડામાં મોટાપાયે લોલમલોલ સામે આવી છે. આશા ફૂડ નામના એકમમાંથી આરોગ્ય વિભાગે 5,200 કિલો જેટલા દાબેલા ચણા, સાદા ચણા અને મગનો જથ્થો જપ્ત કર્યો છે. તો દાઝેલુ તેલ,ટેસ્ટી મસાલા સહિત અન્ય ચીજવસ્તુઓના સેમ્પલ ટેસ્ટિંગ માટે પણ મોકલવામાં આવ્યા છે. ઉલ્લેખનીય છે કે જ્યારે અધિકારીઓ એકમ પર પહોંચ્યા ત્યારે મોટાપાયે અનહાઇજેનિક કન્ડિશન જોવા મળી હતી.
મહત્વપૂર્ણ છે કે સંચાલકો દ્વારા ચણાને ચટપટા અને સ્વાદિષ્ટ બનાવવા માટે બોરિક એસિડ એટલે કે શંખ જીરૂનો ઉપયોગ કરતા હતા. આરોગ્ય અધિકારીની માનીએ તો શંખજીરૂ એટલે કે બોરિક એસિડ આરોગ્ય માટે હાનિકારક છે. શંખ જીરૂ ખાવાથી મ્હો અને આંતરડામાં ચાંદા પડી શકે છે, લાંબાગાળે અલ્સરની પણ બીમારી થવાની શક્યતા છે.
જોકે TV9ની ટીમ સમક્ષ આવેલા આશા ફૂડના સંચાલકે સૌથી મોટો ખુલાસો કર્યો છે. સંચાલકે દાવો કર્યો કે એકમમાં દૈનિક 1200 કિલો ચણાનું ઉત્પાદન કરાતું હતુ અને રાજકોટ સહિત ગુજરાતભરમાં તેની સપ્લાય થતી હતી. શંખ જીરૂ ચણા સ્વાદિષ્ટ લાગે તે માટે વપરાતુ હોવાનો પણ સંચાલકે દાવો કર્યો છે.
