Gujarati video: રાજકોટ ગ્રામ્યમાં ગોંડલ, વીરપુર સહિત અનેક સ્થળોએ માવઠું

હવામાન વિભાગની માવઠાની આગાહી વચ્ચે આજે કચ્છ , રાજકોટ ગ્રામ્યના ગોંડલ, યાત્રાધામ વીરપુર સહિત દેવચડી, બાંદ્રા, કંટોલીયા, ગોંડલ, શિવરાજગઢમાં વરસાદ પડ્યો હતો અને ગોંડલમાં વરસાદ થતા યાર્ડમાં ખુલ્લામાં પડેલી જણસી પાણીમાં ગરકાવ થઈ હતી . યાર્ડમાં રહેલો ઘઉં, ચણા, ડુંગળી સહિતનો માલ પલળી ગયો હતો.

વીરપુરમાં વાતાવરણમાં પલટો આવતા ગાજવીજ અને પવન સાથે વરસાદ ખાબક્યો હતો

ફરીથી માવઠાની આગાહી

રાજ્યમાં ફરી એકવાર ત્રણ દિવસ માવઠાની આગાહી કરવામાં આવી છે. આવતીકાલથી ત્રણ દિવસ મધ્યમથી હળવા વરસાદ વરસી શકે તેવી શક્યતા છે. સૌરાષ્ટ્ર, કચ્છ, દક્ષિણ અને ઉત્તર ગુજરાતમાં મધ્યમથી હળવો વરસાદ પડી શકે છે. વધુ એક વેસ્ટર્ન ડિસ્ટર્બન્સ સર્જાતા ગુજરાતના કેટલાક વિસ્તારોમાં 5,6 અને 7 એપ્રિલે કમોસમી વરસાદ ખાબકી શકે છે.

કમોસમી વરસાદ થતાં પાકને નુકસાન થવાની ભીતિ

તો આ તરફ બોટાદ જિલ્લામાં ભારે પવન અને કડાકા સાથે કમોસમી વરસાદ ખાબક્યો હતો. સમગ્ર જિલ્લામાં વહેલી સવારથી જ વાદળછાયું વાતાવરણ છવાયું હતું અને સાંજના સમયે અચાનક ભારે પવન અને વીજળીના કડાકા સાથે વરસાદ ખાબક્યો હતો. ઉનાળા પહેલા જ બોટાદમાં ચોમાસા જેવો માહોલ છવાયો ગયો હતો. તો બીજી તરફ કમોસમી વરસાદ થતાં પાકને નુકસાન થવાની ભીતિ છે.

ભરૂચ, નર્મદા અને તાપી સહિતના વિસ્તારોમાં પણ હળવાથી મધ્યમ વરસાદની આગાહી

ગુજરાતના જિલ્લાની વાત કરીએ તો, કચ્છ, મોરબી, સુરેન્દ્રનગર, દ્વારકા, રાજકોટ અને જામનગરમાં ત્રણ દિવસ વરસાદી માહોલ રહેશે. તો બનાસકાંઠા, સાબરકાંઠા, અરવલ્લી અને મહીસાગરમાં પણ માવઠું પડી શકે છે. જ્યારે ભરૂચ, નર્મદા અને તાપી સહિતના વિસ્તારોમાં પણ હળવાથી મધ્યમ વરસાદ રહી શકે છે.

ગુજરાતના તમામ સમાચાર અને બ્રેકિંગ ન્યૂઝ ગુજરાતીમાં વાંચો tv9gujarati.com પર

ગુજરાતના તમામ જિલ્લાના સમાચાર વાંચવા માટે જોડાયેલા રહો…