જુનાગઢના મોટા ધણેજમાં આયુર્વેદના દેવતા ભગવાન ધન્વંતરિનું સમાધિ સ્થળ આવેલુ હોવાની પૌરાણિક માન્યતા- જુઓ Video
ધનતેરસના પાવન પર્વે જુનાગઢના મોટા ધણેજમાં સ્થિત વિશ્વના એકમાત્ર ભગવાન ધન્વંતરિ આશ્રમની મુલાકાત લઈએ. 5000 વર્ષ જૂની માન્યતાઓ સાથે જોડાયેલું આ સ્થળ સમુદ્રમંથન બાદ ભગવાન ધન્વંતરિનું સમાધિ સ્થાન મનાય છે.
ધનતેરસના પવિત્ર અવસરે જુનાગઢ જિલ્લાના માળિયા હાટીના તાલુકાના મોટા ધણેજ ગામ ખાતે આવેલા ભગવાન ધન્વંતરીના આશ્રમનું વિશેષ મહત્વ છે. સ્થાનિક માન્યતા મુજબ, આશ્રમ ભગવાન ધન્વંતરિનું સમાધિ સ્થળ છે અને વિશ્વમાં તેમનો એકમાત્ર આશ્રમ અહીં આવેલો છે. ધનતેરસના દિવસે અહીં વિશેષ પૂજન અને યજ્ઞનું આયોજન કરવામાં આવે છે, કારણ કે આ દિવસને આયુર્વેદના દેવતા ભગવાન ધન્વંતરિના પૂજન માટે પવિત્ર માનવામાં આવે છે.
જુનાગઢથી આશરે 60 કિલોમીટર દૂર, વ્રજમી નદીના કિનારે અને ગાઢ જંગલની વચ્ચે આવેલા આ આશ્રમ સાથે 5000 વર્ષ જૂની પૌરાણિક માન્યતાઓ જોડાયેલી છે. સમુદ્રમંથન બાદ ભગવાન ધન્વંતરિ અહીં પધાર્યા હોવાનું મનાય છે. આ સ્થળની એક અનોખી વિશેષતા અહીં આવેલું રહસ્યમય સફેદ વડનું વૃક્ષ છે. આ ઉપરાંત, આશ્રમ અને નદીના કિનારે અનેક દુર્લભ ઔષધીય વનસ્પતિઓ આવેલી હોવાનું સ્થાનિકો જણાવે છે, જેના કારણે આયુર્વેદના અભ્યાસ માટે ડૉક્ટરો પણ અહીં મુલાકાત લે છે. આશ્રમમાં આવેલું શિવમંદિર પણ પશ્ચિમ દિશામાં મુખ હોવાને કારણે વિશેષ છે.
દર વર્ષે, હજારો શ્રદ્ધાળુઓ ભગવાન ધન્વંતરિના દર્શન કરવા, પોતાની માનતા પૂર્ણ કરવા અને આરોગ્ય તથા સમૃદ્ધિના આશીર્વાદ મેળવવા માટે મોટા ધણેજના આ પૌરાણિક સ્થળે ઉમટી પડે છે. આશ્રમ માત્ર એક પૂજા સ્થળ નથી, પરંતુ તે આયુર્વેદના પ્રાચીન જ્ઞાન અને ગુજરાતના સમૃદ્ધ પૌરાણિક વારસાનું જીવંત પ્રતીક છે. તે ખરેખર એક રહસ્યમય અને આધ્યાત્મિક કેન્દ્ર છે જે આરોગ્ય અને શ્રદ્ધાનો સમન્વય છે.
સનાતન સંસ્કૃતિમાં ધનતેરસના તહેવાર સાથે જોડાયેલી પૌરાણિક માન્યતાઓ અને તેની સાથે જોડાયેલી અમર કથાઓ વિશે જાણો
