Breaking News: ચોમાસાનો સત્તાવાર રીતે કેરલમમાં પ્રવેશ, ગુજરાતમાં જલદી જ થશે આગમન

ગરમી અને ઉકળાટથી પરેશાન દેશવાસીઓ માટે રાહતના સમાચાર સામે આવ્યા છે. દેશના દક્ષિણ ભાગમાં ચોમાસાએ વિધિવત દસ્તક આપી દીધી છે. કેરલમના દરિયાકાંઠે દક્ષિણ-પશ્ચિમ ચોમાસાના આગમનની સત્તાવાર જાહેરાત કરવામાં આવી છે, જેના સાથે જ દેશમાં વરસાદી સિઝનની શરૂઆત થઈ ગઈ છે. હવામાન વિભાગે આગામી દિવસોમાં કેરલમ સહિત દક્ષિણ ભારતના અનેક વિસ્તારોમાં ભારે વરસાદની આગાહી કરી છે.

સમુદ્ર કિનારે ઊંચા મોજા ઉછળશે

ભારે વરસાદને ધ્યાનમાં રાખીને તંત્ર દ્વારા એલર્ટ જાહેર કરવામાં આવ્યું છે અને લોકોને જરૂરી સાવચેતી રાખવા સૂચના આપવામાં આવી છે. દરિયાકાંઠાના વિસ્તારોમાં સમુદ્ર ઉછાળાભર્યો રહેવાની શક્યતા હોવાથી માછીમારોને આગામી બે દિવસ સુધી દરિયામાં ન જવા સલાહ આપવામાં આવી છે.

ચોમાસાના આગમન અંગેના આ છે માપદંડ

ચોમાસાના આગમનની સત્તાવાર જાહેરાત માટે હવામાન વિભાગ ચોક્કસ વૈજ્ઞાનિક માપદંડોને આધારે નિર્ણય લે છે. તેમાં મુખ્યત્વે ત્રણ મહત્વના પરિબળોને ધ્યાનમાં લેવામાં આવે છે. પ્રથમ માપદંડ મુજબ 10 મે પછી કેરલમ અને લક્ષદ્વીપ વિસ્તારમાં આવેલા કુલ 14 હવામાન મથકોમાંથી ઓછામાં ઓછા 60 ટકા મથકો પર જરૂરી માત્રામાં વરસાદ નોંધાવવો જરૂરી હોય છે.

બીજો માપદંડ એ છે કે આ વિસ્તારોમાં સતત બે દિવસ સુધી સરેરાશ 2.5 મિલીમીટર કે તેથી વધુ વરસાદ નોંધાવવો જોઈએ. ત્રીજો અને મહત્વપૂર્ણ માપદંડ પવનની સ્થિતિ સાથે જોડાયેલો છે. કેરલમના દરિયાકાંઠેથી લગભગ 4.5 કિલોમીટર ઊંચાઈ સુધી પશ્ચિમી પવનો મજબૂત હોવા જોઈએ અને તેમની ઝડપ 28થી 37 કિલોમીટર પ્રતિ કલાક વચ્ચે હોવી જરૂરી છે.

ચોમાસાના આગમનથી ખેડૂતોમાં ખુશીનો માહોલ

આ તમામ માપદંડો પૂર્ણ થતાં હવામાન વિભાગ ચોમાસાના આગમનની સત્તાવાર જાહેરાત કરે છે. કેરલમમાં ચોમાસાના પ્રવેશ બાદ સામાન્ય રીતે આગામી દિવસોમાં તે કર્ણાટક, ગોવા, મહારાષ્ટ્ર અને ત્યારબાદ ગુજરાત સહિત દેશના અન્ય ભાગોમાં આગળ વધે છે. ચોમાસાના આગમનથી ખેડૂતોમાં ખુશીનો માહોલ જોવા મળી રહ્યો છે, કારણ કે ખેતી માટે વરસાદ અત્યંત મહત્વનો માનવામાં આવે છે. બીજી તરફ દેશના અનેક રાજ્યોમાં ગરમીથી રાહત મળવાની પણ આશા વ્યક્ત કરવામાં આવી રહી છે.

આ પણ વાંચો- Breaking News : દેવભૂમિ દ્વારકા જિલ્લામાં જગતના તાત સાથે છેતરપિંડી આચરતું મોટું કૌભાંડ ઝડપાયું, જુઓ Video