ગુરુ ગોવિંદ યુનિવર્સિટીમાં B.Com સેમ-4ની પરીક્ષામાં પૂછાયા સેમ-2ના પ્રશ્નો, વિદ્યાર્થીઓ અટવાયા – જુઓ Video

પંચમહાલ જિલ્લાની ગુરુ ગોવિંદ યુનિવર્સિટી દ્વારા લેવામાં આવતી પરીક્ષામાં એક ગંભીર ભૂલ સામે આવી છે. કાલોલની “એમ.એમ. ગાંધી આર્ટસ એન્ડ કોમર્સ કોલેજ”માં યોજાયેલી પરીક્ષા દરમિયાન આ છબરડો જોવા મળ્યો હતો.

મળતી માહિતી મુજબ, અહીં B.Com સેમિસ્ટર 4 ની પરીક્ષામાં બિઝનેસ મેનેજમેન્ટ વિષયનું પેપર લેવામાં આવી રહ્યું હતું. જો કે, આ પ્રશ્નપત્રમાં સેમિસ્ટર 4 ને બદલે સેમિસ્ટર 2 ના પ્રશ્નો પૂછવામાં આવતા વિદ્યાર્થીઓ ગૂંચવણમાં મુકાયા હતા. આ ભૂલ અંગે વિદ્યાર્થીઓએ તાત્કાલિક સુપરવાઈઝરનું ધ્યાન દોર્યું હતું, જે બાદ યુનિવર્સિટીના સંચાલકોને જાણ કરવામાં આવી હતી.

આ ઘટના બાદ યુનિવર્સિટી દ્વારા નવું પ્રશ્નપત્ર મોકલવામાં આવ્યું હતું અને વિદ્યાર્થીઓને પરીક્ષા પૂર્ણ કરવા માટે અલગથી વધારાનો સમય પણ ફાળવવામાં આવ્યો હતો. નોંધનીય છે કે, કોલેજ તંત્ર દ્વારા આ ઘટનાને છબરડો માનવાનો ઇનકાર કરવામાં આવ્યો છે અને તેને માત્ર એક ‘પ્રિન્ટિંગ મિસ્ટેક’ ગણાવવામાં આવી છે. આ ઘટનાને કારણે પરીક્ષા વ્યવસ્થાની વિશ્વસનીયતા પર સવાલો ઊભા થયા છે. વિદ્યાર્થીઓએ પણ આ પ્રકારની ભૂલો ફરી ન થાય તે માટે યોગ્ય આયોજન અને ચકાસણીની માગણી કરી છે.

આ પણ વાંચો: જૈન મુની સાગરચંદ્ર સામે અવાજ ઉઠાવનાર પીડિત મહિલાઓને ‘જાનથી મારી નાખવાની ધમકી’, શું પોલીસ હજુ પણ તમાશો જોશે?