Breaking News: સિવિલ હોસ્પિટલમાં 17 દિવસનો ‘કાળો ખેલ’… લીકર પરમિટના 1.80 લાખ સગેવગે કરનારા 3 કર્મચારીઓ ઝડપાયા – જુઓ Video
અમદાવાદની 1200 બેડ સિવિલ હોસ્પિટલમાં એક મોટું કૌભાંડ બહાર આવ્યું છે, જેમાં હોસ્પિટલના જ જવાબદાર કર્મચારીઓએ લીકર પરમિટના પૈસા બારોબાર સગેવગે કરી નાખ્યા છે.
અમદાવાદ શહેરની 1200 બેડ સિવિલ હોસ્પિટલના કર્મચારીઓ દ્વારા ભ્રષ્ટાચાર આચરવામાં આવ્યો હોવાની વિગતો સામે આવતા ચકચાર મચી ગઈ છે. હોસ્પિટલના 3 કર્મચારીઓ સામે લીકર પરમિટના પૈસા બારોબાર સગેવગે કરવા બદલ શાહીબાગ પોલીસ સ્ટેશનમાં સત્તાવાર ફરિયાદ નોંધાવવામાં આવી છે.
શાહીબાગ પોલીસ દ્વારા 1200 બેડ સિવિલ હોસ્પિટલના કેશિયર સહિત કુલ ૩ કર્મચારીઓ કરસનસિંહ વાઘેલા, નવીનચંદ્ર વાઘેલા અને વસંત નિનામા વિરુદ્ધ ગુનો દાખલ કરવામાં આવ્યો છે.
મળતી વિગતો અનુસાર, 1 માર્ચથી 17 માર્ચ સુધીના સમયગાળા દરમિયાન કુલ 9 લીકર પરમિટ માટેના નાણાં પચાવી પાડવામાં આવ્યા હોવાનો આરોપ છે. આ કર્મચારીઓએ અંદાજે 1 લાખ 80 હજાર રૂપિયાની રકમ બારોબાર પડાવી લીધી હોવાનું ફરિયાદમાં જણાવાયું છે.
આ ગંભીર બેદરકારી અને ભ્રષ્ટાચારના મામલાને પગલે સિવિલ હોસ્પિટલ તંત્ર પણ હરકતમાં આવ્યું છે. આ સમગ્ર ઘટનાની ઊંડાણપૂર્વક તપાસ કરવા માટે સિવિલ હોસ્પિટલ દ્વારા 5 સભ્યોની તપાસ કમિટીની રચના કરવામાં આવી છે. હાલમાં પોલીસ અને કમિટી બંને આ દિશામાં વધુ તપાસ ચલાવી રહ્યા છે.
