Ahmedabad Breaking News : નવરાત્રી દરમિયાન પોલીસનું સઘન ચેકિંગ, નશાખોરો અને રોમિયોગીરી કરનારાઓ સામે કડક કાર્યવાહી ! જુઓ Video
નવરાત્રી દરમિયાન અમદાવાદમાં મહિલાઓની સુરક્ષા અને ટ્રાફિક વ્યવસ્થા જાળવવા પોલીસ સક્રિય બની છે. શહેર પોલીસ, ટ્રાફિક પોલીસ અને SOG દ્વારા સંયુક્ત ચેકિંગ હાથ ધરી નશાકારક પદાર્થોનું સેવન કરનારાઓ તેમજ રોમિયોગીરી કરતા લોકો સામે કડક કાર્યવાહી કરવાની તૈયારી કરવામાં આવી છે.
નવરાત્રી દરમિયાન ખેલૈયાઓની સુરક્ષા અને શહેરમાં શાંતિપૂર્ણ માહોલ જળવાઈ રહે તે માટે અમદાવાદ શહેર પોલીસ એક્શન મોડમાં આવી છે. અસામાજિક તત્ત્વો પર નજર રાખવા તેમજ નશાકારક પદાર્થોનું સેવન કરીને બહાર નીકળતા લોકો સામે કાર્યવાહી કરવા માટે પોલીસ દ્વારા ખાસ ચેકિંગ હાથ ધરવામાં આવ્યું છે.
આ કામગીરીમાં ટ્રાફિક પોલીસ, શહેર પોલીસ અને સ્પેશિયલ ઓપરેશન ગ્રુપ (SOG)ની ટીમોએ સંયુક્ત રીતે ભાગ લીધો હતો. તપાસ દરમિયાન શંકાસ્પદ વ્યક્તિઓનું બ્રેથ એનાલાઇઝર દ્વારા પરીક્ષણ કરવામાં આવ્યું હતું. આ ઉપરાંત, જરૂરી તપાસ માટે લાળના નમૂના પણ લેવામાં આવ્યા હતા.
મહિલાઓની સુરક્ષાને પ્રાથમિકતા
નવરાત્રી દરમિયાન ખાસ કરીને મહિલાઓની સુરક્ષાને પ્રાથમિકતા આપવામાં આવી રહી છે. ગરબાનાં સ્થળો અને અન્ય જાહેર વિસ્તારોમાં છેડતી કે રોમિયોગીરી જેવી પ્રવૃત્તિઓ કરતા લોકો પર પોલીસ નજર રાખી રહી છે. આવી કોઈ પ્રવૃત્તિ ધ્યાનમાં આવે તો સંબંધિત વ્યક્તિને અટકાવી પૂછપરછ કરવામાં આવશે. જરૂર જણાય તો અટકાયત સહિતની કાયદેસરની કાર્યવાહી પણ કરવામાં આવશે.
બીજી તરફ, ગરબા સ્થળોની આસપાસ ટ્રાફિકની સમસ્યા ન સર્જાય તે માટે પણ આયોજન કરવામાં આવ્યું છે. ખેલૈયાઓને અવરજવરમાં મુશ્કેલી ન પડે અને વાહનવ્યવહાર સરળ રહે તે માટે પોલીસ દ્વારા વિવિધ સ્થળોએ ટ્રાફિક વ્યવસ્થાનું સંચાલન કરવામાં આવી રહ્યું છે.
