સપનામાં આવી દુશ્મનની બાતમી આપતા શહીદ ! દેશના આ વીર સપૂતની કહાની છે રસપ્રદ

આપણા દેશના સૈનિકો હંમેશા દુશ્મનોથી દેશની રક્ષા કરે છે, પરંતુ શું તમે એક એવા સૈનિક વિશે જાણો છો જેના માટે દેશનો જુસ્સો એવો છે કે, શહીદ થયાના વર્ષો પછી પણ દેશની રક્ષા કરી રહ્યા છે. તમને આ સાંભળીને અજીબ લાગશે, પરંતુ હરભજન સિંહ આજે પણ સિક્કિમ બોર્ડર પર દેશની રક્ષા કરી રહ્યા છે. એટલું જ નહીં, આ સરહદ પર તેમનું મંદિર પણ આવેલું છે. હરભજન સિંહનો ડર એટલો છે કે દુશ્મનો પણ તેમના નામથી ડરે છે. તમને જાણીને નવાઈ લાગશે, પરંતુ સૈનિકોનું માનવું છે કે હરભજન સૈનિકોને ચીન દ્વારા ઘડવામાં આવતા ષડયંત્ર વિશે અગાઉથી જાણ કરે છે.

સિક્કિમ બોર્ડર પર તૈનાત સૈનિકોનું કહેવું છે કે મૃત્યુ પછી પણ બાબા સરહદ પર પોતાની ફરજ નિભાવે છે. આ માટે બાબા હરભજન સિંહને યોગ્ય પગાર પણ આપવામાં આવે છે. મંદિરમાં બાબાનો એક ઓરડો પણ છે, જેમાં દરરોજ પલંગ સાફ કરવામાં આવે છે. બાબાનો આર્મી યુનિફોર્મ અને શૂઝ એ જ રૂમમાં રાખવામાં આવ્યા છે. 2006માં તેમને ઓફિશિયલી નિવૃત્ત કરવામાં આવ્યા હતા.

સેનામાં જોડાયાના 2 વર્ષ બાદ જ તેઓ શહીદ થયા હતા. બે દિવસની સઘન શોધખોળ બાદ પણ તેમનો મૃતદેહ મળ્યો ન હતો. આ પછી હરભજન સિંહ એક સૈનિકના સપનામાં આવ્યા અને તેમનો મૃતદેહ ક્યાં છે, તે જણાવ્યું. જ્યારે તે સૈનિક બીજા દિવસે અન્ય સૈનિકો સાથે તે જ જગ્યાએ ગયો ત્યારે તેમને હરભજન સિંહનો મૃતદેહ મળ્યો. ત્યારથી બાબા હરભજન સિંહના બંકરને મંદિરમાં ફેરવી દેવામાં આવ્યું હતું.