AI નો કમાલ: હવે IRCTC પર જાતે જ સર્ચ કરશે ટ્રેન અને ભરશે પેસેન્જર ફોર્મ, જાણો કેવી રીતે થયો આ અદભુત પ્રયોગ

IRCTC પર ટિકિટ બુક કરવાનું કામ હવે AI એ સાવ સરળ બનાવી દીધું છે. એક કન્ટેન્ટ ક્રિએટરે OpenAI ના નવા GPT-6 Astra મોડલની મદદથી માત્ર એક નાના વોઇસ કમાન્ડ દ્વારા ટ્રેન સર્ચ કરવાથી લઈને પેસેન્જર ફોર્મ ભરવા સુધીનું બધું જ કામ AI પાસે ઓટોમેટિક કરાવી દીધું, જેમાં તેણે ફક્ત પેમેન્ટ જ કરવાનું બાકી રહ્યું હતું.

Sachin Agrawal | Updated on: Sep 15, 2026 | 8:36 PM

AI (આર્ટિફિશિયલ ઇન્ટેલિજન્સ) કેટલું કામમાં આવી શકે છે તેનું તાજેતરનું અને જબરદસ્ત ઉદાહરણ એક કન્ટેન્ટ ક્રિએટરે પૂરું પાડ્યું છે. એક યુવકે વીડિયો શેર કરીને જણાવ્યું કે કેવી રીતે તેણે AI ની મદદથી IRCTC પર ટિકિટ બુક કરાવી લીધી. આખી પ્રક્રિયામાં યુવકે કોઈ લાંબો કે અઘરો પ્રોમ્પ્ટ લખવો પડ્યો ન હતો અને પેમેન્ટ કરવા પહેલાંનું તમામ કામ AI એ જાતે જ પતાવી દીધું હતું.

IRCTC પર ટિકિટ બુક કરાવવી એ કોઈ કસોટીથી કમ નથી. ભારે ટ્રાફિક, કેપ્ચા (Captcha) અને અટપટા સ્ટેપ્સને કારણે ઘણા લોકો જાતે ટિકિટ બુક કરવાનું ટાળે છે. પરંતુ, જો આ જ કામ AI કરી આપે તો કેવું રહે? હકીકતમાં, OpenAI દ્વારા તાજેતરમાં લોન્ચ કરવામાં આવેલા નવા એડવાન્સ મોડલ GPT-6 Astra નો ઉપયોગ કરીને લોકો ઓનલાઇન અનોખા પ્રયોગો કરી રહ્યા છે. આવામાં એક કન્ટેન્ટ ક્રિએટરે એક નાના વોઇસ-ટેક્સ્ટ પ્રોમ્પ્ટ દ્વારા AI પાસે IRCTC પર ટિકિટ સર્ચ કરવાનું, ટ્રેન પસંદ કરવાનું અને પેસેન્જર ફોર્મ ભરવા જેવું બધું જ કામ ઓટોમેટિક રીતે કરાવી લીધું.

એક કમેન્ટથી શરૂ થયો પ્રયોગ

GPT-6 Astra દ્વારા IRCTC પર ટિકિટ બુક કરાવનાર આ શખ્સે અગાઉ AI ના ફીચર્સ અંગે એક રીલ પોસ્ટ કરી હતી. તેના પર એક યુઝરે કમેન્ટ કરીને પૂછ્યું હતું કે, “શું આ નવું AI ભારતના IRCTC પ્લેટફોર્મ પર ટિકિટ બુક કરી શકે છે?” શરૂઆતમાં ક્રિએટરને પોતાને પણ આ અંગે શંકા હતી કારણ કે IRCTC એક સરકારી અને કડક સિક્યુરિટી ધરાવતી વેબસાઇટ છે. તેમ છતાં, તેણે આ ચકાસવા માટે એક પ્રયોગ કરવાનું નક્કી કર્યું.

AI એ એક સાદા પ્રોમ્પ્ટથી જ કરી દીધું કામ

આશ્ચર્યની વાત એ રહી કે ChatGPT Astra એ IRCTC પર ટિકિટ બુક કરવાનું કામ માત્ર એક સાદા પ્રોમ્પ્ટ (આદેશ) થી જ કરી દીધું. કન્ટેન્ટ ક્રિએટરે પોતાના સિસ્ટમમાં ChatGPT Astra ઓપન કર્યું અને બ્રાઉઝર ટૂલનો ઉપયોગ કરતા એક સાદો આદેશ આપ્યો: “મારે 20 સપ્ટેમ્બરે રાત્રે 9 થી 11 વાગ્યાની વચ્ચે મુંબઈથી રાજકોટ માટે AC ક્લાસમાં 2 લોકોની ટ્રેન ટિકિટ બુક કરવી છે. બ્રાઉઝરનો ઉપયોગ કરો.”

AI એ સંભાળ્યો મોરચો

આદેશ મળ્યા બાદ AI એ પોતાના બ્રાઉઝિંગ ફીચર દ્વારા IRCTC પોર્ટલ નેવિગેટ કરવાનું શરૂ કર્યું.

AI એ સૌથી પહેલાં બોર્ડિંગ અને ડેસ્ટિનેશન સ્ટેશન (જ્યાંથી બેસવાનું છે અને જ્યાં જવાનું છે તે) પસંદ કર્યા.
ત્યારપછી નક્કી કરેલી તારીખ અને સમય મુજબ ચાલતી તમામ ટ્રેનોનું લિસ્ટ કાઢ્યું.
ત્યારબાદ AC ક્લાસના તમામ કોચમાં સીટની ઉપલબ્ધતા (Availability) ચેક કરી.
આ કામ કરતી વખતે AI ને ખબર પડી કે તે તારીખ અને સમય માટે તમામ સીટો વેઇટિંગ લિસ્ટમાં હતી.
AI એ ક્રિએટરને આ અંગે જાણ કરી અને પૂછ્યું કે આગળ શું કરવું છે.
ત્યારબાદ ક્રિએટરે બીજા દિવસની ટિકિટ બુક કરવાનું કહ્યું, જેના પર AI એ તરત જ બીજા દિવસની ટ્રેન સર્ચ કરીને પેસેન્જર ફોર્મ ભરી દીધું.
ક્રિએટરે જણાવ્યું કે AI પાસે આ બધું જ કામ કરાવ્યા બાદ તેણે માત્ર પેમેન્ટ જ કરવાનું બાકી હતું.

હવે તત્કાલ ટિકિટ માટે શરૂ થઈ ચર્ચા

AI દ્વારા IRCTC પર ટિકિટ બુક કરવાનો વીડિયો વાયરલ થયા બાદ હવે એ ચર્ચાએ જોર પકડ્યું છે કે શું AI IRCTC પર તત્કાલ ટિકિટ પણ બુક કરાવી આપી શકે છે? આ ઉપરાંત લોકો એ પણ ચર્ચા કરી રહ્યા છે કે શું AI ભવિષ્યમાં માણસોની નોકરીઓ અને રોજેરોજના ડિજિટલ કામોને સંપૂર્ણપણે બદલી નાખશે?

જ્યારે કેટલાક યુઝર્સે એમ પણ લખ્યું કે આ ટૂલનો ઉપયોગ નોકરીઓ માટે ઓટોમેટિક રિઝ્યૂમે મોકલવા માટે પણ થવો જોઈએ.