Breaking News : ઓનલાઇન શોપિંગ કરતા લોકો માટે મોટા સમાચાર! જાન્યુઆરીથી ફ્રેક ડિસ્કાઉન્ટનો ખેલ ખતમ, ઈ-કોમર્સ કંપનીઓ માટે નવો નિયમ
જાન્યુઆરીથી ઈ-કોમર્સ કંપનીઓ જ્યારે પણ કોઈ પ્રોડક્ટ પર ડિસ્કાઉન્ટ આપશે, ત્યારે તેમણે તેની મૂળ કિંમત અને અગાઉની કિંમત બંને દર્શાવવી પડશે. આ નિયમ તહેવારો દરમિયાન ચાલતા મોટા સેલ પર પણ લાગુ કરવામાં આવશે.
આજના સમયમાં ઓનલાઈન શોપિંગ લોકોના જીવનનો મહત્વનો ભાગ બની ગયું છે. કપડાં, મોબાઈલ, ઇલેક્ટ્રોનિક્સ, ઘરવપરાશની વસ્તુઓથી લઈને કરિયાણા સુધીની અનેક વસ્તુઓ લોકો ઘરે બેઠા ઓર્ડર કરે છે. ખાસ કરીને તહેવારો અને ફેસ્ટિવ સેલ દરમિયાન મોટા ડિસ્કાઉન્ટના દાવા સાથે ગ્રાહકોને આકર્ષવામાં આવે છે. જોકે, કોઈપણ વસ્તુ ખરીદતા પહેલાં અલગ-અલગ વેબસાઇટ પર તેની કિંમતની સરખામણી કરવી, પ્રોડક્ટના રિવ્યૂ વાંચવા અને ડિસ્કાઉન્ટ ખરેખર કેટલો છે તે તપાસવું જરૂરી છે. નવા નિયમોથી ગ્રાહકોને ઓનલાઈન ખરીદી દરમિયાન વધુ પારદર્શિતા મળવાની અપેક્ષા છે.
પ્રોડક્ટની વાસ્તવિક ડિસ્કાઉન્ટ કિંમત અંગે વધુ પારદર્શિતા
જાન્યુઆરીથી ઈ-કોમર્સ કંપનીઓ જ્યારે પણ કોઈ પ્રોડક્ટ પર ડિસ્કાઉન્ટ આપશે, ત્યારે તેમણે તેની મૂળ કિંમત અને અગાઉની કિંમત બંને દર્શાવવી પડશે. આ નિયમ તહેવારો દરમિયાન ચાલતા મોટા સેલ પર પણ લાગુ કરવામાં આવશે. નવા નિયમો અનુસાર પ્રોડક્ટની અગાઉની કિંમત એટલે ડિસ્કાઉન્ટ આપવા પહેલાંના 30 દિવસ દરમિયાન જે સૌથી ઓછી કિંમતે પ્રોડક્ટ વેચાઈ હોય તે કિંમત. આ જોગવાઈનો હેતુ ઓનલાઈન શોપિંગ દરમિયાન ગ્રાહકોને પ્રોડક્ટની વાસ્તવિક ડિસ્કાઉન્ટ કિંમત અંગે વધુ પારદર્શિતા આપવાનો છે.
ઓનલાઈન કિંમતોમાં પારદર્શિતા લાવવાનો હેતું
કન્ઝ્યુમર અફેર્સ વિભાગે ગુરુવારે (10 સપ્ટેમ્બર) કન્ઝ્યુમર પ્રોટેક્શન (ઈ-કોમર્સ) રૂલ્સમાં વ્યાપક સુધારા જાહેર કર્યા છે. નવા નિયમો હેઠળ પ્રોડક્ટની કિંમત ઉપરાંત સ્પોન્સર્ડ લિસ્ટિંગ, સર્ચ રિઝલ્ટમાં હેરફેર અને ડાર્ક પેટર્ન્સ અંગે પણ કડક જોગવાઈ કરવામાં આવી છે. સૂત્રો અનુસાર, આ પગલાનો મુખ્ય હેતુ ઓનલાઈન કિંમતોમાં વધુ પારદર્શિતા લાવવાનો છે. જો ગ્રાહકોને ઈ-કોમર્સ (e-Commerce) પ્લેટફોર્મ પર દર્શાવવામાં આવેલી કિંમતોમાં કોઈ ગેરરીતિ કે વિસંગતતા જોવા મળે તો તેઓ નેશનલ કન્ઝ્યુમર હેલ્પલાઈન (NCH) પર ફરિયાદ કરી શકે છે.
સર્ચ રિઝલ્ટમાં ફેરફાર કરવા પર રોક
નવા નિયમો ઈ-કોમર્સ કંપનીઓને એવી રીતે સર્ચ રિઝલ્ટમાં ફેરફાર કરવા પર પણ રોક લગાવે છે, જેનાથી ગ્રાહકો ગેરમાર્ગે દોરાય અથવા તેમના સર્ચ ક્વેરી સાથે સંબંધિત પરિણામોની પ્રાસંગિકતા અસરગ્રસ્ત થાય. આ ઉપરાંત, સ્પોન્સર્ડ લિસ્ટિંગ પર સ્પષ્ટ અને સરળતાથી દેખાય તેવી માહિતી આપવી ફરજિયાત રહેશે, જેથી ગ્રાહકો પેઈડ પ્રમોશન અને સામાન્ય ઓર્ગેનિક સર્ચ રિઝલ્ટ વચ્ચેનો તફાવત સરળતાથી સમજી શકે.
આ પણ વાંચો, શું તમે પણ Apple Wallet ને જ Apple Pay સમજો છો? જાણો બંનેના અલગ-અલગ કામ અને ઉપયોગ!
