સુરત: ATMમાં ટેકનિકલ ખામી સર્જાતા લોટરી લાગી! યુવકે 10 હજાર માગ્યાને મળ્યા 3 લાખ
નવ વર્ષ, અસંખ્ય ઈમેઈલ અને ફરિયાદોના લાંબા દોર બાદ, બેંક ઓફ બરોડાએ હવે મૂળ રકમ કરતા લગભગ 30 ગણી વધુ રકમ ચૂકવવી પડી.
સુરત: ગુજરાતના સુરતમાં એક એટીએમ (ATM) માંથી માત્ર 10,000 રૂપિયા ઉપાડવાનો એક સામાન્ય પ્રયાસ, તાજેતરના સમયમાં બેંક માટે સૌથી મોંઘી સાબિત થયેલી ‘કેશ-ડિસ્પેન્સિંગ’ ભૂલોમાંની એકમાં ફેરવાઈ ગયો છે. નવ વર્ષ, અસંખ્ય ઈમેઈલ અને ફરિયાદોના લાંબા દોર બાદ, બેંક ઓફ બરોડાએ હવે મૂળ રકમ કરતા લગભગ 30 ગણી વધુ રકમ ચૂકવવી પડી છે.
આ કેસ 18 ફેબ્રુઆરી, 2017નો છે. સુરતના ઉધના વિસ્તારના એક ગ્રાહકે એસબીઆઈ (SBI) ના એટીએમમાંથી 10,000 રૂપિયા ઉપાડવાનો પ્રયાસ કર્યો હતો. તેણે પોતાનું કાર્ડ નાખ્યું અને પિન (PIN) એન્ટર કર્યો, પરંતુ મશીનમાંથી ન તો રોકડ નીકળી કે ન તો તેની કોઈ રિસીપ્ટ પ્રિન્ટ થઈ. થોડા સમય પછી, તેને એક મેસેજ મળ્યો કે તેના ખાતામાંથી 10,000 રૂપિયા ડેબિટ થઈ ગયા છે, જેને જોઈને તે ચોંકી ગયો હતો.
વારંવારની ફરિયાદો, છતાં કોઈ ઉકેલ નહીં
ગ્રાહકે 21 ફેબ્રુઆરીએ બેંક ઓફ બરોડાની ડુંભાલ શાખામાં લેખિત ફરિયાદ નોંધાવી હતી. માર્ચથી મે 2017 દરમિયાન, તેણે ઈમેઈલ દ્વારા અનેકવાર ફોલો-અપ લીધું હતું. તેણે આરબીઆઈ (RBI) અને અન્ય સત્તાધિકારીઓનો પણ સંપર્ક કર્યો હતો. આ ઉપરાંત, સીસીટીવી (CCTV) ફૂટેજ મેળવવા માટે તેણે એસબીઆઈ (SBI) માં આરટીઆઈ (RTI) પણ દાખલ કરી હતી. જોકે, કોઈ પણ સત્તાધિકારી તરફથી તેને સંતોષકારક પ્રતિસાદ મળ્યો ન હતો.
અંતે, 20 ડિસેમ્બર 2017ના રોજ તેણે ગ્રાહક ફોરમનો આશરો લીધો. સુનાવણી દરમિયાન, બેંક ઓફ બરોડાએ દલીલ કરી હતી કે એટીએમ (ATM) સ્ટેટ બેંક ઓફ ઈન્ડિયા (SBI) નું હતું અને તેમના રેકોર્ડમાં ટ્રાન્ઝેક્શન ‘સફળ’ દેખાતું હતું, તેથી બેંક જવાબદાર નથી. જોકે, ગ્રાહક આયોગે (Consumer Commission) આ દલીલને ફગાવી દીધી હતી અને જણાવ્યું હતું કે બેંકે ટ્રાન્ઝેક્શન સંબંધિત નક્કર પુરાવા રજૂ કરવા પડશે.
આયોગે એ પણ નોંધ્યું હતું કે આરબીઆઈ (RBI) ના નિયમો મુજબ, રકમ પાંચ દિવસની અંદર પરત (Refund) કરી દેવી જોઈતી હતી, જે કરવામાં બેંક નિષ્ફળ રહી હતી. તેના અંતિમ આદેશમાં, આયોગે બેંક ઓફ બરોડાને નીચે મુજબના નિર્દેશો આપ્યામૂળ રકમ ₹10,000 વાર્ષિક 9% વ્યાજ સાથે પરત કરવી.વિલંબ (મોડું કરવા) બદલ દરરોજ ₹100 નું વળતર ચૂકવવું. 26 ફેબ્રુઆરી, 2026 સુધીમાં વિલંબ (મોડું) 3,288 દિવસ સુધી પહોંચી ગયો હતો. જેના કારણે વળતરની રકમ વધીને ₹3,28,800 થઈ ગઈ હતી. બેંકને માનસિક સતામણી બદલ ₹3,000 અને કાનૂની ખર્ચ (કોર્ટ ફી વગેરે) પેટે ₹2,000 ચૂકવવાનો પણ આદેશ કરવામાં આવ્યો હતો.
Gold-Silver Rate Today: એક જ દિવસમાં 7000 રુપિયા સસ્તું થયું સોનું, ચાંદી પણ ધડામ, જાણો લેટેસ્ટ ભાવ
