AC ચાલુ કરતા જ થયો જોરદાર ધડાકો, જાણો એસીમાં બ્લાસ્ટ કેમ થાય છે અને કેવી રીતે રહેવું સુરક્ષિત?

ગ્વાલિયરમાં એક હૃદયદ્રાવક ઘટના બની હતી, જેમાં એસી ચાલુ કરતાની સાથે જ તેના કોમ્પ્રેસરમાં મોટો ધડાકો થયો હતો. આ બ્લાસ્ટને કારણે ઘરમાં રાખેલો ગેસ સિલિન્ડર લીક થયો અને જોતજોતામાં ત્રણ માળનું મકાન આગની લપેટમાં આવી ગયું. આ દુર્ઘટનામાં અંકિતા અગ્રવાલ નામની મહિલાનું ધુમાડાના કારણે ગૂંગળામણથી મોત નીપજ્યું હતું.

જ્યારે આ ઘટના બની ત્યારે પરિવારના અન્ય સભ્યો અને બાળકો ફસાયા હતા, જેમને SDRF ની ટીમે બચાવી લીધા હતા. ફાયર બ્રિગેડ, BSF અને આર્મીની ટીમોએ 3 કલાકની ભારે જહેમત બાદ આગ પર કાબૂ મેળવ્યો હતો. આ ઘટના એસીના સુરક્ષિત ઉપયોગ પ્રત્યે લાલબત્તી સમાન છે.

AC માં બ્લાસ્ટ થવાના મુખ્ય કારણો:

નિષ્ણાતોના મતે, કોમ્પ્રેસરની અંદર જ્યારે દબાણ (Pressure) મર્યાદા કરતા વધી જાય ત્યારે બ્લાસ્ટ થાય છે. તેના મુખ્ય કારણો નીચે મુજબ છે:

• ઓવરહીટિંગ: સતત એસી ચલાવવાથી અથવા ગંદા ફિલ્ટર અને કોઈલને કારણે કોમ્પ્રેસર વધુ પડતું ગરમ થઈ જાય છે.
• જાળવણીનો અભાવ: વર્ષમાં બે વાર સર્વિસ ન કરાવવાથી ધૂળ જમા થાય છે, જેનાથી એર ફ્લો બ્લોક થાય છે અને કોમ્પ્રેસર પર લોડ વધે છે.
• વાયરિંગ અને વોલ્ટેજ: જૂનું વાયરિંગ, વોલ્ટેજમાં વધ-ઘટ અથવા ખોટું ઇન્સ્ટોલેશન શોર્ટ સર્કિટ કરી શકે છે.
• ગેસ લીકેજ: એસીમાં વપરાતા R32 અથવા R290 જેવા ગેસ જ્વલનશીલ હોય છે. લીક થવા પર નાનકડો સ્પાર્ક પણ મોટી આગ લગાડી શકે છે.

એસી વાપરતી વખતે આટલી સાવધાની રાખો:

• નિયમિત સર્વિસ: દર 6 મહિને પ્રોફેશનલ ટેકનિશિયન પાસે સર્વિસ કરાવો. કોઈલ અને ફિલ્ટર હંમેશા સાફ રાખો.
• વોલ્ટેજ સ્ટેબિલાઇઝર: વોલ્ટેજની વધ-ઘટથી બચવા માટે હાઈ-ક્વોલિટી સ્ટેબિલાઇઝરનો ઉપયોગ કરો.
• સતત વપરાશ ટાળો: એસીને લાંબા સમય સુધી ચલાવવાને બદલે થોડો વિરામ આપો. તાપમાન 24-26 ડિગ્રી પર સેટ રાખવું હિતાવહ છે.
• ગેસ સિલિન્ડરથી દૂર રાખો: એસી યુનિટની આસપાસ ક્યારેય ગેસ સિલિન્ડર કે જ્વલનશીલ વસ્તુઓ ન રાખો.
• ચેતવણીના સંકેતો: જો એસીમાંથી અજીબ અવાજ આવે, ઓછી કુલિંગ થાય કે બળવાની ગંધ આવે તો તરત જ તેને બંધ કરીને ટેકનિશિયનને બોલાવો.

EV Tips: હવે ઇલેક્ટ્રિક વાહનોમાં આવશે AIનું મગજ! બેટરી પોતે જ જણાવશે ક્યારે અને કેવી રીતે થવું ચાર્જ, વાંચવા માટે અહીં ક્લિક કરો