French Open 2022: હું ફ્રેન્ચ ઓપન ફાઇનલ હારવાનું પસંદ કરીશ, જાણો રાફેલ નડાલે આવું શું કામ કહ્યું

વિશ્વનો પાંચમો ક્રમાંકિત પુરુષ ટેનિસ ખેલાડી સ્પેનના રાફેલ નડાલ (Rafael Nadal) ફ્રેન્ચ ઓપન 2022 (French Open 2022) ની ફાઇનલમાં પહોંચી ગયો છે. 3 જૂનના રોજ યોજાયેલી સેમિ ફાઇનલમાં એલેક્ઝાન્ડર ઝવેરેવ ઇજાગ્રસ્ત થતાં મેચમાંથી ખસી ગયો હતો. ત્યાર બાદ રાફેલ નડાલે ફાઇનલમાં પ્રવેશ કર્યો હતો. ઝવેરેવે જ્યારે સેમિ ફાઇનલ મેચમાંથી ખસી જવાનો નિર્ણય કર્યો ત્યારે નડાલ 7-6, 6-6 થી આગળ હતો. મેચ દરમિયાન ઝવેરેવનો પગનો અંગૂઠો વળી ગયો હતો. જેના કારણે તે ચાલી પણ શકતો ન હતો. નડાલ 30મી વખત કોઈ ગ્રાન્ડ સ્લેમની ફાઇનલમાં પહોંચ્યો છે. ફ્રેન્ચ ઓપન મેન્સ સિંગલ્સની ફાઈનલ 5 જૂને રમાશે. પરંતુ ફાઈનલ પહેલા નડાલે મોટું નિવેદન આપ્યું છે. તેનું કહેવું છે કે તે રવિવારની ફાઈનલ મેચ હારી જવા માંગે છે.

એએફપી (AFP Reports) ના અહેવાલ મુજબ રાફેલ નડાલ (Rafael Nadal) ને ડાબા પગમાં જુની ઈજાના કારણે ઘણો મુશ્કેલ સમય પસાર થયો હતો. રાફેલ નડાલે કહ્યું કે, ‘જો તેને બદલામાં નવો પગ મળે તો તેને ફ્રેન્ચ ઓપનની ફાઇનલમાં હારવાનું પણ ગમશે’. તે તેની ટેનિસ કારકિર્દીમાં 14મી વખત ફ્રેન્ચ ઓપનની ફાઇનલમાં પહોંચ્યો છે. તેણે કહ્યું તેમાં કોઈ શંકા નથી મને ફાઇનલમાં હારવું ગમશે. હું મારું નિવેદન બદલીશ નહીં. એક નવા પગ દ્વારા મને જીવનમાં દરરોજ ખુશ રહેવાની તક મળશે.

ટાઇટલથી વધુ જીવન મહત્વનું છે

ટેનિસ સ્ટાર રાફેલ નડાલ (Rafael Nadal) 5 જૂને મેન્સ સિંગલ્સની ફાઇનલમાં પોતાનો 22મો ગ્રાન્ડ સ્લેમ જીતવાનો પ્રયાસ કરશે. ફ્રેન્ચ ઓપન 2022 (French Open 2022) ની ટાઇટલ મેચમાં તેનો સામનો નોર્વેના કેસ્પર રૂડ (Casper Ruud) સામે થશે. નડાલે કહ્યું, ‘જીતવું સારું છે, પરંતુ જીવન કોઈ પણ ખિતાબ કરતાં વધુ મહત્વનું છે. આગળ સ્વસ્થ જીવન જીવવા માટે તેને પગની ઈજામાંથી ઝડપથી સાજા થવાની જરૂર છે.’ તેમના મતે, ‘જીતવું શાનદાર છે. પરંતુ તે કામચલાઉ છે. પછી તમારે આગળ જીવવું પડશે.’ તેણે ભારપૂર્વક કહ્યું, ‘મારી આગળ જીવન છે. ભવિષ્યમાં મને મારા મિત્રો સાથે રમવાનું ગમશે. મારી ખુશી કોઈપણ પદવી કરતાં વધુ મહત્વનું છે.’