Kabaddi : ટીમ ઈન્ડિયા પાંચમી વખત બની ચેમ્પિયન, ફાઈનલમાં આ ટીમને હરાવીને જીત્યું ટાઈટલ
ભારતીય મહિલા કબડ્ડી ટીમે એશિયન ચેમ્પિયનશિપ 2025નો ખિતાબ જીત્યો છે. 8 માર્ચે તેહરાનમાં યોજાયેલી ફાઈનલમાં ભારતે યજમાન ઈરાનને 32-25થી હરાવ્યું અને પાંચમી વખત આ સિદ્ધિ હાંસલ કરી. ભારતીય ટીમે સમગ્ર ટુર્નામેન્ટમાં પ્રભુત્વ મેળવ્યું અને બધી મેચ જીતી હતી.
ભારતીય ટીમે એશિયન મહિલા કબડ્ડી ચેમ્પિયનશિપ 2025નો ખિતાબ જીત્યો છે. ફાઈનલમાં ભારતે ઈરાન સામે 32-25થી વિજય મેળવ્યો હતો. આ સાથે, ટીમ ઈન્ડિયાએ પાંચમી વખત આ ખિતાબ જીત્યો છે. 8 વર્ષ પછી આ ટુર્નામેન્ટની છઠ્ઠી આવૃત્તિ 6 થી 8 માર્ચ દરમિયાન ઈરાનની રાજધાની તેહરાનમાં યોજાઈ હતી. અગાઉ 2017માં ફાઈનલમાં દક્ષિણ કોરિયાને હરાવી ભારત ચેમ્પિયન બન્યું હતું. વર્તમાન ટ્રોફી જીતીને ભારતીય ટીમે અત્યાર સુધી 6 માંથી 5 ટાઈટલ જીત્યા છે.
સમગ્ર ટુર્નામેન્ટમાં ભારતનો દબદબો રહ્યો
મહિલા એશિયન કબડ્ડી ચેમ્પિયનશિપ 2025માં કુલ 7 ટીમોએ ભાગ લીધો હતો. ગ્રુપ A માં ભારત, થાઈલેન્ડ, બાંગ્લાદેશ અને મલેશિયાની ટીમોનો સમાવેશ થતો હતો. જ્યારે ગ્રુપ B માં ઈરાન, ઈરાક અને નેપાળની ટીમોનો સમાવેશ થતો હતો. સમગ્ર ટુર્નામેન્ટ દરમિયાન ભારતનો દબદબો જોવા મળ્યો. ગ્રુપ સ્ટેજ દરમિયાન, ભારતીય ટીમે તેની બધી 3 મેચ જીતી હતી. આ ઉપરાંત અન્ય કોઈપણ ટીમ કરતા સૌથી વધુ પોઈન્ટ (213) મેળવ્યા અને સૌથી ઓછા પોઈન્ટ (63) ગુમાવ્યા. ટીમ ઈન્ડિયાએ બાંગ્લાદેશને 64-23, થાઈલેન્ડને 76-21 અને મલેશિયાને 73-19ના મોટા માર્જિનથી હરાવીને સેમીફાઈનલમાં પ્રવેશ કર્યો હતો.
Indian Women’s Kabaddi Team became the Champion of 6th Asian Women’s Kabaddi CHAMPIONSHIP by beating Iran in Finale by 32 – 25
Follow @kabaddilovers__ #kabaddi #kabaddilovers #india #teamindia #indiankabaddi #prokabaddi #6thasiankabaddichampionship #womenskabaddi pic.twitter.com/RqaLF3Izb6
— Kabaddi Lovers (@kabaddilovers__) March 8, 2025
સેમીફાઈનલમાં ભારતે નેપાળને હરાવ્યું
ગ્રુપ A માંથી ભારત ઉપરાંત, બાંગ્લાદેશની ટીમ 3 માંથી 2 મેચ જીતીને સેમીફાઈનલમાં જગ્યા બનાવવામાં સફળ રહી. બીજી તરફ, ગ્રુપ B માં ઈરાન અને નેપાળની ટીમોએ સેમીફાઈનલમાં પોતાનું સ્થાન બનાવ્યું હતું. આ પછી, સેમીફાઈનલમાં ભારતનો સામનો નેપાળની ટીમ સામે થયો. અહીં પણ ભારતીય ટીમે એકતરફી 56-18થી જીત મેળવી હતી. દરમિયાન, યજમાન ઈરાને પણ એકતરફી મેચમાં બાંગ્લાદેશને 41-18થી હરાવ્યું હતું. ત્યારબાદ આ ટુર્નામેન્ટની બે શ્રેષ્ઠ ટીમો ફાઈનલમાં ટકરાઈ હતી.
ફાઈનલમાં ભારત-ઈરાન વચ્ચે રોમાંચક મેચ
આ 3 દિવસીય ટુર્નામેન્ટના અંતિમ મેચમાં 8 માર્ચે ભારત અને ઈરાન વચ્ચે મુકાબલો થયો હતો. બંને ટીમો વચ્ચે જોરદાર સ્પર્ધા જોવા મળી. ઈરાને જોરદાર લડાઈ આપી અને મેચને રોમાંચક બનાવી દીધી. જોકે, અંતે, ભારતનો વિજય થયો અને 7 પોઈન્ટના નાના માર્જિનથી મેચ જીતી લીધી. ભારતની મહિલા કબડ્ડી ટીમ ફરી એકવાર ઈરાનને 32-25 થી હરાવીને એશિયન ચેમ્પિયન બની છે.
આ પણ વાંચો: Breaking News : વિરાટ કોહલી થયો ઈજાગ્રસ્ત, ચેમ્પિયન્સ ટ્રોફી ફાઈનલ પહેલા ટીમ ઈન્ડિયાનું વધ્યું ટેન્શન
