T20 World Cup 2022 : મેજબાન ટીમ ઓસ્ટ્રલિયા વર્લ્ડ કપમાંથી બહાર, ન્યૂઝિલેન્ડ બાદ ઈંગ્લેન્ડની ટીમ પહોંચી સેમીફાઈનલમાં

આજે ક્રિકેટ વર્લ્ડ કપમાં સિડની ક્રિકેટ ગ્રાઉન્ડ પર શ્રીલંકાને હરાવીને ઈંગ્લેન્ડની ટીમ સેમીફાઈનલમાં પહોંચી છે. તેની સાથે જ મેજબાન ટીમ ઓસ્ટ્રલિયા વર્લ્ડ કપમાંથી બહાર થઈ ગઈ છે. ઈંગ્લેન્ડની ટીમ સેમીફાઈનલમાં પહોંચનાર બીજી ટીમ બની ગઈ છે. આ પહેલા ન્યૂઝિલેન્ડની ટીમ સેમીફાઈનલમાં પહોંચી હતી. આજે શ્રીલંકા સામે 4 વિકેટે ઈંગ્લેન્ડની જીત થતા ડિફેન્ડિંગ ચેમ્પિયન અને મેજબાન ટીમ ઓસ્ટ્રેલિયા વર્લ્ડ કપમાંથી બહાર થઈ ગઈ છે.

આજે શ્રીલંકાની ટીમે પહેલી બેટિંગ કરતા સારી શરુઆત કરી હતી. પણ તેઓ તે સારી શરુઆતનો ફાયદો ઉઠાવી ન શકયા અને 20 ઓવરમાં 8 વિકેટના નુકશાન સાથે 141 રન બનાવ્યા. ઈંગ્લેન્ડની ટીમે આ સરળ ટાર્ગેટને 6 વિકેટના નુકશાન પર 2 બોલ પહેલા જ ચેઝ કરી લીધો હતો. જોકે, ઈંગ્લેન્ડની ટીમને આ જીત સરળતાથી ન મળી હતી. ટાર્ગેટનો પીછો કરતા સારી શરુઆત બાદ ઈંગ્લેન્ડની ટીમની સતત વિકેટ પડી રહી હતી. જેને કારણે એક સમયે ઈંગ્લેન્ડની જીત પર સંકટ હતુ. પણ બેન સ્ટોક્સે અંતે પોતાની ટીમને જીત અપાવી હતી.

હેલ્સ ચૂક્યો ફિફટી

આ સરળ ટાર્ગેટનો પીછો કરતા ઈંગ્લેન્ડની ટીમે બીજી પારીમાં સારી શરુઆત કરી હતી. ઈંગ્લેન્ડની ટીમના કેપ્ટન જોસ બટલર અને અલેક્સ હેલ્સે તોફાની બેટિંગ કરીને અડધા રન સાત ઓવરમાં જ બનાવી દીધા હતા. આઠમી ઓવરમાં આ પાર્ટનશીપ તૂટી હતી. 28 રન બનાવી બટલર, ધનંજય ડિ સિલ્વાની બોલ પર આઉટ થયો હતો. ત્યાર બાદ અલેક્સ હેલ્સ પણ 47 રન બનાવી આઉટ થયો હતો. આ દરમિયાન તેણે 7 ચોક્કા અને 1 છગ્ગો પણ ફટકાર્યો હતો. જોકે તે પોતાની ફિફટી ન બનાવી શક્યો.

પ્લેયર ઓફ ધ મેચ

આદિલ રશીદે આ મેચમાં 4 ઓવરમાં ફક્ત 16 રન આપીને 1 વિકેટ લીધી હતી. તેને પ્લેયર ઓફ ધ મેચ મળ્યો છે.