ઈશાન કિશન, અભિષેક શર્મા અને વૈભવ સૂર્યવંશી T20 ક્રિકેટમાં શાનદાર ખેલાડી સાબિત થઈ રહ્યા છે. જોકે, હવે તેમને ODI ટીમમાં પણ સામેલ કરવાની માંગ ઉઠી રહી છે. ભારતના ભૂતપૂર્વ ઓલરાઉન્ડર યુવરાજ સિંહે ODI ટીમમાં અભિષેક, વૈભવ અને ઈશાન જેવા પ્રતિભાશાળી ક્રિકેટરોનો સમાવેશ કરવાની હિમાયત કરી છે. યુવરાજે કહ્યું કે આ ખેલાડીઓને ODI ટીમમાં નિયમિત તક આપવી જોઈએ. આમ ન કરવું એ તેમની પ્રતિભા સાથે અન્યાય થશે.

અભિષેક-વૈભવને વનડેમાં તક મળવી જોઈએઃ યુવી

“સાચું કહું તો, મને અભિષેકને વનડેમાં જોવાનું ગમશે, અને મેં આ પહેલા પણ કહ્યું છે કે જો આપણે 50 ઓવરના ક્રિકેટ માટે ઈશાન કિશન, અભિષેક શર્મા અને વૈભવ સૂર્યવંશી જેવા ખેલાડીઓની પસંદગી નહીં કરીએ, તો આપણે તેમની પ્રતિભા સાથે ન્યાય કરી રહ્યા નથી,” યુવરાજે જણાવ્યું. તેણે આશા વ્યક્ત કરી કે આ ખેલાડીઓ ટૂંક સમયમાં વનડે ટીમમાં સ્થાન મેળવશે.

અભિષેકની વિસ્ફોટક ઇનિંગ અને યુવીનો પડકાર

અભિષેક શર્માએ તાજેતરમાં ન્યુઝીલેન્ડ સામેની ત્રીજી T20 આંતરરાષ્ટ્રીય મેચમાં માત્ર 38 બોલમાં 113 રનની ધમાકેદાર ઇનિંગ રમી હતી. તેણે 14 બોલમાં પોતાની અડધી સદી પૂરી કરી હતી. તેની ઇનિંગ બાદ યુવરાજ સિંહે તેને સોશિયલ મીડિયા પર 12 બોલમાં અડધી સદી ફટકારવાનો પડકાર ફેંક્યો હતો. જોકે, અભિષેકે તેના મેન્ટરના પડકારને નકારી કાઢતા કહ્યું, “મને ખબર નથી કે યુવરાજ તે સમયે કેવા પ્રકારનું ક્રિકેટ રમી રહ્યો હતો, પરંતુ તે બિલકુલ સરળ નથી.”

અનુભવી ખેલાડીઓ માટે પડકાર

યુવરાજ એ પણ સમજે છે કે ટીમમાં અનુભવી ખેલાડીઓની હાજરીને કારણે યુવા ખેલાડીઓ માટે સ્થાન મેળવવું મુશ્કેલ બને છે. જોકે, યુવરાજે આ વિષે કહ્યું કે, “મને લાગે છે કે યુવા બેટ્સમેન જે રીતે પ્રદર્શન કરી રહ્યા છે, આશા છે કે તેઓ ટૂંક સમયમાં ટીમમાં હશે.”

Breaking News: ન્યુઝીલેન્ડ સામેની પ્રથમ ત્રણ વનડેમાં પ્રસિદ્ધ કૃષ્ણાની જગ્યાએ આકિબ નબીનો સમાવેશ, હવે આખી શ્રેણીમાં રમશે આ ખેલાડી