RCBએ મોહમ્મદ સિરાજને ટીમમાંથી કેમ બહાર કાઢ્યો? 9 મહિના બાદ થયો ખુલાસો
રોયલ ચેલેન્જર્સ બેંગલુરુએ IPL 2025 પહેલા સ્ટાર ફાસ્ટ બોલર મોહમ્મદ સિરાજને રિલીઝ કર્યો હતો. તે 7 વર્ષ સુધી આ ટીમનો ભાગ હતો. રોયલ ચેલેન્જર્સ બેંગલુરુના ક્રિકેટ ડિરેક્ટર મો બોબાટે હવે આ નિર્ણય પર મોટો ખુલાસો કર્યો છે.
રોયલ ચેલેન્જર્સ બેંગલુરુ (RCB) એ આખરે ઈન્ડિયન પ્રીમિયર લીગ (IPL) 2025 મેગા ઓક્શન પહેલા તેના સ્ટાર ફાસ્ટ બોલર મોહમ્મદ સિરાજને રિલીઝ કરવાના નિર્ણય પર પોતાનું મૌન તોડ્યું છે. RCBના ક્રિકેટ ડિરેક્ટર મો બોબાટે આ નિર્ણય પાછળની રણનીતિનો ખુલાસો કર્યો છે. મોહમ્મદ સિરાજ સાત વર્ષ સુધી RCB સાથે હતા અને તેમનું પ્રદર્શન પણ ખૂબ સારું રહ્યું હતું. હવે તે ગુજરાત ટાઈટન્સ ટીમનો ભાગ છે.
RCBએ મોહમ્મદ સિરાજને રિલીઝ કર્યો
RCBના ક્રિકેટ ડિરેક્ટર મો બોબાટે જણાવ્યું હતું કે RCBનું લક્ષ્ય એક સંતુલિત અને મજબૂત બોલિંગ લાઈનઅપ બનાવવાનું છે, જે વિવિધ પરિસ્થિતિઓમાં અસરકારક રહેશે. તેમણે કહ્યું કે ભુવનેશ્વર કુમારને ટીમમાં સામેલ કરવાની ઈચ્છા હતી, કારણ કે RCBની રણનીતિ માટે તેનો અનુભવ અને સ્વિંગ બોલિંગ કુશળતા મહત્વપૂર્ણ છે. બોબાટે સ્પષ્ટતા કરી હતી કે સિરાજને રિટેન કરવાથી ભુવનેશ્વરને સાઈન કરવું મુશ્કેલ બન્યું હોત, કારણ કે હરાજીમાં બજેટ અને ખેલાડીઓની પ્રાથમિકતાનું સંતુલન રાખવું જરૂરી હતું.
IPL મેગા ઓક્શનમાં પણ ન ખરીદ્યો
બોબાટે કહ્યું, ‘સિરાજ કદાચ એવો ખેલાડી છે જેના વિશે અમે સૌથી વધુ વિચાર્યું છે. ભારતીય આંતરરાષ્ટ્રીય બોલરો સરળતાથી ઉપલબ્ધ નથી. અમે સિરાજ સાથે દરેક સંભવિત પરિસ્થિતિની ચર્ચા કરી, તેને રિટેન કરવો કે રિલીઝ કરવો કે રાઈટ ટુ મેચ કાર્ડનો ઉપયોગ કરવો. તે સીધો નિર્ણય નહોતો. અમે ભુવીને લાવવાનો પ્રયાસ કરી રહ્યા હતા. સિરાજને ટીમમાં રાખવાથી તે મુશ્કેલ બન્યું હોત. કોઈ એક કારણ નથી, આમાં ઘણા પરિબળો ભૂમિકા ભજવે છે.’
કેમેરોન ગ્રીનને આ કારણે રિટેન ન કર્યો
આ સાથે, બોબાટે એ પણ ખુલાસો કર્યો કે ઓસ્ટ્રેલિયન ઓલરાઉન્ડર કેમેરોન ગ્રીનને ફક્ત ઈજાને કારણે રિટેન કરવામાં આવ્યો ન હતો. તેમણે કહ્યું, ‘જો તે ફિટ હોત, તો અમે લગભગ ચોક્કસપણે તેને રિટેન કર્યો હોત.’
આ પણ વાંચો: 3 દેશ, 54 મેચ… 2027ના ODI વર્લ્ડ કપ માટે મોટી જાહેરાત, અહીં રમાશે મેચો
