અશ્વિને પોતાની જ મજાક ઉડાવી, કહ્યું- આટલા વર્ષોમાં પણ કોઈ સુધારો થયો નથી
રવિચંદ્રન અશ્વિને ઈંગ્લેન્ડ સામેની 5 ટેસ્ટ મેચની શ્રેણીમાં ખૂબ જ ધીમી શરૂઆત કરી હતી પરંતુ તેણે સૌથી વધુ વિકેટ લઈને શ્રેણીનો અંત કર્યો હતો. આ 5 મેચમાં તેણે 26 વિકેટ લીધી હતી, જેમાં અશ્વિને ધર્મશાળામાં રમાયેલી તેની 100મી ટેસ્ટમાં રેકોર્ડ 9 વિકેટ લીધી હતી. આટલું સારું પ્રદર્શન છતાં અશ્વિને એક એવી પોસ્ટ કરી, જેમાં તેને પોતાની જ મજાક ઉડાવી. જાણો આવું શું છે આ પોસ્ટમાં?
ટીમ ઈન્ડિયાના સ્ટાર સ્પિનર રવિચંદ્રન અશ્વિન માટે છેલ્લા કેટલાક દિવસો ખૂબ જ શાનદાર રહ્યા છે. ઈંગ્લેન્ડ સામેની ટેસ્ટ સિરીઝ દરમિયાન તેણે માત્ર 500 વિકેટ જ નહીં પરંતુ 100 ટેસ્ટનો માઈલસ્ટોન પણ હાંસલ કર્યો હતો. ઉપરાંત, શ્રેણીની ખરાબ શરૂઆતમાંથી બહાર આવીને, છેલ્લી 2 મેચોમાં તેની જબરદસ્ત બોલિંગે ટીમ ઈન્ડિયાને 4-1થી શ્રેણી જીતવામાં મોટી ભૂમિકા ભજવી હતી. અશ્વિનને આ બધાનું ઈનામ ટેસ્ટ રેન્કિંગમાં પ્રથમ સ્થાને પહોંચીને મળ્યું. આ બધા પછી અશ્વિને હવે ‘X’ (Twitter) પર એક પોસ્ટ કરીને પોતાની મજાક ઉડાવી છે.
100 ટેસ્ટ, 500 વિકેટ
ભારતીય દિગ્ગજ ખેલાડીએ ઈંગ્લેન્ડ સામેની ટેસ્ટ શ્રેણીમાં સૌથી વધુ 26 વિકેટ લીધી હતી. અશ્વિને રાજકોટમાં રમાયેલી ત્રીજી ટેસ્ટ દરમિયાન 500 વિકેટ પૂરી કરી હતી. ત્યારબાદ ધર્મશાળામાં રમાયેલી તેની 100મી ટેસ્ટમાં તેણે રેકોર્ડ 9 વિકેટ લીધી અને ટીમ ઈન્ડિયાને એક ઈનિંગ અને 64 રનથી જીત અપાવી. અશ્વિનની 100મી ટેસ્ટ બાદ જે બન્યું તેની ભારતીય બોલરે પોતે જ મજાક ઉડાવી.
પોસ્ટ શેર કરી ઉડાવી મજાક
બુધવાર 13 જાન્યુઆરીના રોજ, અશ્વિન X પર એક ટ્વિટ ફરીથી પોસ્ટ કરવામાં આવ્યું હતું, જેમાં અશ્વિનની પ્રથમ અને 100મી ટેસ્ટના આંકડા બતાવવામાં આવ્યા હતા. અશ્વિને 2011માં વેસ્ટ ઈન્ડિઝ વિરુદ્ધ ટેસ્ટ ડેબ્યૂ કર્યું હતું અને તે મેચમાં 128 રન આપીને 9 વિકેટ લીધી હતી. 13 વર્ષ બાદ તેની 100મી ટેસ્ટમાં પણ અશ્વિને 128 રન આપીને માત્ર 9 વિકેટ લીધી હતી. તેનો અર્થ એ છે કે પ્રથમ અને 100મી ટેસ્ટના આંકડા બરાબર સરખા હતા. આના પર જ અશ્વિનને મજાક સમજાઈ અને લખ્યું કે આટલા વર્ષો રમ્યા પછી પણ કઈં સુધરી શક્યું નથી. અશ્વિન અહીં જ ન અટક્યો, તેણે તેની માતાને પણ આ મજાકમાં સામેલ કરી અને લખ્યું કે આવી વાતો ફક્ત તેની માતા જ કહી શકે છે.
No improvement after all these years of playing the game.
“Only my mom can say things like this” ❤️ https://t.co/UKEN8kovLX
— Ashwin (@ashwinravi99) March 13, 2024
રેન્કિંગમાં નંબર 1 બન્યો
5 મેચોની શ્રેણીમાં ધીમી શરૂઆત છતાં અશ્વિનને સૌથી વધુ વિકેટ લેવાનો ફાયદો પણ મળ્યો. બુધવાર 13 માર્ચે ICC દ્વારા બહાર પાડવામાં આવેલી લેટેસ્ટ રેન્કિંગમાં, અશ્વિન ફરીથી ટેસ્ટમાં નંબર 1 બોલર બન્યો. આ રેસમાં તેણે ટીમ ઈન્ડિયાના તેના સાથી ઝડપી બોલર જસપ્રીત બુમરાહને બીજા સ્થાને ધકેલી દીધો. અશ્વિનની નજર હવે 22 માર્ચથી શરૂ થનારી IPL 2024 સિઝન પર રહેશે, જ્યાં તે રાજસ્થાન રોયલ્સ તરફથી રમશે.
આ પણ વાંચો : રિષભ પંતે 14 મહિના સુધી શું સહન કર્યું? BCCIના વીડિયોમાંથી સત્ય બહાર આવ્યું
Published On - 8:02 pm, Wed, 13 March 24