IPL ની પ્રગતિ જોઈને ગભરાઈ ગયું પાકિસ્તાન, કામ બગાડવા માટે પૂરી તાકાતથી તૈયારી કરી રહ્યું છે

બીસીસીઆઈ (BCCI) એ ભૂતકાળમાં ક્રિકેટની દુનિયાને પોતાની શક્તિ બતાવી છે. બીસીસીઆઈએ આઈપીએલના મીડિયા રાઈટ્સ (IPL Media Rights) 48,390 કરોડ રૂપિયામાં વેચ્યા. પાકિસ્તાન ક્રિકેટ બોર્ડ BCCI અને IPL ની સફળતાથી નાખુશ હોય એવું લાગી રહ્યું છે. આઈસીસીના નવા ફ્યુચર ટૂર પ્રોગ્રામ (FTP) કેલેન્ડરમાં આઈપીએલને અઢી મહિનાની વિન્ડો આપવાના પ્રસ્તાવ પર બોર્ડ હવે બાકીના બોર્ડ સાથે વાત કરવાની તૈયારી કરી રહ્યું છે. પીસીબીનું માનવું છે કે અઢી મહિનાની વિન્ડોની ઘણી આંતરરાષ્ટ્રીય શ્રેણીઓ પર વિપરીત અસર પડશે. પીટીઆઈ સાથે વાત કરતા બીસીસીઆઈના સચિવ જય શાહે (Jay Shah) કહ્યું હતું કે 2024 થી 2031 સુધીના FTP ચક્રમાં IPL માટે અઢી મહિનાની વિન્ડો હશે. જેથી વિશ્વના તમામ ટોચના આંતરરાષ્ટ્રીય ક્રિકેટરો આ લીગમાં રમી શકે.

IPL માં અઢી મહિનાના સમય પર પાકિસ્તાન ક્રિકેટ ચર્ચા કરશે

BCCI સેક્રેટરીએ કહ્યું કે, અમે આ અંગે અન્ય બોર્ડ અને ICC સાથે પણ વાત કરી છે. સાથે જ પાકિસ્તાન બોર્ડ (Pakistan Cricket Board) નું માનવું છે કે આ મુદ્દે ચર્ચા કરવાની જરૂર છે. PCBના એક સૂત્રના જણાવ્યા અનુસાર ICC બોર્ડની બેઠક જુલાઈમાં બર્મિંગહામ કોમનવેલ્થ ગેમ્સ દરમિયાન યોજાશે અને તે જ સમયે આ મુદ્દા પર ચર્ચા કરવામાં આવશે. પીસીબીના અધિકારીએ કહ્યું કે ક્રિકેટમાં પૈસા આવે છે તે સારું છે. પરંતુ દર વર્ષે IPL માટે ટોચના ક્રિકેટરોને બુક કરવાની બીસીસીઆઈની યોજનાની આંતરરાષ્ટ્રીય શ્રેણી પર વિપરીત અસર પડશે. ભારત અને પાકિસ્તાન વચ્ચેના ક્રિકેટ સંબંધોની વાત કરીએ તો બંને વચ્ચે લાંબા સમયથી કોઈ દ્વિપક્ષીય શ્રેણી રમાઈ નથી. ભારત અને પાકિસ્તાન માત્ર ICC ટૂર્નામેન્ટમાં જ એકબીજાનો સામનો કરે છે.

આવનારી 5 IPL માં 410 મેચ રમાશે

2023 અને 2027 ની વચ્ચે BCCI એ IPL ના મીડિયા અધિકારો 48,390 કરોડ રૂપિયામાં વેચ્યા. ભારતીય ઉપખંડ માટેના ટીવી રાઇટ્સ ડિઝની સ્ટાર દ્વારા રૂ. 23,575 કરોડમાં ખરીદવામાં આવ્યા હતા. જ્યારે ડિજિટલ રાઇટ્સ વાયાકોમ 18ને રૂ. 20,500 કરોડમાં ખરિદ્યા હતા. વાયકોમે રૂ. 2,991 કરોડમાં બિન-વિશિષ્ટ અધિકારોનું સી પેકેજ પણ ખરીદ્યું હતું. A અને B પેકેજમાં આગામી 5 વર્ષ માટે 410 મેચો (2023 અને 2024માં 74-74 મેચો, 2025 અને 2026માં 84-84 મેચો અને 2027માં 94 મેચો) નો સમાવેશ થાય છે.