સચિન તેંડુલકર (Sachin Tendulkar) ના મોટા ભાગના રેકોર્ડ તોડવા અસંભવ લાગે છે. પરંતુ આ દિવસોમાં તેનો એક રેકોર્ડ તોડવાની ઘણી શક્યતાઓ છે. હકીકતમાં ટેસ્ટમાં સૌથી વધુ રનનો તેનો રેકોર્ડ જોખમમાં હોવાનું કહેવાય છે. જ્યારથી ઇંગ્લિશ બેટ્સમેન જો રૂટ (Joe Root) એ ટેસ્ટમાં 10,000 રનના આંકને સ્પર્શ કર્યો છે ત્યારથી આ ચર્ચાઓ ખૂબ ચાલી રહી છે. જો રૂટ ભવિષ્યમાં સચિનનો રેકોર્ડ તોડી શકે તેવી શક્યતા ક્રિકેટ નિષ્ણાતો વ્યક્ત કરી રહ્યા છે. આ લિસ્ટમાં વધુ એક પૂર્વ ઇંગ્લિશ ક્રિકેટરનું નામ જોડાયું છે.
જો રૂટ (Joe Root) ના સાથી ખેલાડી નિક કોમ્પટનનું કહેવું છે કે ઇંગ્લેન્ડના દિગ્ગજ ક્રિકેટર જો રૂટ ભારતના પુર્વ સ્ટાર ક્રિકેટર સચિન તેંડુલકર (Sachin Tendulkar) નો ટેસ્ટ રેકોર્ડ (Test Record) તોડી શકે છે. જોકે આ માટે જરૂરી છે કે તે જે લય માં રમી રહ્યો છે તે જ રીતે તે રમતો રહે. કોમ્પટન કહે છે કે, ‘મને લાગે છે કે તે કરી શકશે. તે યુવાન છે અને ટેસ્ટ રન બનાવવા ની બાબત માં તે બરાબર એ જ સ્થાને છે જ્યાં સચિન 31 વર્ષની ઉંમરે હતો. જો ફિટનેસ સારી હોય અને કોઈ મોટી ઈજા ન હોય તો તેના જેવા ખેલાડી માટે આ રન બનાવવા મુશ્કેલ નથી. જો તે આ રીતે રન બનાવતો રહેશે તો તે ત્યાં પહોંચી જશે.’
આ અંગે કોમ્પટન કહે છે, જો તેની લય વચ્ચે નબળી પડી જાય, તો તે તેમાંથી કઇ રીતે બહાર આવશે તે તેના માટે એકમાત્ર પડકાર હશે. હમણાં તો તેને કોઇ રોકી શકતું નથી. જો તે તેંડુલકરનો રેકોર્ડ તોડે છે તો તે એક મોટી ઉપલબ્ધિ હશે.
ક્રિકેટમાં સક્રિય ખેલાડીઓમાં જો રૂટ એકમાત્ર એવો ખેલાડી છે જેણે ટેસ્ટ (Test Cricket) માં 10,000 રન બનાવ્યા છે. જો રૂટ (Joe Root) એ તેની કારકિર્દીમાં 120 ટેસ્ટ મેચ રમી છે અને તેણે 50.17ની બેટિંગ એવરેજથી 10,285 રન બનાવ્યા છે. જોકે તે સચિન તેંડુલકર (Sachin Tendulkar) ના રેકોર્ડથી દૂર છે. સચિને તેની ટેસ્ટ કારકિર્દીમાં 53.80ની બેટિંગ એવરેજથી 15,921 રન બનાવ્યા છે.