Vaibhav Suryavanshi : વૈભવ સૂર્યવંશીએ સ્ટમ્પના બે ટુકડા કરી નાખ્યા, બેટિંગ બાદ બોલિંગમાં પણ બતાવ્યો પાવર, જુઓ VIDEO
માત્ર 14 વર્ષની ઉંમરે વૈભવ સૂર્યવંશીએ IPL 2025માં સદી ફટકારીને ઈતિહાસ રચ્યો છે. તેણે ઈશાંત શર્મા, શાર્દુલ ઠાકુર, મોહમ્મદ સિરાજ, રાશિદ ખાન જેવા સ્ટાર બોલરોને ફટકાર્યા છે. પરંતુ વૈભવ માત્ર બેટિંગમાં જ નહીં, પણ બોલિંગમાં પણ કમાલ કરવાની ક્ષમતા ધરાવે છે. આ વાતનો પુરાવો આપતો એક વીડિયો હાલ વાયરલ થયો છે.
IPLની 18મી સિઝને વિશ્વ ક્રિકેટને એક એવો ખેલાડી આપ્યો છે જેની ઉંમર પણ આ T20 લીગ કરતા ઓછી છે. માત્ર 14 વર્ષની ઉંમરે રાજસ્થાન રોયલ્સના વૈભવ સૂર્યવંશીએ વિશ્વભરના દરેક ઉંમરના ક્રિકેટરો અને ચાહકોનું ધ્યાન ખેંચ્યું છે. વૈભવ સૂર્યવંશી IPL ઈતિહાસમાં સદી ફટકારનાર સૌથી યુવા બેટ્સમેન પણ બન્યો હતો. પરંતુ વૈભવ માત્ર તેની બેટિંગથી જ નહીં, પણ બોલિંગથી પણ તબાહી મચાવી શકે છે, અને આની ઝલક ત્યારે જોવા મળી જ્યારે તેણે સ્ટમ્પના બે ટુકડા કરી નાખ્યા હતા.
વૈભવ સૂર્યવંશીની બોલિંગનો વીડિયો વાયરલ
વૈભવ સૂર્યવંશી ફક્ત શાનદાર બેટિંગ જ નથી કરતો, પણ તેની બોલિંગથી બેટ્સમેનોને મુશ્કેલીમાં મુકવાની ક્ષમતા પણ ધરાવે છે. તાજેતરમાં યુટ્યુબ પર પોસ્ટ કરાયેલા એક વીડિયોમાં વૈભવની આ ક્ષમતાથી દુનિયા પણ વાકેફ થઈ હતી. આ વીડિયો ક્રિકેટ ડિસ્ટ્રિક્ટ નામની એક ફેમસ યુટ્યુબ ચેનલ પર પોસ્ટ કરવામાં આવ્યો છે, જે ઈંગ્લેન્ડની ચેનલ છે અને તેણે ઘણા દિગ્ગજ ક્રિકેટરો સાથે વીડિયો બનાવ્યા છે.
વિસ્ફોટક બેટિંગની સાથે બોલિંગ કુશળતા પણ બતાવી
IPL 2025માં માત્ર 14 વર્ષના વૈભવ સૂર્યવંશીના આગમન અને તેની વિસ્ફોટક બેટિંગના સમાચાર અને વીડિયો સમગ્ર વિશ્વમાં હિટ બન્યા છે. આવી સ્થિતિમાં, આ ચેનલ ચલાવતી યુટ્યુબર્સની ટીમ જયપુરમાં રાજસ્થાન રોયલ્સ કેમ્પમાં પહોંચી અને ત્યાં વૈભવ સાથે એક રમુજી વીડિયો બનાવ્યો હતો. આ વીડિયોમાં, વૈભવની વિસ્ફોટક બેટિંગની સાથે તેની બોલિંગ કુશળતા પણ જોવા મળી હતી.
વૈભવ સૂર્યવંશીએ સ્પિનનો જાદુ બતાવ્યો
વૈભવે ક્રિકેટ ડિસ્ટ્રિક્ટના બંને યુટ્યુબર્સની બે ઓવરમાં છગ્ગા અને ચોગ્ગા ફટકારીને 42 રન ફટકાર્યા હતા. આ દરમિયાન યુટ્યુબર્સ વૈભવને ફક્ત એક જ વાર આઉટ કરી શક્યા. આ પછી, જ્યારે બંને યુટ્યુબર્સને બેટિંગ કરવાની તક મળી, ત્યારે વૈભવે તેના ડાબા હાથના સ્પિનનો જાદુ બતાવ્યો. વૈભવે પોતાના બીજા બોલે બેટ્સમેનને ક્લીન બોલ્ડ કર્યો અને ઓફ સ્ટમ્પના બે ટુકડા થઈ ગયા.
વૈભવમાં એક સારો ઓલરાઉન્ડર બનવાની ક્ષમતા
વૈભવે પહેલાથી જ પોતાની બેટિંગથી બધાને દિવાના બનાવી દીધા હતા, હવે તેણે બોલિંગમાં પણ બતાવી દીધું છે કે તે કમાલ કરી શકે છે. જોકે, તેની બોલિંગ ફક્ત 2 યુટ્યુબર્સ સામે હતી, જે પ્રોફેશનલ ક્રિકેટર નથી. પરંતુ વીડિયો જોયા પછી સ્પષ્ટ થઈ ગયું કે આ 14 વર્ષનો યુવાન ખેલાડી એક સારો ઓલરાઉન્ડર બનવાની ક્ષમતા ધરાવે છે. હવે ફેન્સ IPL દરમિયાન તેની બોલિંગ કુશળતા જોવાની રાહ જોશે.
આ પણ વાંચો: RR vs MI : મુંબઈ ઈન્ડિયન્સને મોટો ઝટકો, આ સ્ટાર ખેલાડી IPL 2025માંથી થયો બહાર
Published On - 7:11 pm, Thu, 1 May 25
