ભારતીય ક્રિકેટ ટીમ પર લાગ્યો બોલ ટેમ્પરિંગનો આરોપ, LIVE મેચમાં અમ્પાયર સાથે થઈ બોલાચાલી

ઈન્ડિયા A ટીમ ઓસ્ટ્રેલિયા પ્રવાસ પર છે, જ્યાં ભારતની ક્રિકેટ ટીમ પર મેચ દરમિયાન બોલ ટેમ્પરિંગનો આરોપ લાગ્યો છે. ફિલ્ડ અમ્પાયર શોન ક્રેગે ભારતીય ખેલાડીઓ પર આ આરોપ લગાવ્યો છે. આ આરોપ ત્યારે લગાવવામાં આવ્યો, જ્યારે મેકકોયમાં રમાઈ રહેલી મેચના ચોથા દિવસે, ઈન્ડિયા A ટીમ મેચના બોલને બદલવાથી નાખુશ દેખાઈ અને તેણે અમ્પાયર શોન ક્રેગ સાથે લાંબા સમય સુધી દલીલ કરી.

આ ચર્ચાના કારણે ચોથા દિવસની રમત મોડી શરૂ થઈ હતી. અમ્પાયરે બોલ બદલવાનો નિર્ણય લીધો હતો કારણ કે તેના પર સ્ક્રેચના નિશાન હતા.

અમ્પાયર અને ઈશાન કિશન વચ્ચે શું થયું?

ચર્ચા દરમિયાન ઇશાન કિશનનો અમ્પાયર શોન ક્રેગ સાથેનો મુદ્દો પણ થોડો ગરમ બન્યો હતો. અમ્પાયર ક્રેગને સ્ટમ્પ માઈકમાં કહેતા સાંભળવામાં આવ્યા હતા કે, હવે પછી આ મુદ્દે કોઈ ચર્ચા થશે નહીં. રમત શરૂ થવા દો. ઈશાન કિશને અમ્પાયરના આ નિવેદનનો જવાબ આપ્યો, તો શું અમે આ બદલાયેલા બોલથી રમીશું? આ કોઈ ચર્ચા નથી, આ એક મૂર્ખમી ભર્યો નિર્ણય છે.

અમ્પાયર શોન ક્રેગને ભારતીય વિકેટકીપરની આ વાતન પસંદ ના આવી અને તેણે કહ્યું કે તે આ વર્તન અંગે ફરિયાદ કરશે. આ સહનશીલતાની હદ બહાર છે.

ભારતીય ખેલાડીઓ પર બોલ ટેમ્પરિંગનો આરોપ

ચર્ચાનો અહીં અંત નહોતો આવ્યો. અમ્પાયર શોન ક્રેગે પણ ભારતીય ખેલાડીઓએ બોલ સાથે ચેડા કર્યા હોવાનો નિર્દેશ કર્યો હતો. તે ભારતીય ખેલાડીઓને કહેતા સાંભળવામાં આવ્યો હતો કે, તમે બોલ નખથી ખોતર્યો હતો. જેના કારણે અમે તેને બદલ્યો છે. મતલબ કે જો બોલ ટેમ્પરિંગનો કેસ આગળ વધે છે, તો ભારતીય ખેલાડીઓ સામે કાર્યવાહી થઈ શકે છે.

ક્રિકેટ ઓસ્ટ્રેલિયાની આચાર સંહિતા અનુસાર, જો ભારત A ના ખેલાડીઓ ઇરાદાપૂર્વક બોલ સાથે ચેડા કરતા હોવાનું જાણવા મળે છે, તો તેમાં સામેલ ખેલાડીઓ પર પ્રતિબંધ લાદવામાં આવી શકે છે.