IND vs PAK, WWC 2022: મંધાના, રાણા અને વસ્ત્રાકરની શાનદાર અડધી સદી, પાકિસ્તાન સામે જીત માટે ભારતે 245 રનનુ લક્ષ્ય રાખ્યુ

ભારતીય ટીમના કેપ્ટન મિતાલી રાજે ટોસ જીતીને પ્રથમ બેટીંગ પસંદ કરી હતી. શરુઆતમાં શેફાલી વર્માની વિકેટ ગુમાવ્યા બાદ દિપ્તી શર્મા અને સ્મૃતી મંધાના (Smriti Mandhana) એ રમતને સંભાળીને ભારતનો સ્કોર આગળ વધાર્યો હતો.

મંધાના એ શરુઆતમાં શેફાલીની વિકેટ બાદ પણ પાયા રુપ રમત રમી હતી

TV9 Gujarati | Edited By: Avnish Goswami | Updated on: Mar 06, 2022 | 10:09 AM

આઇસીસી મહિલા વિશ્વકપ (Icc Women World Cup 2022) માં ભારતીય ટીમનુ અભિયાન આજથી શરુ થયુ છે. ભારતની પ્રથમ મેચ કટ્ટર હરીફ પાકિસ્તાન સામે છે. ભારતીય ટીમના કેપ્ટન મિતાલી રાજે ટોસ જીતીને પ્રથમ બેટીંગ પસંદ કરી હતી. શરુઆતમાં શેફાલી વર્માની વિકેટ ગુમાવ્યા બાદ દિપ્તી શર્મા અને સ્મૃતી મંધાના (Smriti Mandhana) એ રમતને સંભાળીને ભારતનો સ્કોર આગળ વધાર્યો હતો. બંને એ 92 રનની ભાગીદારી રમત રમી હતી. સ્નેહ રાણા અને પૂજા વસ્ત્રાકરે (Pooja Vastrakar) પણ શાનદાર અડધી શતક ફટકારી રમત રમીને ભારતની સ્થિતી સન્માનજનક સ્કોરે પહોંચાડી હતી.

ભારતીય ટીમે ટોસ જીતીને પ્રથમ બેટીંગની શરુઆત કરી હતી. પરંતુ નબળા ફોર્મમાં રહેલી શેફાલી શર્માના રુપમાં ભારતને પ્રથમ ઝટકો મળ્યો હતો. શેફાલી ખાતુ ખોલાવ્યા વિના જ પેવેલિયન પરત ફરી હતી. બાદમાં દિપ્તિ શર્મા અને ઓપનર સ્મૃતિ મંધાનાએ રમતને સંભાળી હતી. બંને ભારતને 1 વિકેટે 4 રનના સ્કોર પર થી 96 રન સુધી રમતને આગળ વઘારી હતી. દિપ્તિ શર્મા (40) સેટ હતી એ દરમિયાન સંધૂના બોલને ઓળખવામાં થાપ ખાઇ જતા બોલ્ડ થઇ હતી. જ્યારે તેના બાદ તુરત જ મંધાનાએ પણ વિકેટ ગુમાવી હતી. મંધાનાએ 75 બોલમાં 52 રનની ઇનીંગ રમી હતી. તેણે 3 ચોગ્ગા અને 1 છગ્ગો લગાવ્યો હતો.

જોકે દિપ્તી અને મંધાનાની વિકેટ ગુમાવવા બાદ ભારતીય ટીમની ઇનીંગ મુશ્કેલી વધી ગઇ હતી. ભારતે 96 સ્કોર થી 114 રન સુધીમાં એક બાદ એક મહત્વની 5 વિકેટ ગુમાવી દીધી હતી. જેમાં દિપ્તિ શર્મા, સ્મૃતિ મંધાના, હરમનપ્રીત કૌર (5), રિચા ઘોષ (1) અને કેપ્ટન મિતાલી રાજ (9)નો સમાવેશ થાય છે.

પૂજા અને સ્નેહની રમતે ચિંતાના વાદળ વિખેર્યા

114 રન પર 6 વિકેટ ભારતે ગુમાવી દીધી હતી. આવી મુશ્કેલ સ્થિતી દરમિયાન ક્રિઝ પર આવીને પૂજા વસ્ત્રાકર અને સ્નેહ રાણાએ સહેજ પણ દબાણ હેઠળ રહ્યા વિના રમતને રમી દર્શાવી હતી. બંનેએ બાઉન્ડરીઓ ફટકારીને ખુશમાં રહેલ પાકિસ્તાનના ચહેરાઓ પરથી મુસ્કાનને હટાવી દીધી હતી. ધીરે ધીરે પાકિસ્તાની બોલરોના ચહેરાઓ પર ચિંતાની રેખાઓ ખેંચવા રુપ બાઉન્ડરીનો સિલસિલો જારી રાખ્યો હતો. પૂજાએ 8 ચોગ્ગા અને રાણાએ 4 ચોગ્ગા મુશ્કેલ સમયમાં ફટકારી હતી. પૂજા વસ્ત્રાકરે 59 બોલમાં 67 રનની આક્રમક રમત રમી હતી. જ્યારે સ્નેહ રાણાએ અણનમ 53 રનની ઇનીંગ 59 બોલમાં રમી હતી.

ડાર અને સંધૂનો પ્રયાસ ફાવ્યો નહી

પાકિસ્તાની બોલરો નિદા ડાર અને નશરા સંધૂએ 2-2 વિકેટ ઝડપી હતી. બંનેએ કસીને બોલીંગ કરવાનો પ્રયાસ કર્યો હતો. પરંતુ પૂજા અને રાણાએ તેને ફાવવા દિધા નહોતા. ડાયના બેગને શરુઆત થી જ ભારતીય બેટ્સમેનોએ પરેશાન રાખી હતી. તેની પાસેથી થી તેના સ્પેલમાં 61 રન ભારતે મેળવ્યા હતા. તેણે એક વિકેટ ઝડપી હતી. અનામ અમિન અને ફાતિમા સનાએ પણ એક એક વિકેટ મેળવી હતી.