T20 World Cup Breaking : માત્ર 4 રનમાં 5 વિકેટ ગુમાવી, ટીમ ઈન્ડિયા છેલ્લા 11 બોલમાં અચાનક થઈ ધ્વસ્ત

સૂર્યકુમાર યાદવની આગેવાની હેઠળની ટીમ ઈન્ડિયાએ વર્લ્ડ કપમાં જે શરૂઆત કરી છે તેનાથી કેટલીક ચિંતાઓ વધી ગઈ છે. યુએસએ સામેની મેચમાં, ટીમ ઈન્ડિયાનો ટોપ અને મિડલ ઓર્ડર ફ્લોપ રહ્યો, અને બીજી જ મેચમાં નામિબિયા સામે મિડલ અને લોઅર મિડલ ઓર્ડરે નિરાશ કર્યા હતા. નામિબિયા સામેની બીજી મેચમાં મજબૂત શરૂઆત બાદ ટીમ ઈન્ડિયાની કિસ્મત બદલાઈ ગઈ, છેલ્લી બે ઓવરમાં અડધી ટીમ આઉટ થઈ ગઈ.

ટોપ ઓર્ડરની ધમાકેદાર શરૂઆત

ભારતીય ટીમ ગુરુવાર, 12 ફેબ્રુઆરીના રોજ દિલ્હીના અરુણ જેટલી સ્ટેડિયમ ખાતે ગ્રુપ સ્ટેજની બીજી મેચ માટે મેદાનમાં ઉતરી હતી. પાછલી મેચમાં,USA એ ભારતીય ટીમની પ્રથમ છ વિકેટ માત્ર 77 રનમાં પાડી દીધી હતી. આ વખતે, વાર્તા અલગ હતી, ઇશાન કિશન અને સંજુ સેમસનની ઓપનિંગ જોડીએ ટીમ માટે વિસ્ફોટક શરૂઆત કરી. કેપ્ટન સૂર્યકુમાર યાદવ અને તિલક વર્મા સતત બે ઓવરમાં આઉટ થયા ત્યારે ભારતે 10 ઓવરમાં 120 રન બનાવ્યા હતા. જોકે, હાર્દિક પંડ્યા અને શિવમ દુબેએ ટીમના સ્કોરને 200 રનને પાર પહોંચાડ્યું.

હાર્દિક આઉટ થતા જ ઈનિંગ પડી ભાંગી

આ તે સમય હતો જ્યાં ટીમ ઈન્ડિયાની ઈનિંગ વિખેરાત ગઈ. હાર્દિકે 19 મી ઓવરના પહેલા બોલ પર ગેરહાર્ડ ઈરાસ્મસની બોલિંગ પર સિક્સર ફટકારી અને ટીમનો સ્કોર 200 રનની પાર કરી દીધો. જોકે, આગામી 11 બોલમાં ભારતે પાંચ વિકેટ ગુમાવી દીધી, અને ખેલાડીઓ માત્ર ચાર રન જ બનાવી શક્યા. તે સિક્સર પછી, હાર્દિક ઓવરના બીજા બોલ પર કેચ આઉટ થયો, જ્યારે શિવમ દુબે ત્રીજા બોલ પર રન આઉટ થયો. રિંકુએ પાંચમા બોલ પર એક સિંગલ લીધો, પરંતુ છઠ્ઠા બોલ પર અક્ષર પટેલ બોલ્ડ થયો.

છેલ્લા 11 બોલમાં પાંચ વિકેટ પડી

છેલ્લી ઓવરમાં બધાની નજર રિંકુ પર હતી, પરંતુ તે પહેલા બે બોલમાં કોઈ રન બનાવી શક્યો નહીં. પછી, તે ત્રીજા બોલ પર આઉટ થયો. ભારતે આગામી બે બોલમાં બે રન બનાવ્યા, જ્યારે છેલ્લા બોલ પર બીજો રન લેવાનો પ્રયાસ કરતા અર્શદીપ રન આઉટ થયો. આમ, ટીમ ઈન્ડિયા, જે 225-230 સુધી પહોંચશે તેવું લાગતું હતું, તે ફક્ત 209 સુધી જ પહોંચી શક્યું.

T20 World Cup Breaking : ફિફ્ટી ફટકાર્યા પછી હાર્દિક પંડ્યાએ પોતાની ગરદન તરફ ઈશારો કર્યો, જાણો કારણ