ગુજરાત જાયન્ટ્સને હરાવી દિલ્હી કેપિટલ્સ WPL 2024ની ફાઈનલમાં ક્વોલિફાય થનાર પ્રથમ ટીમ બની
દિલ્હી કેપિટલ્સ ગયા વર્ષે પણ ફાઈનલમાં જગ્યા બનાવી હતી પરંતુ તેમને મુંબઈ ઈન્ડિયન્સ સામે હારનો સામનો કરવો પડ્યો હતો. આ વખતે દિલ્હીએ જોરદાર પ્રદર્શન કર્યું છે અને ફાઈનલમાં પહોંચનાર પહેલી ટીમ બની ગઈ છે. આ વખતે ટાઈટલ માટે તેમનો દાવો પહેલા કરતા વધુ મજબૂત લાગી રહ્યો છે.
સિઝનની પહેલી જ મેચમાં છેલ્લા બોલે મળેલી હારમાંથી બહાર નીકળીને દિલ્હી કેપિટલ્સ વુમન્સ પ્રીમિયર લીગની ફાઈનલમાં પહોંચનારી પ્રથમ ટીમ બની ગઈ છે. મેગ લેનિંગની આગેવાની હેઠળ દિલ્હીની ટીમે WPL 2024ની છેલ્લી લીગ મેચમાં ગુજરાત જાયન્ટ્સને 7 વિકેટથી હરાવી પોઈન્ટ ટેબલમાં પ્રથમ સ્થાન મેળવ્યું અને ફાઈનલમાં જગ્યા બનાવી. ગયા વર્ષે પ્રથમ સિઝનમાં દિલ્હીએ ફાઈનલમાં જગ્યા બનાવી હતી પરંતુ ફાઈનલમાં મુંબઈ ઈન્ડિયન્સ સામે હારનો સામનો કરવો પડ્યો હતો.
દિલ્હી અને ગુજરાત વચ્ચે અંતિમ મુકાબલો
તેમના હોમ ગ્રાઉન્ડ અરુણ જેટલી સ્ટેડિયમમાં રમી રહેલી દિલ્હી કેપિટલ્સે ગુજરાતને આસાનીથી હરાવી દીધું હતું. આ મેચમાં ગુજરાતે ટોસ જીતીને પ્રથમ બેટિંગ કરવાનો નિર્ણય લીધો હતો, પરંતુ બેથ મૂનીની આગેવાની હેઠળની ટીમ તેની પસંદગીના નિર્ણયનો ફાયદો ઉઠાવી શકી ન હતી. ગુજરાતની બેટરો મારિજન કેપ (2/17) અને શિખા પાંડે (2/23)ની શક્તિશાળી ઝડપી બોલિંગ જોડી સામે ટકી શકી નહીં.
દિલ્હીએ ગુજરાતને હરાવ્યું
ગુજરાતે માત્ર 16 રનમાં 3 વિકેટ અને 48 રનના સ્કોર સુધી 5 વિકેટ ગુમાવી દીધી હતી. ઓસ્ટ્રેલિયાનો યુવા બેટ્સમેન ફોબી લિચફિલ્ડ જે આ સિઝન પહેલા હરાજીમાં સૌથી વધુ ચર્ચામાં રહી હતી તે ફરી એકવાર નિષ્ફળ ગઈ અને માત્ર 21 રન બનાવી શકી. નીચલા-મધ્યમ ક્રમમાં, ભારતી ફૂલમાલી (42) અને કેથરિન બ્રાઈસ (અણનમ 28) એ 68 રનની મહત્વપૂર્ણ ભાગીદારી કરીને ટીમને વધુ સારી સ્થિતિમાં પહોંચાડી હતી. તેમ છતાં સમગ્ર ટીમ 20 ઓવરમાં 9 વિકેટ ગુમાવીને 126 રન જ બનાવી શકી હતી.
A clinical chase and a superb seven-wicket win!@DelhiCapitals are through to the #TATAWPL Final
Scorecard https://t.co/qXiPrN2sAj#DCvGG pic.twitter.com/q0FnUtJonH
— Women’s Premier League (WPL) (@wplt20) March 13, 2024
દિલ્હી WPLની ફાઈનલમાં
127 રનના ટાર્ગેટનો પીછો કરતા કેપ્ટન લેનિંગ અને શેફાલી વર્માએ દિલ્હી કેપિટલ્સ માટે ફરી મજબૂત શરૂઆત કરી હતી. જો કે, ગેરસમજને કારણે લેનિંગ (18) રનઆઉટ થઈ હતી, જ્યારે એલિસ કેપ્સી ખાતું પણ ખોલી શકી નહીં. આમ છતાં શેફાલીએ જેમિમાહ રોડ્રિગ્ઝ સાથે મળીને ગુજરાતને પુનરાગમન કરવાની કોઈ તક આપી નહીં. શેફાલીએ માત્ર 28 બોલમાં વિસ્ફોટક અડધી સદી ફટકારી હતી. જીતના માત્ર 2 રન પહેલા, શેફાલી 71 રન (37 બોલ, 7 ચોગ્ગા, 5 છગ્ગા) બનાવીને આઉટ થઈ ગઈ હતી, પરંતુ જેમિમાહ (38 અણનમ) એ 14મી ઓવરના પહેલા જ બોલ પર ચોગ્ગો ફટકારીને ટીમને જીત અપાવી હતી. આ જીત સાથે જ દિલ્હી WPLની ફાઈનલમાં પહોંચી હતી.
Roaring into the @DelhiCapitals are one step closer for the ultimate prize #TATAWPL | #Final | #DCvGG pic.twitter.com/Z5KnvUofl9
— Women’s Premier League (WPL) (@wplt20) March 13, 2024
ફાઈનલમાં કોની સાથે થશે ટક્કર?
દિલ્હીએ લીગ તબક્કામાં 8 માંથી 6 મેચ જીતી અને કુલ 12 પોઈન્ટ સાથે પ્રથમ સ્થાન મેળવ્યું. લીગના ફોર્મેટ મુજબ, 5 ટીમોમાંથી પ્રથમ સ્થાન મેળવનારી ટીમને સીધી ફાઈનલમાં પ્રવેશ મળે છે. બીજા અને ત્રીજા સ્થાને રહેલી ટીમો વચ્ચે એલિમિનેટર મેચ રમાય છે. આ વખતે ગત સિઝનની ચેમ્પિયન મુંબઈ ઈન્ડિયન્સ બીજા સ્થાને અને રોયલ ચેલેન્જર્સ બેંગ્લોર ત્રીજા સ્થાને છે. બંને વચ્ચે 15 માર્ચે મુકાબલો થશે અને વિજેતા ટીમ 17 માર્ચે ફાઈનલમાં દિલ્હી સામે ટકરાશે.
આ પણ વાંચો : હેરી બ્રુકે જણાવ્યું IPL છોડવાનું કારણ, દિલ તોડનારી ઘટના બાદ લીધો આ નિર્ણય
