Breaking News: ગુજરાતને હરાવી રોયલ ચેલેન્જર્સ બેંગલુરુ IPL 2026 ફાઈનલમાં પહોંચ્યું, 3 બોલમાં 2 ભૂલોને કારણે GT હારી ગયું

રોયલ ચેલેન્જર્સ બેંગલુરુએ ક્વોલિફાયર-1 માં ગુજરાત ટાઇટન્સને સામે શાનદાર જીત મેળવી IPL 2026 ની ફાઇનલમાં પ્રવેશ કર્યો હતો. ધર્મશાલાના હિમાચલ પ્રદેશ ક્રિકેટ એસોસિએશન સ્ટેડિયમમાં બેંગલુરુએ ગુજરાત ટાઇટન્સને 92 રનથી હરાવ્યું. આ હાર છતાં GT પાસે હજી પણ ફાઈનલમાં પહોંચવાની તક છે. 

RCB એ GT ને 92 રનથી હરાવ્યું

પ્રથમ બેટિંગ કરતા, બેંગ્લોરે 20 ઓવરમાં 254 રન બનાવ્યા. જવાબમાં, ગુજરાત ટાઇટન્સની બેટિંગ સંપૂર્ણપણે નિષ્ફળ સાબિત થઈ, અને તેઓ 162 રનમાં ઓલઆઉટ થઈ ગયા. આ સાથે, તેઓએ ફાઇનલમાં પહોંચવાની પોતાની પહેલી તક ગુમાવી દીધી.

RCB સતત બીજી વખત IPL ફાઈનલમાં 

રોયલ ચેલેન્જર્સ બેંગલુરુએ સતત બીજી વખત અને IPL ઇતિહાસમાં પાંચમી વખત ફાઇનલમાં પ્રવેશ કર્યો છે. હવે આ ટીમ પાસે પોતાનું ટાઇટલ ડીફેન્ડ કરવાની શાનદાર તક છે. ગયા સિઝનમાં, RCB એ પંજાબને હરાવીને પહેલીવાર IPL ચેમ્પિયન બનવાનું ગૌરવ પ્રાપ્ત કર્યું હતું.

બેટ્સમેનોએ RCBની જીતનો પાયો નાખ્યો

RCBના બેટ્સમેનોએ વિજયનો પાયો નાખ્યો હતો. વિરાટ કોહલીએ 25 બોલમાં 43 રનની ઇનિંગ રમીને ટીમને મજબૂત શરૂઆત અપાવી, પરંતુ મિડલ ઓર્ડરમાં આવેલા કેપ્ટન રજત પાટીદારે મેચને એકતરફી બનાવી દીધી. પાટીદારે માત્ર 33 બોલમાં 9 છગ્ગા અને પાંચ ચોગ્ગાની મદદથી અણનમ 93 રન બનાવ્યા હતા. પાટીદારનો સ્ટ્રાઇક રેટ 281 થી વધુ હતો. કૃણાલ પંડ્યાએ પણ 43 રનની ઇનિંગ રમી, જેનાથી RCB એ 254 રનનો રેકોર્ડબ્રેક સ્કોર બનાવ્યો હતો.

ગુજરાતની બેટિંગ પત્તાના મહેલની જેમ ઢેર

255 રનના લક્ષ્યાંક સામે ગુજરાતની બેટિંગ સંપૂર્ણપણે પડી ભાંગી. સાઈ સુદર્શન 14 રન બનાવીને હિટ વિકેટ આઉટ થયો અને કેપ્ટન શુભમન ગિલ માત્ર 2 રન બનાવીને બોલ્ડ થયો. વિકેટકીપર જોસ બટલરે 11 બોલમાં 29 રન બનાવ્યા. નિશાંત સિંધુ 5 અને વોશિંગ્ટન સુંદર 8 રન બનાવીને આઉટ થયા. જેસન હોલ્ડર પોતાનું ખાતું પણ ખોલી શક્યો નહીં. રાહુલ તેવતિયાએ અડધી સદી ફટકારી, પરંતુ અંતે GT ને કારમી હારનો સામનો કરવો પડ્યો. ક્વોલિફાયરમાં, RCBના ફાસ્ટ બોલર જેકબ ડફીએ સૌથી વધુ 3 વિકેટ લીધી. રસિક સલામ દાર અને ભુવનેશ્વર કુમારે પણ 2-2 વિકેટ લીધી હતી.