IPL 2026: રિષભ પંતની ટીમની બદલાઈ ગઈ ઓળખ, લખનૌ સુપર જાયન્ટ્સના નવા લોગો પાછળની શું છે કહાની?
IPL 2026 માં રિષભ પંતના નેતૃત્વ હેઠળની ફ્રેન્ચાઈઝી એક નવી ઓળખ સાથે જોવા મળશે. એમની ટીમના ખેલાડીઓની જર્સી પર હવે નવો લોગો જોવા મળશે. ચાલો જાણીએ કે નવા લોગોમાં શું ખાસ છે.
T20 વર્લ્ડ કપ પછી IPL 2026 શરૂ થશે. જોકે, તે પહેલા, લખનૌ સુપર જાયન્ટ્સે પોતાનો નવો લોગો રજૂ કર્યો છે. રિષભ પંતના નેતૃત્વ હેઠળની આ IPL ફ્રેન્ચાઇઝીએ પોતાની ઓળખ બદલી નાખી છે. આનો અર્થ એ થયો કે જ્યારે LSG ટીમ IPL 2026 માં મેદાનમાં ઉતરશે, ત્યારે તેમની જર્સી પરનો લોગો અલગ હશે. હવે પ્રશ્ન એ છે કે: નવો લોગો કેવો છે? તેની પાછળની કહાની શું છે?
LSG ના નવા લોગો પાછળની કહાની
લખનૌ સુપર જાયન્ટ્સના લોગોમાં પહેલા ફક્ત ગરુડની છબી હતી. જોકે, હવે નવા લોગોમાં ગરુડની સાથે એક હાથીનો પણ સમાવેશ થાય છે. LSG એ નવા લોગોનો એક વીડિયો શેર કર્યો છે, જેમાં સમજાવવામાં આવ્યું કે સૃષ્ટિની શરૂઆત ઉર્જાથી થઈ હતી, અને તે ઉર્જામાંથી આકાશના સ્વામી ગરુડનો જન્મ થયો હતો. વીડિયો અનુસાર, શક્તિના સ્વામી ગજનો જન્મ ગરુડના તેજથી થયો હતો. જ્યારે પૃથ્વી અને આકાશ મળ્યા ત્યારે એક નવો વારસો જન્મ્યો : લખનૌ સુપર જાયન્ટ્સ.
IPLમાં લખનૌ સુપર જાયન્ટ્સની સફર
લખનૌ સુપર જાયન્ટ્સની IPL સફર વિશે વાત કરીએ તો, તેઓએ 2022 માં ડેબ્યૂ કર્યું હતું. આ ટીમ હજુ સુધી એક પણ સિઝન જીતી શકી નથી. 2022 અને 2023 માં તેઓ પ્લેઓફમાં પહોંચ્યા પરંતુ ટાઇટલથી દૂર રહ્યા. ત્યારબાદ, 2024 અને 2025 ની IPL સિઝનમાં લખનૌ સુપર જાયન્ટ્સ સાતમા સ્થાને રહ્યું હતું. હાલમાં, 10 IPL ટીમોમાંથી LSG એકમાત્ર એવી ટીમ છે જે ફાઈનલમાં પહોંચી નથી. આશા છે કે, નવો લોગો તેમનું નસીબ બદલશે.
