Breaking News: સંજુ સેમસને 6 છગ્ગા ફટકાર્યા, 87 રન બનાવી ચેન્નાઈ સુપર કિંગ્સને દિલ્હી સામે અપાવી જીત
DC vs CSK: ચેન્નાઈ સુપર કિંગ્સે દિલ્હી કેપિટલ્સ સામે એકતરફી વિજય મેળવ્યો હતો. સંજુ સેમસને 6 છગ્ગા ફટકાર્યા અને કુલ 87 રન બનાવી CSKની જીતનો પાયો નાખ્યો. સંજુ સેમસનની શાનદાર ઇનિંગના કારણે ચેન્નાઈએ 156 રનનો લક્ષ્યાંક સરળતાથી પ્રાપ્ત કરી લીધો અને દિલ્હી સામે જીત મેળવી.
IPL 2026: જ્યારથી સંજુ સેમસન ચેન્નાઈ સુપર કિંગ્સની જર્સી પહેરે છે, ત્યારથી આ ખેલાડી એક અલગ જ અંદાજમાં જોવા મળે છે. IPL 2026 માં ચેન્નાઈ માટે 2 સદી ફટકારનાર સંજુ સેમસને હવે દિલ્હી કેપિટલ્સ સામે કમાલ કર્યો છે. અરુણ જેટલી સ્ટેડિયમની મુશ્કેલ પિચ પર, સંજુ સેમસને 52 બોલમાં અણનમ 87 રન બનાવ્યા અને ચેન્નાઈ સુપર કિંગ્સને તેમની પાંચમી મેચ જીતવામાં મદદ કરી.
સેમસનના 6 છગ્ગા અને 7 ચોગ્ગા
સંજુ સેમસને તેની ઇનિંગમાં 6 છગ્ગા અને 7 ચોગ્ગા ફટકાર્યા. સેમસને એવી પિચ પર પોતાની છાપ છોડી દીધી જ્યાં કેએલ રાહુલ જેવા બેટ્સમેન પર ટકી શક્યા નહીં. સંજુ ઉપરાંત કાર્તિક શર્માએ પણ અણનમ 41 રન બનાવીને ચેન્નાઈને મેચ જીતાડવામાં મહત્વપૂર્ણ ભૂમિકા ભજવી હતી.
32 બોલમાં અડધી સદી પૂરી કરી
સંજુ સેમસને ચેન્નાઈ સુપર કિંગ્સને ઝડપી શરૂઆત અપાવી. કેપ્ટન ગાયકવાડ 6 રન બનાવીને આઉટ થયો, પરંતુ સેમસને ક્રીઝ પર ટકી રહેવાનું નક્કી કર્યું. એકવાર તે સેટ થઈ ગયો, પછી સેમસને આક્રમક બેટિંગ શરુ કરી. સેમસને અક્ષર પટેલના બોલ પર પહેલો સિક્સર ફટકાર્યો. ત્યારબાદ તેણે કુલદીપ યાદવની બોલિંગમાં ત્રણ સિક્સર ફટકારી. સેમસને નટરાજનની ઓવરમાં બે સિક્સર અને બે ફોર પણ ફટકારી. સેમસને માત્ર 32 બોલમાં પોતાની અડધી સદી પૂરી કરી. સેમસને કાર્તિક શર્મા સાથે મળીને 66 બોલમાં 114 રન બનાવ્યા અને આ અણનમ ભાગીદારીએ દિલ્હીની હાર નિશ્ચિત કરી.
From the start.
Till the end.
It’s our Chettan. #WhistlePodu #DCvCSK pic.twitter.com/BXXONFUgU5— Chennai Super Kings (@ChennaiIPL) May 5, 2026
10 મેચમાં 402 રન બનાવ્યા
સંજુ સેમસને એકલા હાથે ચેન્નાઈ સુપર કિંગ્સની બેટિંગ લાઇન-અપને ટકાવી રાખી છે. જમણા હાથના આ બેટ્સમેને આ સિઝનમાં 10 મેચમાં 402 રન બનાવ્યા છે. સેમસનની બેટિંગ સરેરાશ 57.4 છે. તેણે અત્યાર સુધીમાં બે સદી અને એક અડધી સદી ફટકારી છે. સેમસનનો સ્ટ્રાઇક રેટ પણ 167 થી વધુ છે.
દિલ્હી સામે અણનમ 87 રન
સંજુ સેમસનની શરૂઆત સિઝનમાં ખરાબ રહી હતી. તે પહેલી ત્રણ મેચમાં ડબલ ડીજીટ સુધી પણ પહોંચી શક્યો ન હતો. જોકે, બાદમાં તેણે દિલ્હી કેપિટલ્સ સામે અણનમ 115 રન બનાવ્યા. સેમસન આગામી બે મેચમાં કંઈ ખાસ કરી શક્યો નહીં, પરંતુ તેણે મુંબઈ સામે બીજી અણનમ સદી ફટકારી. સતત બે મેચમાં નિષ્ફળતા બાદ સેમસને ફરી દિલ્હી સામે અણનમ 87 રન બનાવ્યા.
