ICC U-19 World Cup: અમદાવાદમાં વર્લ્ડ ચેમ્પિયન ટીમનું સન્માન થશે, BCCI ની મોટી જાહેરાત

અંડર 19 વર્લ્ડ કપ (ICC Under 19 World Cup 2022) માં તિરંગો લહેરાવનાર ટીમ ઈન્ડિયા (Team India) પર હવે ઈનામોનો વરસાદ થવા જઈ રહ્યો છે. BCCIએ જાહેરાત કરી છે કે વર્લ્ડ કપ જીતનાર યશ ઢુલ (Yash Dhull) ની ટીમનું અમદાવાદમાં સન્માન કરવામાં આવશે. રવિવારે, BCCIએ ટીમના દરેક સભ્ય માટે 40 લાખ રૂપિયા અને સપોર્ટ સ્ટાફના દરેક સભ્યને 25 લાખ રૂપિયાના રોકડ ઈનામની જાહેરાત કરી હતી. શનિવારે ફાઇનલમાં ઇંગ્લેન્ડ પર વિજય નોંધાવ્યા બાદ ભારતીય ટુકડી ગુયાનામાં ભારતીય હાઇ કમિશનરને મળી હતી. કેરેબિયનમાં સફળતાની ઉજવણી કરવા માટે વધુ સમય નથી અને ટીમ રવિવારે સાંજે ભારતના લાંબા પ્રવાસ માટે રવાના થશે. ટીમ એમ્સ્ટરડેમ અને બેંગ્લોર થઈને અમદાવાદ પહોંચશે.

ભારતીય વરિષ્ઠ ટીમ પણ હાલમાં અમદાવાદમાં વેસ્ટ ઈન્ડિઝ સામે ત્રણ મેચની વનડે શ્રેણી રમી રહી છે. વરિષ્ઠ ટીમ જૈવિક રીતે સુરક્ષિત વાતાવરણમાં છે અને અંડર-19 ખેલાડીઓને સિનિયર ક્રિકેટરો સાથે વાતચીત કરવાની તક મળશે કે કેમ તે હજુ સુધી જાણી શકાયું નથી. BCCIના અધિકારીએ કહ્યું, “છોકરાઓનું શેડ્યૂલ ખૂબ જ વ્યસ્ત હતું અને તેમને આરામ કરવા માટે બહુ ઓછો સમય મળ્યો. ભારત પહોંચ્યા બાદ તેમને આરામ કરવાની થોડી તક મળશે.

ફાઈનલ જીત્યા પછી, ટીમ એન્ટીગુઆથી ગુયાના જવા રવાના થઈ જ્યાં ભારતીય હાઈ કમિશનર કેજે શ્રીનિવાસે તેમનું સન્માન કર્યું જેઓ ક્રિકેટના ચાહક છે. થાકેલા હોવા છતાં, ભારતીય ખેલાડીઓએ સમારોહમાં હાજર રહેલા વેસ્ટ ઈન્ડિઝના ભૂતપૂર્વ ફાસ્ટ બોલર સર કર્ટલી એમ્બ્રોઝ સાથે તસવીરો પડાવી હતી. દિલ્હીના રહેવાસી સુકાની યશ ઢુલના નેતૃત્વમાં ભારતે આ ખિતાબ જીત્યો હતો. ટીમના મુખ્ય કોચની જવાબદારી હૃષિકેશ કાનિટકરના હાથમાં હતી.

VVS લક્ષ્મણનું જબરદસ્ત યોગદાન

નેશનલ ક્રિકેટ એકેડમીના વડા VVS લક્ષ્મણ પણ ટીમને માર્ગદર્શન આપવા માટે કેરેબિયનમાં હાજર હતા. ટીમના ખેલાડીઓ જ્યારે કોવિડ-19થી સંક્રમિત થયા ત્યારે તેમની સંભાળ રાખવામાં મહત્વની ભૂમિકા ભજવી હતી. ઢૂલ અને વાઈસ-કેપ્ટન શેખ રશીદ સહિત પાંચ ભારતીય ખેલાડીઓ કોવિડ-19 પોઝિટિવ હોવાનું જાણવા મળ્યું હતું. છેલ્લી ચાર ટુર્નામેન્ટની ફાઇનલમાં જગ્યા બનાવનાર ભારત માટે આ રેકોર્ડ પાંચમું ટાઇટલ છે.

આ પણ વાંચોઃ IND vs WI: અમદાવાદ વન ડે માં ટીમ ઇન્ડિયાનો વેસ્ટ ઇન્ડિઝ સામે 6 વિકેટે વિજય, રોહિત શર્માની ફીફટી

આ પણ વાંચોઃ IND VS WI: વિરાટ કોહલીએ ફ્લોપ હોવા છતાં તોડ્યો વર્લ્ડ રેકોર્ડ, સચિનને ​​25 ઇનિંગ્સ પહેલા પાછળ રાખ્યો