બાંગ્લાદેશ ક્રિકેટ ટીમે (Bangladesh Cricket Team) ઢાકામાં ચોથી T20 મેચમાં ન્યૂઝીલેન્ડ (New Zealand Cricket Team)ને છ વિકેટે હરાવ્યું હતું. આ જીત સાથે તેઓએ પાંચ મેચની શ્રેણીમાં 3-1ની અજેય લીડ મેળવી લીધી છે. પ્રથમ બેટિંગ કરતા ન્યૂઝીલેન્ડની ટીમ 93 રનમાં સમેટાઈ ગઈ હતી. જવાબમાં બાંગ્લાદેશે કેપ્ટન મહમુદુલ્લાહ રિયાધના અણનમ 43 રનની મદદથી ચાર વિકેટે 96 રન બનાવીને છ વિકેટથી જીત નોંધાવી હતી.
બાંગ્લાદેશે પાંચ બોલ બાકી રાખીને લક્ષ્ય હાંસલ કરી લીધુ હતુ. બાંગ્લાદેશની જીતના હિરોમાં સ્પિનર નસૂમ અહમદ અને મધ્યમ ઝડપી બોલર મુસ્તફિઝુર રહેમાન પણ સામેલ હતા. બંનેએ ચાર-ચાર વિકેટ લીધી. તેમની સામે ન્યૂઝીલેન્ડની ટીમ માત્ર 19.3 ઓવરમાં જ સમેટાઈ ગઈ હતી.
પ્રથમ બેટિંગ કરતા ન્યૂઝીલેન્ડના બેટ્સમેનો ફરી એક વખત નિષ્ફળ રહ્યા હતા. તેના માટે કેપ્ટન ટોમ લેથમે 21 અને વિલ યંગે 46 રન બનાવ્યા હતા. બાકીના બેટ્સમેનો આવી રમત ન બતાવી શક્યા. બાંગ્લાદેશના નસૂમ અહમદે ચાર ઓવરમાં માત્ર 10 રન આપીને ચાર વિકેટ લીધી હતી. તેણે બે ઓવર મેઈડન પણ ફેંકી હતી. તે જ સમયે મુસ્તફિઝુર રહેમાને 3.3 ઓવરમાં 12 રન આપીને ચાર બેટ્સમેનોને પેવેલિયન તરફ ચાલતા કરી દીધા હતા.
જેના જવાબમાં બાંગ્લાદેશની વિકેટ પણ સસ્તામાં પડી હતી. પરંતુ કેપ્ટન મહમુદુલ્લાહે મામલો સંભાળી લીધો હતો. તેણે પોતાની ઈનિંગમાં 48 બોલનો સામનો કર્યો અને બે સિક્સર ફટકારી. આ સાથે જ ઓપનર મોહમ્મદ નઈમે 35 બોલમાં 29 રનની ઈનિંગ રમી હતી. આ સાથે બાંગ્લાદેશે સરળતાથી લક્ષ્ય હાંસલ કર્યું. બંને ટીમો વચ્ચે પાંચમી મેચ શુક્રવારે રમાશે. યજમાન બાંગ્લાદેશે પ્રથમ વખત T20 ફોર્મેટમાં ન્યૂઝીલેન્ડને હરાવ્યું છે.
Bangladesh hold their nerves to win the fourth T20I against New Zealand with six wickets in hand!
With the victory, they take an unassailable 3-1 lead in the series 👏#BANvNZ | https://t.co/qMoI1PyxCA pic.twitter.com/BVHC6nD3c8
— ICC (@ICC) September 8, 2021
આ શ્રેણી પહેલા બાંગ્લાદેશની ટીમ T20માં ક્યારેય જીતી શકી ન હતી. બાંગ્લાદેશે શ્રેણીની પ્રથમ અને બીજી મેચ જીતીને 2-0ની લીડ મેળવી હતી. પરંતુ ત્રીજી મેચમાં ન્યૂઝીલેન્ડે પુનરાગમન કર્યું અને શ્રેણી 2-1 પર લાવી. બાંગ્લાદેશી ટીમે તાજેતરના દિવસોમાં પોતાની હોમ પીચનો ભરપૂર ફાયદો ઉઠાવતા શાનદાર રમત દર્શાવી છે. તેણે થોડા દિવસો પહેલા જ શ્રેણીમાં ઓસ્ટ્રેલિયાને 4-1થી હરાવ્યું હતું. તેણે ઓસ્ટ્રેલિયા સામે પ્રથમ વખત શ્રેણી જીતી હતી. આ પરિણામો T20 વર્લ્ડ કપ પહેલા ટીમના આત્મવિશ્વાસ પર મોટી અસર કરી શકે છે.
Published On - 11:52 pm, Wed, 8 September 21