Asia Cup 2025 : સૂર્યકુમાર યાદવ અને સલમાન આગાને હાથ મિલાવતા કોણે રોક્યા ? ખૂલી ગયું રહસ્ય!

14 સપ્ટેમ્બરના રોજ ભારત અને પાકિસ્તાન વચ્ચે રમાયેલી મેચમાં, બંને ટીમોના ખેલાડીઓ દ્વારા હાથ મિલાવવાનો ઈનકાર એક મુખ્ય મુદ્દો બન્યો. PCBએ મેચ રેફરી એન્ડી પાયક્રોફ્ટ પર બંને ટીમોને આમ કરવાથી રોકવાનો આરોપ લગાવ્યો હતો, પરંતુ હવે એક એવો ખુલાસો સામે આવ્યો છે જે તમને ચોંકાવી દેશે.

ખેલાડીઓએ હાથ ન મિલાવ્યો

મીડિયા રિપોર્ટ્સ અનુસાર, મેચ રેફરી એન્ડી પાયક્રોફ્ટ આ મામલે દોષિત નથી કારણ કે તેમણે તેમને આપવામાં આવેલા આદેશોનું પાલન કર્યું હતું. જો મીડિયા રિપોર્ટ્સ પર વિશ્વાસ કરવામાં આવે તો, એન્ડી પાયક્રોફ્ટને એશિયન ક્રિકેટ કાઉન્સિલ દ્વારા જ આદેશ આપવામાં આવ્યો હતો કે ભારત અને પાકિસ્તાનના કેપ્ટનોએ ટોસ દરમિયાન હાથ મિલાવવા નહીં.

મેચ રેફરીએ ACCના નિર્દેશોનું પાલન થયું

એક અહેવાલ મુજબ, ભારત-પાકિસ્તાન મેચના એક દિવસ પછી, 15 સપ્ટેમ્બરના રોજ, PCBએ ICCને ઈમેઈલ કરીને આરોપ લગાવ્યો કે મેચ રેફરીએ ટોસ દરમિયાન આચારસંહિતાનું ઉલ્લંઘન કર્યું છે. ICCએ તરત જ આ મામલાની તપાસ કરી અને PCBને ઈમેઈલ દ્વારા જવાબ આપ્યો કે પાયક્રોફ્ટે પોતાની ફરજો સારી રીતે બજાવી છે અને આચારસંહિતાનું ઉલ્લંઘન કર્યું નથી. ઈમેઈલમાં એમ પણ કહેવામાં આવ્યું હતું કે તે ટોસ દરમિયાન હાથ ન મિલાવવા અંગે ACCના નિર્દેશોનું પાલન કરી રહ્યો છે.

PCBના વડા મોહસીન નકવી ફસાઈ ગયા

રસપ્રદ વાત એ છે કે ACCના પ્રમુખ PCBના વડા મોહસીન નકવી પોતે છે. જો ACCએ આ આદેશ જારી કર્યો છે, તો મોહસીન નકવી સીધા જવાબદાર છે. રિપોર્ટમાં દાવો કરવામાં આવ્યો છે કે ઈમેઈલમાં, ICCએ પાયક્રોફ્ટની પ્રશંસા કરી હતી, અને કહ્યું હતું કે તેમણે આ બાબતને સારી રીતે સંભાળી હતી અને ટેલિવિઝન પર કોઈપણ શરમજનક પરિસ્થિતિઓ ટાળી હતી.

મેચ રેફરીએ માફી નહીં માંગી

એક અહેવાલ મુજબ, PCB ICCના પ્રતિભાવથી નારાજ હતું અને એશિયા કપમાંથી ખસી જવાની ધમકી આપી હતી. PCBએ કહ્યું હતું કે જો પાયક્રોફ્ટને તેમના રોસ્ટરમાંથી દૂર કરવામાં નહીં આવે, તો તેઓ ટુર્નામેન્ટમાંથી ખસી જશે. જોકે, ICC પોતાના વલણ પર અડગ રહ્યું હતું, અને પુનરાવર્તિત કર્યું હતું કે મેચ રેફરી કોડ ઉલ્લંઘન માટે દોષિત નથી અને તેઓ કોઈપણ ટીમના કહેવાથી અધિકારીને બદલી શકતા નથી, કારણ કે આનાથી ખોટો સંદેશ પહોંચશે.

PCBએ બીજો ઈમેઈલ મોકલ્યો

આ પ્રતિભાવ છતાં, 17 સપ્ટેમ્બરના રોજ, PCBએ બીજો ઈમેઈલ મોકલ્યો, જેમાં જણાવાયું હતું કે ભારત-પાકિસ્તાન મેચ દરમિયાન અને પછી કોડ ઉલ્લંઘન થયું હતું અને ફરીથી મેચ રેફરીની ભૂમિકા પર પ્રશ્ન ઉઠાવ્યો હતો. જવાબમાં, ICCએ PCB પાસેથી વધુ માહિતી માંગી હતી, જે હજુ સુધી પૂરી પાડવામાં આવી નથી.

તો UAE-પાકિસ્તાન મેચ કેવી રીતે થઈ?

17 સપ્ટેમ્બરના રોજ પાકિસ્તાનની ટીમ સમયસર મેદાન માટે હોટેલ છોડી ન હતી, અને જ્યારે પરિસ્થિતિ નિયંત્રણ બહાર જવા લાગી, ત્યારે મેચ રેફરી એન્ડી પાયક્રોફ્ટ પોતે એક સૂચન લઈને આવ્યા. તેમણે પાકિસ્તાની કેપ્ટન સલમાન આગા અને મેનેજર નવીઝ અકરમ ચીમા સાથે બેઠક બોલાવી.

વાયરલ વીડિયોમાં પાકિસ્તાનનો પર્દાફાશ

કોચ માઈક હેસન પણ દુબઈ ઈન્ટરનેશનલ સ્ટેડિયમમાં મેચ રેફરીના રૂમમાં હાજર હતો, અને પાયક્રોફ્ટે ગેરસમજ અંગે ચર્ચા કરી હોવાના અહેવાલ છે. અહેવાલો સૂચવે છે કે પાયક્રોફ્ટે માફી માંગી નથી. મીટિંગનો એક વીડિયો, જેનો કોઈ અવાજ નથી, વાયરલ થઈ રહ્યો છે. PCBનો દાવો છે કે મેચ રેફરીએ માફી માંગી હતી, પરંતુ હવે આ અહેવાલે પાકિસ્તાનનો પર્દાફાશ કર્યો છે.

આ પણ વાંચો: IND vs OMA : ટીમ ઈન્ડિયા હવે દુબઈ નહીં, આ મેદાન પર રમશે, જાણો લાઈવ મેચ ક્યાં જોઈ શકશો

ક્રિકેટ સહિત રમતગમતના દરેક સમાચાર વાંચવા અહીં ક્લિક કરો