ખાતું ખોલાવ્યા વિના 6 બેટ્સમેન આઉટ, ક્રિકેટમાં ફરી શરમજનક રેકોર્ડનું પુનરાવર્તન
UAE અને ઓમાનની ટીમો વચ્ચે રમાયેલી ICC ક્રિકેટ વર્લ્ડ કપ લીગ-2ની મેચ રેકોર્ડબ્રેક રહી હતી. આ મેચમાં UAEની ટીમે પાકિસ્તાનના એક શરમજનક રેકોર્ડની બરોબરી કરી હતી, જેના કારણે ઓમાને 4 વિકેટે મેચ જીતી લીધી હતી.
ઓમાનની ટીમે ICC ક્રિકેટ વર્લ્ડ કપ લીગ-2માં અત્યાર સુધી ખૂબ જ શાનદાર પ્રદર્શન કર્યું છે. ગુરુવારે સંયુક્ત આરબ અમીરાત (UAE) સામે રમાયેલી મેચમાં પણ ઓમાનની ટીમે એકતરફી જીત મેળવી હતી. પરંતુ UAEની ટીમ આ મેચમાં સંપૂર્ણ રીતે ફ્લોપ રહી હતી. ટીમનો કોઈપણ બેટ્સમેન લાંબા સમય સુધી ક્રિઝ પર ટકી શક્યો નહીં, જેના કારણે UAE ટીમનું નામ શરમજનક રેકોર્ડના લિસ્ટમાં સામેલ થઈ ગયું. આ શરમજનક લિસ્ટમાં અગાઉ માત્ર પાકિસ્તાન, દક્ષિણ આફ્રિકા અને ઝિમ્બાબ્વેની ટીમો જ હતી.
6 બેટ્સમેનો 0 પર આઉટ
ઓમાનના અલ અમેરાત ક્રિકેટ ગ્રાઉન્ડમાં બંને ટીમો વચ્ચે રમાયેલી આ મેચમાં ઓમાનએ ટોસ જીતીને પ્રથમ બોલિંગ કરવાનું પસંદ કર્યું અને આ નિર્ણય સાચો સાબિત થયો. આ ઈનિંગ દરમિયાન UAEના 6 બેટ્સમેન પોતાનું ખાતું ખોલાવી શક્યા ન હતા. તમને જણાવી દઈએ કે, ODI ક્રિકેટના ઈતિહાસમાં આ માત્ર છઠ્ઠી વખત બન્યું હતું, જ્યારે કોઈ ટીમના 6 બેટ્સમેનો ODIમાં ખાતું ખોલાવ્યા વિના પેવેલિયન પરત ફર્યા હતા. આ પહેલા પાકિસ્તાનની ટીમ ત્રણ વખત આ શરમજનક રેકોર્ડ બનાવી ચૂકી છે. તે જ સમયે, દક્ષિણ આફ્રિકા અને ઝિમ્બાબ્વેની ટીમો પણ એક વખત આવી સ્થિતિનો સામનો કરી ચુકી છે.
UAEની ટીમ 78 રનમાં ઓલઆઉટ
UAEની આ ઈનિંગમાં આર્યનશ શર્મા, વિષ્ણુ સુકુમારાની, કેપ્ટન રાહુલ ચોપરા, અયાન ખાન, ધ્રુવ પરાશર અને રાહુલ ભાટિયા ખાતું ખોલાવ્યા વિના આઉટ થઈ ગયા હતા. જેના કારણે પ્રથમ બેટિંગ કરતા UAEએ 25.3 ઓવરમાં 10 વિકેટ ગુમાવીને માત્ર 78 રન બનાવ્યા હતા. આ મેચમાં ઓમાન તરફથી શકીલ અહેમદ સૌથી સફળ બોલર હતો. શકીલ અહેમદે પોતાની 10 ઓવરમાં માત્ર 23 રન આપ્યા અને 5 બેટ્સમેનોને પોતાનો શિકાર બનાવ્યા. આ ઉપરાંત જય ઓડેદરા પણ 2 વિકેટ લેવામાં સફળ રહ્યો હતો. મુજાહિર રઝા અને સમય શ્રીવાસ્તવને પણ એક-એક સફળતા મળી.
ઓમાનની ટીમે મેચ 4 વિકેટે જીતી
જવાબમાં 79 રનના લક્ષ્યાંકનો પીછો કરવા ઉતરેલી ઓમાનની ટીમે 24.1 ઓવરમાં 6 વિકેટ ગુમાવીને 79 રન બનાવી મેચ જીતી લીધી હતી. ઓમાન માટે આમિર કલીમે સૌથી વધુ 32 રનની ઈનિંગ રમી જેમાં 2 ફોર અને 3 સિક્સ સામેલ હતી. આ સાથે જ હમ્માદ મિર્ઝાએ પણ 20 રનનું યોગદાન આપ્યું હતું. બીજી તરફ UAE માટે બાસિલ હમીદે સૌથી વધુ 3 અને અયાન ખાને 2 વિકેટ લીધી હતી, પરંતુ આ ટીમની જીત માટે પૂરતી ન હતી.
આ પણ વાંચો: WPL 2025 : વિમેન્સ પ્રીમિયર લીગની રીટેન્શન લિસ્ટ જાહેર, 5 ટીમોએ આ ખેલાડીઓને કર્યા બહાર
ક્રિકેટ સહિત રમતગમતના દરેક સમાચાર વાંચવા અહીં ક્લિક કરો
