Stock Market: આ 5 બેંક શેરમાં 40% સુધી રિટર્નના સંકેત, બ્રોકરેજે આપ્યા ‘નવા ટાર્ગેટ’
ભારતીય બેન્કિંગ સેક્ટર અત્યારે ઘણા પડકારોનો સામનો કરી રહ્યું છે. જો કે, એક અગ્રણી બ્રોકરેજ હાઉસના તાજેતરના રિપોર્ટમાં રોકાણકારો માટે સારા સમાચાર સામે આવ્યા છે.
ભારતીય બેન્કિંગ સેક્ટર અત્યારે ઘણા પડકારોનો સામનો કરી રહ્યું છે. વૈશ્વિક સ્તરે ચાલુ તણાવ અને સપ્લાય સંબંધિત આંચકાઓની સાથે સિસ્ટમમાં લિક્વિડિટી (રોકડ પ્રવાહ)ની અછતે સેક્ટર પર દબાણ વધારી દીધું છે. આ હોવા છતાં, Ambit Institutional Equities ના તાજેતરના રિપોર્ટમાં કહેવામાં આવ્યું છે કે, આગળ ક્રેડિટ ગ્રોથ 11 થી 13 ટકાની વચ્ચે રહી શકે છે.
રિપોર્ટ અનુસાર બેન્કિંગ સેક્ટર અત્યારે એક મોટી સમસ્યા સામે ઝઝૂમી રહ્યું છે, જેને 'ડિપોઝિટ પેરાડોક્સ' કહેવામાં આવ્યું છે. નાણાકીય વર્ષ 2026 ના પહેલા 9 મહિનામાં ક્રેડિટ ગ્રોથ લગભગ 12.2 ટકા રહ્યો, જેને રિટેલ લોન, એમએસએમઈ (MSME) સેક્ટર અને કોર્પોરેટ લોનની રિકવરીથી ટેકો મળ્યો. રિપોર્ટનું માનવું છે કે, જો વૈશ્વિક પરિસ્થિતિ સામાન્ય રહેશે તો આ ગતિ આગળ પણ જળવાઈ શકે છે. બીજું કે, જો વૈશ્વિક દબાણ વધશે તો તેમાં થોડો ઘટાડો પણ જોવા મળી શકે છે.
બેન્કના માર્જિન પર છેલ્લા કેટલાક સમયથી દબાણ બનેલું છે પરંતુ રિપોર્ટ મુજબ આ સ્થિતિ વર્ષ 2027 ના પ્રથમ અર્ધ-વાર્ષિક ગાળા સુધી સ્થિર રહી શકે છે. ખાનગી બેન્કો આ બાબતમાં સરકારી બેન્કો કરતા સારી સ્થિતિમાં છે, કારણ કે તેમની પાસે વધુ સારું રિટર્ન અને વ્યાજ દરોને સંભાળવાની ક્ષમતા છે. આ સિવાય બેન્કિંગ સેક્ટરની એસેટ ક્વોલિટી પણ મજબૂત બનેલી છે, જ્યાં બેડ લોનનું સ્તર લગભગ 2.2 ટકા સુધી આવી ગયું છે.
આ લિસ્ટમાં મોટાભાગની અગ્રણી બેંકો માટે 'BUY' રેટિંગ આપવામાં આવ્યું છે. સ્ટેટ બેંક ઓફ ઇન્ડિયા (SBI) માટે 1,150 રૂપિયાનો ટાર્ગેટ અને 13% ના વધારાની શક્યતા છે, જ્યારે ICICI બેંક માટે 1,550 રૂપિયાનો ટાર્ગેટ અને 27% ના વધારાનો અંદાજ છે. એક્સિસ બેંક 1,400 રૂપિયાના ટાર્ગેટ સાથે 17% અને HDFC બેંક 2,050 રૂપિયાના ઊંચા ટાર્ગેટ સાથે 40% ના વધારાનો સંકેત આપી રહી છે. આ ઉપરાંત બેંક ઓફ બરોડા (28% વધારો), ફેડરલ બેંક (19% વધારો), કરૂર વૈશ્ય બેંક (17% વધારો) અને ઉજ્જીવન સ્મોલ ફાઇનાન્સ બેંક (26% વધારો) માટે પણ ખરીદીની સલાહ આપવામાં આવી છે.
બીજી તરફ, અમુક બેંકો અને નાણાકીય સંસ્થાઓ માટે 'SELL' (વેચવા) નું રેટિંગ છે. સીટી યુનિયન બેંક (ટાર્ગેટ 260), કોટક મહિન્દ્રા બેંક (ટાર્ગેટ 380) અને ઇક્વિટાસ સ્મોલ ફાઇનાન્સ બેંક (ટાર્ગેટ 58) માં થોડો વધારો હોવા છતાં વેચાણની સલાહ છે. વધુમાં RBL બેંક, બંધન બેંક, AU સ્મોલ ફાઇનાન્સ બેંક અને SBI કાર્ડના ભાવમાં ઘટાડો થવાની સંભાવના જોવામાં આવી રહી છે. ખાસ કરીને બંધન બેંકમાં 11% અને RBL બેંકમાં 7% ના ઘટાડાનો અંદાજ રાખવામાં આવ્યો છે.
Ambit ના રિપોર્ટમાં રોકાણની દૃષ્ટિએ મોટી ખાનગી બેન્કોને વધુ પસંદ કરવામાં આવી છે. રિપોર્ટ અનુસાર એચડીએફસી (HDFC) બેન્ક સૌથી ઉપર છે, ત્યારબાદ આઈસીઆઈસીઆઈ (ICICI) બેન્ક અને પછી એક્સિસ બેન્ક તેમજ એસબીઆઈ (SBI) નો નંબર આવે છે. રિપોર્ટનું માનવું છે કે, સરકારી બેન્કોના શેરોમાં તાજેતરની તેજી તેમના અસલી પ્રદર્શન કરતા વધુ દેખાઈ રહી છે.
રિપોર્ટમાં એવું પણ કહેવામાં આવ્યું છે કે, આવનારા સમયમાં બેન્કિંગ સેક્ટરની ગ્રોથ થોડી ધીમી પડી શકે છે અને કમાણીની રફ્તાર પણ પહેલાની સરખામણીએ ઘટી શકે છે. જો કે, લાંબાગાળે સેક્ટરની સ્થિતિ મજબૂત રહેશે પરંતુ વૈશ્વિક તણાવ અને કોઈપણ પ્રકારના કડક નિયમનકારી નિર્ણયો આ સમગ્ર અનુમાન માટે મોટું જોખમ બની શકે છે.
