Year Ender 2024: ગુજરાતમાં બનેલી ગોઝારી ઘટનાઓ ! અનેક લોકોએ પોતાના વ્હાલસોયા ગુમાવ્યા, જુઓ તસવીરો
ગુજરાત માટે વર્ષ 2024માં કેટલાક ગોઝારી ઘટનાઓ બની છે. જેમાં અનેક લોકોના ઘરના ચિરાગ બુઝાઈ ગયા છે. રાજ્યમાં મોટી બનેલી કેટલીક ઘટનાઓમાં નિર્દોશ લોકોએ જીવ ગુમાવ્યા છે. જેના પડઘા દેશભરમાં પડ્યા છે. ગુજરાતમાં બનેલી હરણી બોટકાંડ અને રાજકોટ અગ્નિકાંડના પડઘા રાજ્યસરકારથી લઈને કેન્દ્ર સરકાર સુધી પડ્યા હતા.
વડોદરામાં 18 જાન્યુઆરી 2024માં હરણી તળાવ ખાતે બની હતી. જેમાં ન્યૂ સનરાઈઝ શાળાના નાના બાળકોને લઈને પિકનીક માટે લાવવામાં આવ્યા હતા. જેમાં 15 બાળકો અને 2 શિક્ષકોનું તળાવમાં ડૂબી જવાથી મોત થયુ હતુ.આ ઘટનાના પગલે 19 જેટલા લોકો સામે ફરિયાદ નોંધવામાં આવી હતી. હરણી બોટકાંડ થતા સરકાર દ્વારા રાજ્યમાં આવેલા તમામ જળાશયો પર બોટ રાઈડ સહિતની પ્રવૃતિઓ પર પ્રતિબંધ લગાવવામાં આવ્યો હતો. શિક્ષણ વિભાગની મંજૂરી વગર જ ન્યૂ સનરાઈઝ શાળાના વિદ્યાર્થીઓને પિકનિક પર લઈ જવામાં આવ્યા હતા. તે સમયે આ દુર્ઘટના બની હતી. આ ઘટનામાં મોટી વાત એ છે કે બોટ રાઈડ કોઈ પણ સેફ્ટી વગર જ કરાવવામાં આવી હતી. જેના પગલે 15 બાળકો સહિત 2 શિક્ષકના કરુણ મોત થયા હતા.
ગુજરાતમાં 17 એપ્રિલ 2024ના રોજ અમદાવાદ – વડોદરા એક્સપ્રેસ હાઈવે પર ટ્રેલર અને કાર વચ્ચે ગમખ્વાર અકસ્માત સર્જાયો હતો. જેમાં 10 લોકોના મોત નિપજ્યાં હતા. અમદાવાદ – વડોદરા હાઈવે પર ટ્રેલર પાછળ કાર ઘુસી જતા ગોઝારો અકસ્માત સર્જાયો હતો. અકસ્માત સર્જાતા તાત્કાલિક રાહદારીઓએ 108 એમ્બ્યુલન્સને જાણ કરી હતી. જેના પગલે 108 ની બે એમ્બ્યુલન્સ ઘટના સ્થળે પહોંચી હતી. આ સાથે જ એક્સપ્રેસ હાઈવે ની પેટ્રોલિંગની ટીમ પણ ઘટના સ્થળે પહોંચી હતી. અકસ્માતમાં જીવ ગુમાવેલ તમામ મૃતકોના મૃતદેહનુ પીએમ નડિયાદ સિવિલ હોસ્પિટલ ખાતે કરવામાં આવ્યુ હતુ.
રાજકોટમાં નાનામોવા રોડ પર ગેમઝોનમાં તારીખ 25 મે 2024ના રોજ બપોર પછી ભીષણ આગ લાગી હતી. જેમાં છેલ્લે મળેલા અહેવાલ અનુસાર 33 લોકો જીવતા બળીને ખાક થઈ ગયા હતા. આ અગાઉ 24 મે 2019ના રોજ સુરતમાં તક્ષશિલા કાંડ બન્યો હતો. જેના 5 વર્ષ પછી ફરી આવી ઘટના રાજકોટમાં બની હતી. 1 કિલોમીટર સુધી આગના ધુમાડા દેખાયા હતા. આ અગ્નિકાંડમાં સૌથી મોટી બેદરકારીએ હતી કે, ગેમઝોનમાં ફાયર NOC જ ન હતું. પ્રત્યક્ષદર્શી વ્યક્તિએ નિવેદનો પણ આપ્યા હતા કે, ફાયર અલાર્મ પણ સિસ્ટમ નહોતી. આ ઘટનાના ધ્યાને રાખતા સરકારે પાંચ સભ્યોની સ્પેશયલ ઈન્વેસ્ટીગેશન ટીમને તપાસના આદેશ સોંપવામાં આવ્યો હતો. જેમાં અનેક ખુલાસા થયા હતા. જેના પગલે લાંચિયા અધિકારીઓ સહિત TPO સાગઠિયાની ધરપકડ કરી તપાસ હાથ ધરવામાં આવી હતી. ફાયર વિભાગ દ્વારા ગુજરાતભરની શાળાઓ, હોટલ, રહેણાંક વિસ્તારો સહિતની જગ્યાઓ પર ફાયર NOC અંગે તવાઈ હાથ ધરવામાં આવી હતી. જેના પગલે રાજકોટમાં 100 જેટલી શાળાઓને સીલ કરવામાં પણ આવતી હતી. ટીઆરપી ગેમ ઝોનમાં જનરેટર માટે 1500 થી 2000 લિટર ડીઝલ, ગો કાર રેસિંગ માટે 1000 થી 1500 લિટર પેટ્રોલનો સંગ્રહ કરવામાં આવ્યું હતું. જેના કારણે આગ એટલી બધી ફેલાઈ ગઈ હતી કે આખું માળખું બળીને રાખ થઈ ગયું હતું. ગેમ ઝોનમાંથી બહાર નીકળવા અને પ્રવેશવા માટે 6 થી 7 ફૂટનો એક જ રસ્તો હતો. આજે એન્ટ્રી માટે 99 રૂપિયાની સ્કીમ હતી જેના કારણે અકસ્માત સમયે ગેમ ઝોનમાં મોટી સંખ્યામાં લોકો હાજર હતા.
સાબરકાંઠાના હિંમતનગરમાં 25 સપ્ટેમ્બર 2024ના રોજ ભયંકર અકસ્માત સર્જાયો હતો. શામળાજીથી અમદાવાદ કારમાં જઈ રહેલા પરિવારને અકસ્માત નડ્યો હતો. કાર ટ્રકની પાછળ ઘુસી ગઇ હતી. આ અકસ્માતમાં કારના ટુકડે ટુકડા થઈ ગયા હતા, જ્યારે અંદર બેઠેલા 7 લોકોના ઘટનાસ્થળે જ મોત થયા હતા. આ તમામ લોકોને કાપીને કારની બહાર કાઢવાની ફરજ પડી હતી. કાર ચાલકને ઊંઘ આવતી હોવાને કારણે આ અકસ્માત થયો હોવાનો સામે આવ્યુ હતુ.
વડોદરામાં બીજા નોરતાના દિવસે ભાયલીમાં એક સગીરા પર 2 નરાધમોએ દુષ્કર્મ આચર્યું હોવાની ઘટના બનતા ગુજરાતભરમાં ભયનો માહોલ સર્જાયો હતો. ભાયલીમાં સગીરા સાથે તેનો મિત્ર ડિવાઈડર પર બેસી વાતો કરી રહ્યાં હતા. ત્યારે બાઈક પર આવેલા નરાધમોએ તેમની સાથે અભદ્ર ભાષામાં વાતચીત કરી હતી. સગીરા અને તેના મિત્રએ વિરોધ કરતા એક આરોપીએ સગીરાના મિત્રને રોકી રાખ્યો હતો. જ્યારે અન્ય 2 નરાધમોએ સગીરા પર દુષ્કર્મ આચર્યું હતુ. તેના બાદ પોલીસ સ્ટેશનમાં ફરીયાદ નોંધાવતા પોલીસે વધુ તપાસ હાથ ધરી 2 આરોપીઓની ધરપકડ કરી હતી.
બનાસકાંઠાના અંબાજીના ત્રિશુળિયા ઘાટ પર બસ અકસ્માત સર્જાયો હતા. અંબાજીના ત્રિશુળિયા ઘાટ પાસે બસ પલટી ગઈ હતી. જેમાં 6 લોકોના ઘટના સ્થળે મોત નીપજ્યા હતા. મળતી માહિતી અનુસાર અંબાજીથી દાતા તરફ આવતી બસને આ અકસ્માત નડ્યો હતો. જેમાં 35 થી વધુ લોકો ઈજાગ્રસ્ત થયા હતા.અંબાજીથી દાંતા તરફ આવતી બસને અકસ્માત નડ્યો હતો. ઇજાગ્રસ્તોને સારવાર માટે હોસ્પિટલ ખસેડાયા હતા.
મહેસાણા જિલ્લાના કડીના બોરીસણા ગામમાં ફ્રી મેડિકલ કેમ્પ યોજવામાં આવ્યો હતો. જેમાંથી 10 દર્દીઓને અમદાવાદની ખ્યાતિ હોસ્પિટલ ખાતે સારવાર અર્થે બોલાવવામાં આવ્યા હતા. જ્યાં તમામ દર્દીઓને જાણ કર્યા વગર જ એન્જીયોગ્રાફી કરી હતી. સ્ટેન્ટ મૂક્યા બાદ 2 દર્દીના મોત થતા સમગ્ર ઘટના સામે આવી હતી. ત્યારબાદ ખ્યાતિકાંડમાં અનેક ખુલાસો થયા છે. ખ્યાતિ હોસ્પિટલ દ્વારા કડીમાં 2 વર્ષથી કેમ્પ કરવામાં આવતા હોવાનો ખુલાસો થયો હતો. કડીના ડરણ, ખાવડ, થોળ, કલ્યાણપુરા, કોલાદમાં બે વર્ષમાં કેમ્પ કર્યા હતા. કેમ્પ કરી PMJAY કાર્ડ ધરાવતા લોકોના ઓપરેશન કરાતા હતા.જે બાદ કેટલાક દર્દીઓના મૃત્યુ થયા હોવાનું પણ સામે આવ્યુ હતુ.
ગુજરાતમાં ચકચારી મચાવનાર BZ કૌભાંડ બહાર આવ્યુ છે. ઉત્તર ગુજરાતમાં BZ ગ્રુપ નામનું એક નવું કૌભાંડ સામે આવ્યુ હતું. જેમાં ભૂપેન્દ્ર ઝાલા નામના કૌભાંડીએ એકના ડબલ કરી આપવાનું કહી 6000 કરોડનું ફુલેકું ફેરવ્યું છે. જેમાં ગુજરાતની સામાન્ય જનતાની સાથે સાથે શિક્ષકો, ખેડૂતો, પોલીસકર્મીઓ, નિવૃત કર્મચારીઓ, લેભાગુની લાલચમાં આવીને લૂંટાયા છે. આ સમગ્ર ઘટનામાં અનેક ખુલાસાઓ થયા છે. લોભના ચક્કરમાં શિક્ષકો પણ એજન્ટ બન્યા હોવાનું સામે આવ્યુ હતુ. જેના પગલે આ સમગ્ર કૌભાંડની તપાસ CID કરી રહી છે.ભૂપેન્દ્ર ઝાલા, દરેક એજન્ટને રોકાણ સામે 5થી 25 ટકાનું કમિશન આપતો હતો. CIDએ બે બેંક ખાતાની તપાસ કરતા, બંને ખાતામાંથી રૂપિયા 175 કરોડના વ્યવહારો થયાનું સામે આવ્યું હતુ. 5 લાખના રોકાણમાં મોબાઈલ અને 10 લાખ રોકાણમાં સ્માર્ટ ટીવી અપાતું. ઠગબાજોએ વર્ષ 2016થી કંપની હાથ ધરવામાં આવી છે. 2020માં સમગ્ર રાજ્યમાં તેની જાળ બિછાવી આરોપીઓ હિંમતનગર, અરવલ્લી અને મહેસાણામાં ઓફિસ ખોલી હતી.
મહેસાણાની નવી શેઢાવી ગામ નજીક વગડામાં ગરીબ યુવાનને તેની જાણ બહાર અને લગ્નના એક મહિના પહેલા જ નસબંધીનું ઓપરેશન કરવામાં આવ્યુ હતુ. સમગ્ર ઘટનાની વાત કરીએ તો આરોગ્ય વિભાગ દ્વારા પુરુષ, સ્ત્રી હેલ્થ વર્કરને એક મહિનામાં ત્રણ નસબંધીના ઓપરેશનનો ટાર્ગેટ આપવામાં આવે છે.ટાર્ગેટ પુરો ન થતા ગરીબ યુવાનને દારુ પીવડાવી તેનું નસબંધીનું ઓપરેશન કરી દેવામાં આવ્યુ હતું. જ્યારે આ સમગ્ર ઘટનામાં તપાસ હાથ ધરવામાં આવી ત્યારે ચોંકાવનારા ખુલાસા થયા હતા. કુવારા છોકરાને સરકારી ચોપડે 3 બાળકના પિતા દર્શાવી નસબંધીનું ઓપરેશન કરવામાં આવ્યુ હતુ. જ્યાં અડાલજ હોસ્પિટલમાંથી પણ આ યુવાનને ફિટનેસ સર્ટિફિકેટ આપવામાં આવ્યુ હતુ. જો કે જે હેલ્થ વર્કરે ટાર્ગેટ પુરો કરવા માટે યુવાનનું નસબંધીનું ઓપરેશન કરાવ્યુ હતુ તેને સસ્પેન્ડ કરી વધુ તપાસ હાથ ધરવામાં આવી હતી.
ભાવનગરમાં ખાનગી બસ ડમ્પર પાછળ ઘુસી જતા 6 લોકોના મોત થયા હતા. એપલ ટ્રાવેલ્સની બસ સુરતથી રાજુલા જઈ રહી હતી તે સમયે આ ઘટના બની હતી. જો સમગ્ર ઘટનાની વાત કરીએ તો વહેલી સવારે ત્રાપજ બાય પાસ પર બસ ડમ્પર પાછળ ઘુસી જતા ઘટના સ્થળે જ 3 બાળકો અને 1 મહિલા સહિત 6ના મોત થયા હતા. જ્યારે 19 લોકો ઈજાગ્રસ્ત થયા હતા. અકસ્માત થતા રસ્તા પર ચક્કાજામના દ્રશ્યો જોવા મળ્યો હતો. અકસ્માત સર્જાતા સ્થાનિકો દ્વારા તાત્કાલિક ઈજાગ્રસ્ત લોકોને હોસ્પિટલમાં સારવાર અર્થે ખસેડવામાં આવ્યા હતા.
Published On - 12:44 pm, Wed, 18 December 24