IRCTC નું ‘વર્ક ફ્રોમ હોટેલ’ પેકેજ, જાણો આ પેકેજની તમામ વિગત અને કિંમત
IRCTC એ કોરોના મહામારીમાં ઘરેથી કામ કરીને કંટાળી ગયેલા લોકો માટે એક નવું પેકેજ લાવ્યું છે. કેરલમાં 'વર્ક ફ્રોમ હોટલ' માટેની વ્યવસ્થા કરવામાં આવી છે.
IRCTC એ કોરોના મહામારીમાં ઘરેથી કામ કરીને કંટાળી ગયેલા લોકો માટે એક નવું પેકેજ લાવ્યું છે. કેરલમાં ‘વર્ક ફ્રોમ હોટલ’ માટેની વ્યવસ્થા કરવામાં આવી છે. જે લોકો કેરલમાં ફ્રેશ અને આરામદાયક માહોલમાં કામ કરવા ઈચ્છે છે તેમના માટે આ એક સારો વિકલ્પ છે, જોકે તેના માટે પેમેન્ટ કરવું પડશે. આઈઆરસીટીસીએ બુધવારે જાહેર કરેલા એક નિવેદનમાં કહ્યું છે કે, પેકેજ કોરોના રોગચાળા સામે લડનારાઓને આનંદદાયક વિકલ્પ પ્રદાન કરશે. પાંચ રાતની કિંમત 10,126 રૂપિયા હશે.
પેકેજની વિગત
આ પેકેજ અંતર્ગત કેરલમાં હોટલના રૂમમાં પાંચ રાત માટે વ્યક્તિ દીઠ પેકેજ 10,126 રૂપિયાથી શરૂ થશે. આ રૂમમાં ત્રણ લોકો રોકાશે. ત્રણેયને અલગ-અલગ ભાડું આપવાનું રહેશે. પેકેજની રકમમાં ત્રણ ટાઈમ ભોજન, બે વખત ચા / કોફી, ફ્રી વાઇ-ફાઇ, વાહન પાર્કિંગની જગ્યા અને મુસાફરી વીમો શામેલ છે.
આ શહેરોમાં હોટેલ રૂમ પસંદ કરી શકાશે
કેરલના મુન્નાર, થેકડ્ડી, કુમારકોમ, એલેપ્પી, કોવાલમ, વાયનાડ અને કોચીન હોટલના રૂમ ‘વર્ક ફ્રોમ હોટલ’ માટે પસંદ કરી શકાય છે. ઓછામાં ઓછા પાંચ દિવસ માટે પેકેજ લેવાનું રહેશે. બાદમાં તેને લંબાવી શકાય છે.
તિરુવનંતપુરમના અહેવાલ મુજબ, બુધવારે કેરળમાં કોવિડ-19 ના વધુ 43,529 નવા કેસ નોંધાયા છે. રાજ્યમાં કુલ કેસ વધીને 19,80,879 થયા છે. રાજ્યમાં બુધવારે 95 દર્દીઓનાં મોત બાદ મૃત્યુઆંક વધીને 6053 પર પહોંચી ગયો છે, જ્યારે 34,600 દર્દીઓ સ્વસ્થ થયા છે. રાજ્યમાં અત્યાર સુધીમાં 15,71,738 દર્દીઓ કોરોના મુક્ત થયા છે.
Latest News Updates
