જાહેરાતો પાછળ કેટલો ખર્ચ કર્યો ? સુપ્રીમ કોર્ટે દિલ્હી સરકાર પાસે 3 વર્ષનો માંગ્યો હિસાબ
સુપ્રીમ કોર્ટે દિલ્હી સરકારને ફટકાર લગાવી હતી. બેન્ચે કહ્યું કે જાહેરાત પર ખર્ચ કરવા માટે પૈસા છે પરંતુ RRTM પ્રોજેક્ટ પર ખર્ચ કરવા માટે નથી. આ સાથે દિલ્હી સરકાર પાસેથી જાહેરાતો પર થયેલા ખર્ચની વિગતો મંગાવવામાં આવી હતી.
સુપ્રીમ કોર્ટે આજે સોમવારે દિલ્હી સરકારને છેલ્લા ત્રણ નાણાકીય વર્ષમાં જાહેરાતો પર કરવામાં આવેલા ખર્ચનો હિસાબ આપવા જણાવ્યું હતું. આ મામલે કોર્ટે કેજરીવાલ સરકારને નોટિસ પાઠવી છે. આના પર બે અઠવાડિયામાં જવાબ માગતા, સુપ્રીમ કોર્ટે દિલ્લીની આમ આદમી પાર્ટીની સરકારને વિગતવાર સોગંદનામું દાખલ કરવા કહ્યું. જસ્ટિસ સંજય કિશન કૌલ અને જસ્ટિસ સુધાંશુ ધુલિયાની બેન્ચે આર આર ટી એસ પ્રોજેક્ટમાં દિલ્હી સરકાર તરફથી ફાળો ન આપવાને ધ્યાનમાં રાખીને આ આદેશ આપ્યો છે.
વાસ્તવમાં, દિલ્હી સરકાર દ્વારા કહેવામાં આવ્યું હતું કે, બજેટની મર્યાદાઓને કારણે, સરકાર આર આર ટી એસ પ્રોજેક્ટ (રિજનલ રેપિડ ટ્રાન્ઝિટ સિસ્ટમ) માટે ભંડોળ ખર્ચ કરી શકતી નથી. એમસી મહેતા કેસની સુનાવણી કરી રહેલી બેંચને જણાવવામાં આવ્યું હતું કે દિલ્હી સરકાર આ પ્રોજેક્ટમાં ફંડ આપવા માટે તૈયાર નથી. આ પ્રોજેક્ટ દિલ્હી-અલવર અને દિલ્હી-પાનીપત કોરિડોરનો છે. દિલ્હી-મેરઠ કોરિડોરના કિસ્સામાં પણ દિલ્હી સરકારે આવું જ કર્યું હતું.
ત્રણ વર્ષમાં જાહેરાતો પરના ખર્ચની વિગતો આપો
આ અંગે નારાજગી વ્યક્ત કરતા સુપ્રીમ કોર્ટે દિલ્હી સરકારને ફટકાર લગાવી હતી. બેન્ચે કહ્યું કે જાહેરાત પર ખર્ચ કરવા માટે પૈસા છે પરંતુ RRTM પ્રોજેક્ટ પર ખર્ચ કરવા માટે નથી. આ સાથે દિલ્હી સરકાર પાસેથી જાહેરાતો પર થયેલા ખર્ચની વિગતો મંગાવવામાં આવી હતી. સુપ્રીમ કોર્ટે કહ્યું કે ત્રણ વર્ષમાં જાહેરાતો પર જેટલી રકમ ખર્ચવામાં આવી છે તે દિલ્હી સરકાર દ્વારા ખર્ચવામાં આવી છે. આ અંગે તેમણે બે સપ્તાહમાં સોગંદનામું રજૂ કરવું જોઈએ.
RRTS પ્રોજેક્ટ માટે 500 કરોડ આપવા સૂચના
ખંડપીઠે કહ્યું કે RRTS જેવા પ્રોજેક્ટ પર કામ ભંડોળની અછતને કારણે અટકવું જોઈએ નહીં. ઉલ્લેખનીય છે કે, 21 એપ્રિલે સુપ્રીમ કોર્ટે દિલ્હી સરકારને RRTS પ્રોજેક્ટ માટે 500 કરોડ રૂપિયાનું યોગદાન આપવાનો નિર્દેશ આપ્યો હતો.
RRTS પ્રોજેક્ટ શું છે?
RRTS એ એક રેલ કોરિડોર છે જે દિલ્હી, ગાઝિયાબાદ અને મેરઠ શહેરોને જોડવા માટે બનાવવામાં આવી રહ્યો છે. આ કોરિડોર પર સેમી-હાઈ-સ્પીડ ટ્રેનો દોડશે. તેના નિર્માણનું કામ ચાલી રહ્યું છે. તે RapidX પ્રોજેક્ટના પ્રથમ તબક્કા હેઠળના ત્રણ રેપિડ રેડ કોરિડોરમાંથી એક છે.
