બચ્ચાને જંગલમાં છોડ્યા, અવાજ પણ કર્યો, છતાં વાઘણ ન મળી, હવે ડ્રોનથી શરૂ થશે શોધ

National Tiger Conservation Authorit : આંધ્રપ્રદેશમાં વન વિભાગના અધિકારીઓ વાઘણના 4 બચ્ચાને તેમની માતા સાથે ફરી મળવાના તમામ પ્રયાસો કરી રહ્યા છે, પરંતુ હજુ સુધી આ મામલે સફળતા મળી નથી. મળતી માહિતી મુજબ મોડી રાત્રે બચ્ચાને ખાસ વાહનોની મદદથી જંગલમાં છોડવામાં આવ્યા હતા, પરંતુ તેમની માતા તેમને લેવા માટે પહોંચી ન હતી, ત્યારબાદ બચ્ચાને પરત લાવવામાં આવ્યા હતા. નંદયાલ જિલ્લાના પેદ્દા ગુમ્મદપુરમના ગ્રામજનોને ગામના સરહદી વિસ્તારમાં નલ્લામલ્લા જંગલ પાસે 4 વાઘણના બચ્ચા મળ્યા, જેને તેઓએ એક રૂમમાં રાખ્યા હતા. માહિતી મળ્યા પછી વન વિભાગના અધિકારીઓએ તેમને નલ્લામલ્લા જંગલમાં સ્થિત બેરલુટી ગેસ્ટ હાઉસમાં રાખ્યા.

આ પણ વાંચો : Shocking Viral Video : ડઝન જેટલાં મગરે કર્યો ઝિબ્રા પર જીવલેણ હુમલો, થોડીક જ સેકન્ડમાં બનાવ્યો શિકાર

ડ્રોનની મદદથી જંગલમાં વાઘણની શોધ શરૂ

તિરુપતિ પ્રાણીસંગ્રહાલયના વિશેષ પશુ ચિકિત્સકોની ટીમ ચારેય બચ્ચાઓની સંભાળ લઈ રહી છે, તમામ પ્રકારના ટેસ્ટ પણ કરી રહી છે. બીજી તરફ વન વિભાગના અધિકારીઓ પણ બચ્ચાની માતાને શોધી રહ્યા છે, જેથી બચ્ચા વાઘણ સુધી પહોંચી જાય. આ મામલે વન વિભાગને હજુ સુધી સફળતા મળી નથી. તેથી જ હવે તેઓએ ડ્રોનની મદદથી જંગલમાં વાઘણની શોધ શરૂ કરી છે. વન વિભાગના અધિકારીઓના જણાવ્યા અનુસાર બચ્ચાની ઉંમર 30-40 દિવસની આસપાસ છે. આ વાઘણનો નંબર T108 E તરીકે ઓળખવામાં આવ્યો છે, તેની ઉંમર 8 વર્ષની આસપાસ હોઈ શકે છે.

બચ્ચાના અવાજ પછી પણ તેમની માતા ન આવી

વન વિભાગના અધિકારીઓએ જંગલમાં વાઘના પગના નિશાન જોયા હતા, કેટલીક વખત ગર્જનાનો અવાજ પણ સંભળાતો હતો. આ જોઈને ગઈકાલે રાત્રે બચ્ચાને ખાસ વાહનોમાં લઈને નાગાર્જુન સાગર ટાઈગર રિઝર્વ ફોરેસ્ટમાં છોડવામાં આવ્યા હતા, બચ્ચાએ ઘણા અવાજો આપ્યા હતા પરંતુ તેમની માતા તેમને લેવા ન આવી, ત્યારબાદ બચ્ચાને પરત લાવવામાં આવ્યા હતા.

એકવાર વન વિભાગના અધિકારીઓ મેળવવાનો કરશે પ્રયાસ

અત્યારે બચ્ચાને સીસીટીવીની દેખરેખ હેઠળ રાખવામાં આવ્યા છે, તેમને ખવડાવવા સિવાય અન્ય કોઈને અંદર જવાની પરવાનગી નથી, વન વિભાગના અધિકારીઓ ફરીથી બચ્ચાને વાઘણ સાથે મેળવવાનો પ્રયાસ કરશે, વધુ દિવસો પસાર થશે તો વાઘણ તેના બચ્ચાને ઓળખી નહીં શકે. જો બચ્ચામાંથી મનુષ્યની સુગંધ આવશે તો વાઘણને બચ્ચા અપનાવવામાં સમસ્યાનો સામનો કરવો પડશે.