મોંઘવારીનો માર ! ખાણી-પીણીના ભાવ આસમાને પહોંચ્યા, લોટના ભાવ 12 વર્ષની સર્વોચ્ચ સપાટીએ
મોંઘવારીનો અંદાજ એ વાત પરથી લગાવી શકાય છે કે લોટની કિંમત (Atta price) 12 વર્ષની સર્વોચ્ચ સપાટીએ પહોંચી ગઈ છે. એપ્રિલ મહિના માટે લોટની સરેરાશ કિંમત રૂ. 32.38 પ્રતિ કિલો હતી.
અત્યારે ચારે બાજુ મોંઘવારી(Inflation)એ ભરડો લીધો છે. ખાણી-પીણીથી લઈને પહેરવાના વસ્ત્રો અને ઘરોમાં વપરાતી તમામ જરૂરી વસ્તુઓ મોંઘી થઈ ગઈ છે. મોંઘવારીનો અંદાજ એ વાત પરથી લગાવી શકાય છે કે લોટની કિંમત(Atta price)12 વર્ષની સર્વોચ્ચ સપાટીએ પહોંચી ગઈ છે. એપ્રિલ મહિના માટે લોટની સરેરાશ કિંમત રૂ. 32.38 પ્રતિ કિલો હતી, જે જાન્યુઆરી 2010 પછીનું સર્વોચ્ચ સ્તર છે. આપણા દેશમાં ઘઉંના ઉત્પાદન અને સ્ટોક બંનેમાં ઘટાડો જોવા મળી રહ્યો છે, સાથે જ વિદેશમાં તેની માગ વધી છે, જેના કારણે ભાવમાં ઉછાળો જોવા મળી રહ્યો છે. ખાદ્યતેલના ભાવ પહેલેથી જ આસમાને છે. અન્ય ખાદ્ય ચીજો પણ મોંઘી થઈ રહી છે.
ફુગાવો પણ છેલ્લા ત્રણ મહિનાથી 6 ટકાથી ઉપર છે, જે રિઝર્વ બેન્કની અપર લિમિટ કરતાં વધુ છે. એપ્રિલમાં ફુગાવો 7.7 ટકા રહેવાનો અંદાજ છે. ઈન્ડિયન એક્સપ્રેસમાં પ્રકાશિત એક અહેવાલમાં ગ્રાહક બાબતોના મંત્રાલય દ્વારા શેર કરવામાં આવેલી માહિતી અનુસાર, 7 મેના રોજ ઘઉંના લોટની સરેરાશ કિંમત 32.78 રૂપિયા પ્રતિ કિલો હતી. તેણે વાર્ષિક ધોરણે 9.15 ટકાની વૃદ્ધિ નોંધાવી છે. 7 મે 2021ના રોજ આ કિંમત 30.03 રૂપિયા હતી.
ક્યાં સૌથી મોંઘો લોટ વેચાઈ રહ્યો છે
દેશના વિવિધ ભાગોમાં લોટની કિંમત અલગ-અલગ છે. 156 કેન્દ્રો માટે ઉપલબ્ધ ડેટા અનુસાર, લોટની સૌથી વધુ કિંમત પોર્ટ બ્લેરમાં રહી. ત્યાં સરેરાશ ભાવ 59 રૂપિયા પ્રતિ કિલો છે. ત્યારે બિહારના પુરુલિયામાં પ્રતિ કિલો રૂ. 22 પર સૌથી નીચો છે.
મુંબઈમાં મેટ્રો શહેરોમાં સૌથી વધુ કિંમત
મેટ્રો શહેરોની વાત કરીએ તો, મુંબઈમાં સરેરાશ કિંમત 49 રૂપિયા, ચેન્નાઈમાં 34 રૂપિયા, કોલકાતામાં 29 રૂપિયા અને દિલ્હીમાં 27 રૂપિયા પ્રતિ કિલો છે. આ વર્ષની શરૂઆતથી જ લોટના ભાવમાં વધારો જોવા મળી રહ્યો છે. જાન્યુઆરીથી લોટના ભાવમાં 5.81 ટકાનો ઉછાળો આવ્યો છે.
