નર્મદા નદીમાં પેટ્રોલીગ કરતી બોટનું એન્જિન થયું ફેલ, 15 લોકો હતા સવાર, જુઓ ડૂબતી બોટનો વીડિઓ
જબલપુરમાં નર્મદા નદીમાં પેટ્રોલિંગ કરી રહેલ હોમગાર્ડની બોટનું એન્જિન એકાએક બંધ થઈ જતા, નદીના તેજ પ્રવાહમાં બોટ તણાઈને ડૂબવા લાગી હતી. ઘટના સમયે, હોમગાર્ડ તાલીમાર્થીઓ અને આપત્તિ વ્યવસ્થાપન ટીમના સભ્યો સહિત આશરે 15 લોકો સવાર હતા.
મધ્યપ્રદેશના જબલપુરમાં નર્મદા નદીમા કરાઈ રહેલા પેટ્રોલિંગ દરમિયાન એક મોટી દુર્ઘટના ઘટી હતી. નર્મદા નદીના ગૌરી ઘાટ નદી કિનારે શ્રદ્ધાળુઓની દેખરેખ અને સલામતી સુનિશ્ચિત કરવા માટે તહેનાત હોમગાર્ડની બોટ અચાનક બંધ પડી ગઈ. નદીના પાણીના તીવ્ર પ્રવાહમાં ફસાઈને, બોટ ઝડપથી વહેવા લાગી અને થોડીવારમાં જ નદીમાં ડૂબી ગઈ. આ ઘટનાનો વીડિયો પણ સામે આવ્યો છે. અહેવાલો દર્શાવે છે કે બોટનું એન્જિન ફેલ થઈ ગયું ત્યારે લગભગ તેમા હોમગાર્ડ તાલીમાર્થીઓ અને આપત્તિ વ્યવસ્થાપન કર્મચારીઓ સહીત કુલ 15 લોકો બોટમાં સવાર હતા. એન્જિન બંધ થયા પછી તરત જ તેમા સવાર આપત્તિ વ્યવસ્થાપન અને હોમગાર્ડના જવાનોને પરિસ્થિતિની ગંભીરતાનો ખ્યાલ આવ્યો, કારણ કે બોટ નદીના શક્તિશાળી પ્રવાહમાં તણાવા સાથે ડૂબવા લાગી હતી.
ઘટના સમયે, બરગી ડેમના 13 દરવાજા ખુલ્લા હતા, જેના કારણે નર્મદા નદીમાં ખૂબ જ જોરદાર પ્રવાહ હતો. બોટનું એન્જિન ફેલ થઈ ગયા પછી, બોટ ઝડપથી પ્રવાહમાં વહી ગઈ. પોતાના જીવ જોખમમાં હોવાનું સમજીને, તેમાં સવાર લોકોએ મદદ માટે બૂમો પાડી. તેમની બૂમો સાંભળીને, ત્રણ-ચાર સ્થાનિક બોટમેન તાત્કાલિક પોતાની બોટ લઈને ઘટનાસ્થળે દોડી ગયા. તેમણે નર્મદાના પાણીમાં તણાઈ રહેલા લોકોને બચાવવામાં મદદ કરી. સદનસીબે, બોટમાં સવાર દરેક વ્યક્તિએ લાઇફ જેકેટ પહેર્યું હતું; આ મોટી દુર્ઘટના ટાળવા અને દરેકના જીવ બચાવવામાં મહત્વપૂર્ણ સાબિત થયું.
બોટ ઓપરેટર નશામાં હોવાના આરોપ
ઘટના બાદ બોટ ઓપરેટર અંગે પણ પ્રશ્નો ઉભા થઈ રહ્યા છે. એવો આરોપ છે કે ઓપરેટર તે સમયે દારૂના નશામાં હતો. આ વાતની તપાસ કરવા માટે બોટ ચાલકની તબીબી તપાસ કરવામાં આવી રહી છે. અકસ્માત સમયે બોટમેન નશામાં હતો કે નહીં તે અંગેની સ્થિતિ રિપોર્ટ આવ્યા પછી સ્પષ્ટ થશે.
સમયસર હસ્તક્ષેપથી મોટી દુર્ઘટના ટળી
નર્મદા નદીના તીવ્ર પ્રવાહને કારણે પરિસ્થિતિ અત્યંત જોખમી બની ગઈ હતી. જોકે, સ્થાનિક હોડીચાલકો સમયસર ઘટનાસ્થળે પહોંચી ગયા હતા અને લોકોને બચાવ્યા હતા. તેમની ત્વરિત કાર્યવાહી અને સમજદારીથી મોટી દુર્ઘટના ટળી ગઈ હતી. ગૌરીઘાટ પર શ્રદ્ધાળુઓની સલામતી માટે તહેનાત હોમગાર્ડ પેટ્રોલ બોટના ડૂબવાની ઘટનાએ સલામતી વ્યવસ્થા પર પણ પ્રશ્નો ઉભા કર્યા છે. અકસ્માત દર્શાવતો વીડિયો સામે આવ્યા બાદ આ ઘટનાની ચર્ચા વધુ તીવ્ર બની છે. હવે ઘટનાક્રમની તપાસ કરવામાં આવી રહી છે, જેમાં બોટના એન્જિનમાં ખામી અને હોડીચાલકની સ્થિતિનો સમાવેશ થાય છે. જિલ્લા હોમગાર્ડ કમાન્ડન્ટ નીરજ ઠાકુરે પણ આ બાબત અંગે વિગતો આપી છે.
ગુજરાતના ભાલકા તીર્થથી મથુરા-વૃંદાવન સુધી, જ્યાં-જ્યાં પડ્યાં કાન્હાના ચરણ, શહેરોની બદલાઈ કિસ્મત !
