Rajasthan : રાજસ્થાન(Rajasthan)માં કોરોના (Corona)ની સાથે ડેન્ગ્યુ પણ તબાહી મચાવી રહ્યો છે. ઓમિક્રોનની સાથે સાથે રાજ્યમાં ડેન્ગ્યુ (Dengue)ના રેકોર્ડબ્રેક કેસ જોવા મળી રહ્યા છે. રાજધાની જયપુર (Jaipur)ની વાત કરીએ તો અહીં 3500 ડેન્ગ્યુ પોઝિટિવ દર્દીઓ મળી આવ્યા છે. આ સાથે જ રાજ્યમાં ડેન્ગ્યુના દર્દીઓની સંખ્યા 20 હજારને વટાવી ગઈ છે.
કોરોનાની સાથે ડેન્ગ્યુએ પણ જોર પકડ્યું છે અને આરોગ્ય વિભાગના અધિકારીઓની ઊંઘ હરામ કરી દીધી છે. આ ઉપરાંત મચ્છર (Mosquitoes)ના કરડવાથી થતા ડેન્ગ્યુના કારણે રાજ્યમાં 54 લોકોના મોત પણ થયા છે.
તમને જણાવી દઈએ કે ડેન્ગ્યુના દર્દીઓના મામલામાં જયપુર પ્રથમ નંબર પર છે. આ પછી કોટા બીજા અને જોધપુર ત્રીજા નંબરે છે. પ્રાપ્ત માહિતી મુજબ જીવાત કે ચાંચડના કરડવાથી ઘણા વિસ્તારોમાં સ્ક્રબ ટાઈફસના દર્દીઓ પણ જોવા મળી રહ્યા છે. બીજી તરફ ગત વર્ષના આંકડાઓ પર નજર કરીએ તો આ વખતે ડેન્ગ્યુના વધુ 280 પોઝિટિવ દર્દીઓ મળી આવ્યા છે.
આ સિવાય ગયા વર્ષે સ્ક્રબ ટાઈફસના 1618 કેસ જોવા મળ્યા હતા જે આ વખતે વધીને 1898 થઈ ગયા છે. આ સાથે જો આપણે જિલ્લાવાર આંકડાઓ પર નજર કરીએ તો, બિકાનેર, અલવર, ધોલપુર, ઝાલાવાડ, કરૌલી, ઉદયપુર, બાડમેર, ભરતપુર, ચુરુ અને જોધપુરમાં ડેન્ગ્યુના દર્દીઓ મળી આવ્યા છે.
ડેન-2 વેરિઅન્ટ લીવર અને ફેફસાને અસર કરે છે
આ વખતે રાજ્યમાં સૌથી વધુ કેસ વધવાનું કારણ ડેન્ગ્યુનો ડેન-2 પ્રકાર છે. તે જ સમયે, આરોગ્ય નિષ્ણાતોના જણાવ્યા અનુસાર, તે દર્દીના લીવર અને ફેફસાને અસર કરે છે. નિષ્ણાતોના મતે, આ પ્રકારની અસર સૌથી પહેલા પેટ પર થાય છે, જેના કારણે દર્દીને પેટમાં દુખાવાની સાથે તાવની ફરિયાદ રહે છે. આ પ્રારંભિક તાવમાં પ્લેટલેટ્સ ઓછા થતા નથી અને આ પ્રકારની અસર પણ દેખાતી નથી. પરંતુ તે દર્દીના પિત્તાશય, લીવર અને ફેફસાં પર વધુ અસર કરે છે.
ડોર ટુ ડોર સેમ્પલીંગ ઝુંબેશ
રાજસ્થાનના આરોગ્ય વિભાગના જણાવ્યા અનુસાર, રાજ્યમાં ડેન્ગ્યુના વધતા જતા કેસોને ધ્યાનમાં રાખીને, ડોર ટુ ડોર સર્વે શરૂ કરવામાં આવ્યો છે. આરોગ્ય વિભાગની ટીમ શંકાસ્પદ લોકોના ઘરે જઈને સ્થળ પર લોહીના નમૂના લઈ લેબ તપાસ માટે મોકલી રહી છે. આ ઉપરાંત જે વિસ્તારોમાં વધુ દર્દીઓ જોવા મળી રહ્યા છે ત્યાં ફોગિંગ અને લાર્વા નાબૂદ કરવા મહાનગરપાલિકા અને નગરપાલિકાઓ તરફથી દવાઓનો છંટકાવ કરવામાં આવી રહ્યો છે.
આ પણ વાંચો : Section 144 in Mumbai : મુંબઈમાં કોરોના અને ઓમિક્રોનના ખતરા વચ્ચે કલમ 144 આજથી લાગુ, નવા વર્ષની પાર્ટી પર પ્રતિબંધ