Maharashtra Police: નૂપુર શર્માની મુશ્કેલીઓ વધશે, પયગંબર મુહમ્મદ પર ટિપ્પણીના મામલે મહારાષ્ટ્ર પોલીસે મોકલ્યું સમન્સ

ભાજપના પૂર્વ પ્રવક્તા નુપુર શર્માની(Nupur Sharma) મુસીબતો ઓછી થતી દેખાતી નથી. હવે મહારાષ્ટ્ર પોલીસે નૂપુર શર્માને પયગંબર મોહમ્મદ પર ટિપ્પણીના મામલામાં નોટિસ ફટકારી છે. મહારાષ્ટ્રના થાણે જિલ્લાની મુંબ્રા પોલીસે (Maharashtra Police) તેની વિરુદ્ધ FIR નોંધી છે અને તેને 22 જૂને હાજર થવા માટે સમન્સ પાઠવ્યું છે. વાસ્તવમાં, નૂપુર શર્મા વિરુદ્ધ મુંબ્રા, થાણે અને પાયધોનીમાં પયગંબર મોહમ્મદ પર ટિપ્પણી કરવા બદલ કેસ નોંધવામાં આવ્યા છે. પોલીસ દ્વારા તેમનું નિવેદન નોંધવા માટે તેમને બોલાવવામાં આવ્યા છે.આપને જણાવી દઈએ કે નુપુર શર્માએ ભૂતકાળમાં એક ટીવી ડિબેટ દરમિયાન પ્રોફેટ મોહમ્મદ પર વિવાદિત નિવેદન આપ્યું હતું. આ નિવેદન વાયરલ થયા બાદ ખાસ સમુદાયના લોકો ખૂબ જ નારાજ છે અને કાનપુરમાં નુપુર શર્માના નિવેદનને કારણે 3 જૂને શુક્રવારની નમાજ બાદ પથ્થરમારાની ઘટના સામે આવી હતી.

તેમના આ નિવેદનને કારણે ઘણો વિવાદ થયો છે. આરબ દેશોએ પણ નૂપુર શર્માના નિવેદનની સખત નિંદા કરી છે. જો કે આ બધા પછી ભાજપે નુપુર શર્માને પાર્ટીમાંથી સસ્પેન્ડ કરી દીધા છે. બીજી તરફ નૂપુર શર્મા વિરુદ્ધ પણ અનેક જગ્યાએ કેસ નોંધવામાં આવ્યા છે.

નુપુર શર્મા સામે કાર્યવાહી કરવામાં આવશે

નૂપુર શર્મા વિરુદ્ધ રાજ્યમાં અત્યાર સુધીમાં 3 કેસ નોંધાયા છે. તેમની વિવાદાસ્પદ ટિપ્પણી અંગે ગૃહમંત્રી દિલીપ વાલ્સે પાટીલે કહ્યું કે રાજ્યમાં નુપુર શર્મા વિરુદ્ધ FIR નોંધવામાં આવી છે. રાજ્ય પોલીસ આ મામલે તપાસ કરી રહી છે. તેમની સામે શું કાર્યવાહી કરવામાં આવશે તે તપાસ બાદ જ નક્કી થશે. આ સિવાય પોલીસ અધિકારીઓએ કહ્યું કે પોલીસે શર્માને ઈમેલ અને સ્પીડ પોસ્ટ દ્વારા સમન્સ મોકલ્યા છે, જેમાં તેમની વિરુદ્ધ FIR નોંધવામાં આવી છે.

આ કલમો હેઠળ FIR નોંધવામાં આવી છે

નુપુર શર્મા પર ટીવી ડિબેટમાં પ્રોફેટ મોહમ્મદ વિરુદ્ધ વાંધાજનક ટિપ્પણી કરવા બદલ પોલીસે 28 મેના રોજ કેસ નોંધ્યો હતો. પોલીસે જણાવ્યું કે શર્મા વિરુદ્ધ ભારતીય દંડ સંહિતાની કલમ 295A, 153A અને 505(ii) હેઠળ આરોપ નોંધવામાં આવ્યો છે.