રાજ્યસભાનો વીડિયો રેકોર્ડ કરી ફસાયા કોંગ્રેસ સાંસદ, સ્પીકર નારાજ, બજેટ સત્રના બાકીના સમય માટે કરાયા સસ્પેન્ડ
કેન્દ્રીય મંત્રી પીયૂષ ગોયલે આજે (10 ફેબ્રુઆરી) રાજ્યસભામાં આ અંગે પ્રશ્ન ઉઠાવ્યો હતો. સાથે જ તેમણે આ અંગે કાર્યવાહી કરવાની માંગ કરી હતી. પાટીલને સસ્પેન્ડ કર્યા બાદ કોંગ્રેસે ગૃહમાંથી વોકઆઉટ કર્યું હતું.
શુક્રવારે રાજ્યસભા સ્પીકરે ગૃહમાં વીડિયો રેકોર્ડિંગ મામલે કડક પગલું ભર્યું હતું. આ અંતર્ગત કોંગ્રેસના સાંસદ રજની પાટીલને રાજ્યસભામાંથી સસ્પેન્ડ કરવામાં આવ્યા હતા. મહત્વપૂર્ણ છે કે કેન્દ્રીય મંત્રી પીયૂષ ગોયલે આજે (10 ફેબ્રુઆરી) રાજ્યસભામાં આ અંગે પ્રશ્ન ઉઠાવ્યો હતો. સાથે જ તેમણે આ અંગે કાર્યવાહી કરવાની માંગ કરી હતી. પાટીલને સસ્પેન્ડ કર્યા બાદ કોંગ્રેસે ગૃહમાંથી વોકઆઉટ કર્યું હતું.
અધ્યક્ષે કાર્યવાહી કરી
રાજ્યસભાના અધ્યક્ષ જગદીપ ધનખડે ઉપલા ગૃહમાં આની જાહેરાત કરી હતી. તેમણે કહ્યું કે પાટીલે ગૃહની ગઈકાલની કાર્યવાહીનો વીડિયો રેકોર્ડ કર્યો અને તેને ટ્વિટર પર પોસ્ટ કર્યો. તેમણે કહ્યું કે આ ખૂબ જ ગંભીર મામલો છે. તેમણે આ મુદ્દે વિપક્ષના નેતા મલ્લિકાર્જુન ખડગે, ગૃહના નેતા પિયુષ ગોયલ સહિત વિવિધ પક્ષોના ઘણા સભ્યોને સાંભળ્યા બાદ આ જાહેરાત કરી હતી.
તેમણે પાટીલને બજેટ સત્રના બાકીના સમય માટે સસ્પેન્ડ કરવાની જાહેરાત કરી હતી, આ મુદ્દે સંસદીય વિશેષાધિકાર સમિતિનો અહેવાલ બાકી હતો. સ્પીકરની આ જાહેરાત બાદ કોંગ્રેસના સભ્યોએ ગૃહમાંથી વોકઆઉટ કર્યો હતો.
પિયુષ ગોયલે સવાલો ઉઠાવ્યા હતા
આ પહેલા કેન્દ્રીય મંત્રી પીયૂષ ગોયલે આ મામલે સવાલ ઉઠાવ્યા હતા. ગોયલે કહ્યું હતું કે ગઈકાલે ગૃહમાં એક દુર્ભાગ્યપૂર્ણ ઘટના બની હતી. ગૃહની અંદર મોબાઈલથી શૂટ કરવામાં આવેલો વીડિયો સોશિયલ મીડિયા પર જોવા મળી રહ્યો છે. તેણે કહ્યું કે સોશિયલ મીડિયા પર તેનો વ્યાપકપણે પ્રચાર કરવામાં આવી રહ્યો છે. ગોયલે કહ્યું કે જો કે વિપક્ષના કેટલાક નેતાઓ વીડિયોમાં દેખાઈ રહ્યા છે, પરંતુ હું માનું છું કે ગૃહમાં આવો વીડિયો બનાવવો ખૂબ જ ચિંતાજનક છે.
કોંગ્રેસે શું કહ્યું?
કોંગ્રેસના વરિષ્ઠ નેતા મલ્લિકાર્જુન ખડગેએ કહ્યું કે, “તપાસ કર્યા વિના કોઈની સામે કાર્યવાહી ન થવી જોઈએ. સાંસદ રજની પાટીલને દબાણ હેઠળ સસ્પેન્ડ કરવામાં આવ્યા છે.” વડાપ્રધાન નરેન્દ્ર મોદી રાષ્ટ્રપતિના સંબોધન અંગેની ચર્ચાનો જવાબ આપી રહ્યા હતા. આ દરમિયાન વિરોધ પક્ષોના નેતાઓએ સૂત્રોચ્ચાર કરતા ગૃહમાં હંગામો મચાવ્યો હતો. પાટીલે તેનો વીડિયો બનાવીને સોશિયલ મીડિયા પર શેર કર્યો અને વાયરલ કર્યો.
શું છે મામલો?
PM નરેન્દ્ર મોદીએ ગુરુવારે (9 ફેબ્રુઆરી) રાજ્યસભામાં કોંગ્રેસ સહિત તમામ વિરોધ પક્ષો પર નિશાન સાધ્યું હતું. આ દરમિયાન વિરોધ પક્ષો અદાણી કેસને લઈને નારા લગાવી રહ્યા હતા. જણાવી દઈએ કે પીએમ મોદીએ કહ્યું હતું કે કોંગ્રેસે દેશનો વિકાસ કર્યો નથી. માત્ર ભ્રષ્ટાચાર કર્યો છે.
