‘રાહુલ ગાંધીને કોંગ્રેસ અધ્યક્ષ બનાવવા જોઈએ’, અશોક ગેહલોતે CWC બેઠકમાં ભલામણ કરી, સભ્યો પણ થયા સંમત

કોંગ્રેસ વર્કિંગ કમિટી (CWC) ની બેઠકમાં રાજસ્થાનના મુખ્યમંત્રી અશોક ગેહલોતે રાહુલ ગાંધીને (Rahul Gandhi) કોંગ્રેસ અધ્યક્ષ બનાવવાનો પ્રસ્તાવ મૂક્યો છે. સૂત્રોના જણાવ્યા અનુસાર, અશોક ગેહલોતે CWC બેઠકમાં પ્રસ્તાવ મૂક્યો હતો કે રાહુલ ગાંધીએ કોંગ્રેસનું નેતૃત્વ કરવું જોઈએ, જેને CWC ના તમામ સભ્યોનું સમર્થન પણ મળ્યું હતું. અત્યારે સોનિયા ગાંધી દેશની સૌથી જૂની પાર્ટીના વચગાળાના અધ્યક્ષ છે.

2017 માં રાહુલ ગાંધીએ કોંગ્રેસ અધ્યક્ષ પદ સંભાળ્યું. પરંતુ 2019 માં લોકસભા ચૂંટણીમાં કોંગ્રેસની હાર બાદ તેમણે આ પદ છોડ્યું હતું. વાયનાડના સાંસદ રાહુલના રાજીનામા બાદ કોંગ્રેસમાં હંગામો થયો હતો. કોંગ્રેસના વરિષ્ઠ નેતાઓએ પણ રાહુલને મનાવવાનો પ્રયાસ કર્યો, પરંતુ નિષ્ફળ રહ્યા. આ પછી, 19 વર્ષ સુધી કોંગ્રેસનું નેતૃત્વ કરનાર સોનિયા ગાંધી વચગાળાના પ્રમુખ તરીકે પાછા ફરવા સંમત થયા.

ગેહલોતે ગયા વર્ષે પણ રાહુલને પ્રમુખ બનાવવાની માગ કરી હતી આ પહેલી વાર નથી, જ્યારે રાજસ્થાનના મુખ્યમંત્રી ગેહલોતે રાહુલ ગાંધીને કોંગ્રેસ અધ્યક્ષ બનાવવાની માગ કરી હોય. અગાઉ, ગયા વર્ષે જૂનમાં યોજાયેલી CWC બેઠકમાં ગેહલોતે રાહુલને પ્રમુખ બનાવવાની માગ કરી હતી. ગેહલોતે કહ્યું હતું કે હવે સમય આવી ગયો છે કે રાહુલ ફરી એક વખત સંગઠનની કમાન સંભાળી લે. તેમને આ સમયગાળા દરમિયાન ઉત્તરાખંડના પૂર્વ મુખ્યમંત્રી અને કોંગ્રેસના વરિષ્ઠ નેતા હરીશ રાવતનું સમર્થન પણ મળ્યું. જોકે, અન્ય વરિષ્ઠ નેતાઓએ તેના પર કોઈ ટિપ્પણી કરી નથી.

હું પાર્ટીની કાયમી અધ્યક્ષ છું: સોનિયા ગાંધી બીજી તરફ, કોંગ્રેસ અધ્યક્ષ સોનિયા ગાંધીએ શનિવારે ભૂતકાળમાં જાહેર નિવેદનોની પૃષ્ઠભૂમિમાં કપિલ સિબ્બલ સહિત ‘G23’ જૂથના કેટલાક નેતાઓને નિશાન બનાવ્યા હતા. આ દરમિયાન, તેમને સલાહ આપતી વખતે, સોનિયાએ કહ્યું કે તે પાર્ટીના કાયમી અધ્યક્ષ છે અને તેમની સાથે વાત કરવા માટે મીડિયાનો આશરો લેવાની જરૂર નથી. તેમણે CWC ની બેઠકમાં જણાવ્યું હતું કે અધ્યક્ષની ચૂંટણીની પ્રક્રિયા 30 જૂન સુધીમાં પૂર્ણ થવાની હતી, પરંતુ કોરોના વાયરસને કારણે તેને સ્થગિત કરવી પડી હતી અને હવે તેની રૂપરેખા રજૂ કરવામાં આવશે.

કોંગ્રેસ (Congress) અધ્યક્ષ સોનિયા ગાંધીએ (Sonia Gandhi) કોંગ્રેસ કાર્યકારી સમિતિ (CWC) ની બેઠકમાં કેન્દ્ર સરકાર પર આકરા પ્રહારો કર્યા હતા. સોનિયા ગાંધીએ ખેડૂતોના આંદોલન, લખીમપુર હિંસા, મોંઘવારી, વિદેશ નીતિ અને ચીનની આક્રમકતાના મુદ્દાઓ પર નરેન્દ્ર મોદીના નેતૃત્વવાળી કેન્દ્ર સરકારને નિશાન બનાવી હતી.

આ પણ વાંચો : સોનિયા ગાંધીએ લખીમપુરથી લઈ મોંઘવારી અંગેના મુદ્દે કેન્દ્ર સરકાર પર પ્રહાર કર્યા, કહ્યું- સરકારનો એજન્ડા, ‘વેચો, વેચો અને વેચો’

આ પણ વાંચો : Supreme Court : સિંઘુ બોર્ડર પર હત્યા બાદ સુપ્રીમ કોર્ટમાં અરજી દાખલ કરાઈ, પ્રદર્શન સ્થળ પરથી ખેડૂતોને દુર થવાની અપીલ