આંધ્રપ્રદેશમાં ઘણા નીચાણવાળા વિસ્તારોમાં પૂરની સ્થિતિ યથાવત છે. ચિત્રાવતી નદીમાં આવેલા ભયંકર પૂરમાં દસ લોકો ફસાયા હતા, મદદની વિનંતી કરી રહ્યા હતા. અનંતપુર જિલ્લાના કલેક્ટરના આદેશ પર તે 10 લોકોને હેલિકોપ્ટર દ્વારા સુરક્ષિત રીતે બહાર કાઢવામાં આવ્યા છે.
ચિત્રાવતી નદીમાં ભયાનક પૂરના કારણે પુલ પર પાણી વહેવા લાગ્યુ હતુ. તે સમયે એક કારમાં ચાર લોકો પુલ ક્રોસ કરી રહ્યા હતા. અચાનક તે પૂરના પાણીમાં ફસાઈ ગયા. તે બહાર નીકળી શક્યા નહીં, કાર પાણીના પ્રવાહમાં તણાવા લાગી. છ લોકો તેને બચાવવા JCB સાથે ગયા હતા પરંતુ પૂરનું પાણી વધુ હોવાથી જેસીબી પણ પાણીમાં ફસાઈ ગયું હતું. તમામ 10 લોકો તેના પર ચઢીને મદદ માટે આજીજી કરવા લાગ્યા હતા.
જે સ્થળે 10 લોકો ફસાયા હતા ત્યાંના સ્થાનિક લોકોએ દોરડાની મદદથી તેમને બચાવવાનો પ્રયાસ કર્યો, પરંતુ તેઓ નિષ્ફળ ગયા હતા. જે બાદ સ્થાનિક ધારાસભ્ય પ્રકાશ રેડ્ડીએ મુખ્યમંત્રી પાસેથી હેલિકોપ્ટરની મદદ માગી હતી, તેમના આદેશ પર તમામ 10 લોકોને હેલિકોપ્ટર દ્વારા સુરક્ષિત રીતે બહાર કાઢવામાં આવ્યા અને સારવાર માટે હોસ્પિટલમાં દાખલ કરવામાં આવ્યા છે.
બંગાળની ખાડીમાં સર્જાયેલા ડિપ્રેશનના કારણે આંધ્રપ્રદેશના અનેક તટીય જિલ્લાઓમાં વરસાદ તબાહી મચાવી રહ્યો છે. નેલ્લોર, ચિત્તૂર, કડપા જિલ્લામાં ગુરુવાર સવારથી ભારે વરસાદ થઈ રહ્યો છે, જેમાં ઘણા નીચાણવાળા વિસ્તારોમાં પૂર જેવી સ્થિતિ પ્રવર્તી રહી છે. અન્ય જિલ્લાઓમાં પણ વરસાદ પડી રહ્યો છે.
સૌથી વધુ અસર ચિત્તૂર, કડપા અને નેલ્લોર જિલ્લામાં જોવા મળી હતી. આ જિલ્લાઓના ઘણા નીચાણવાળા વિસ્તારોમાં પાણી ભરાઈ ગયા છે, નદીની નહેરો તૂટેલી છે. રસ્તાઓ પર પણ પાણી ભરાઈ ગયા છે, ઘણા વિસ્તારોમાં પાણીના જોરદાર પ્રવાહને કારણે રસ્તાઓ કપાઈ ગયા છે, જેના કારણે લોકોને અવરજવરમાં ભારે મુશ્કેલીનો સામનો કરવો પડી રહ્યો છે.